ភ្នំពេញ ៖ ក្នុងគោលបំណងបង្កើតបរិយាប័ន្នលើវិស័យដឹកជញ្ជូនក្នុងតំបន់ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្តល់អនុសាសន៍សំខាន់ៗមួយចំនួននៅក្នុងកិច្ចប្រជុំរដ្ឋមន្ត្រីដឹកជញ្ជូនអាស៊ានលើទី២៧ ដើម្បីធ្វើយ៉ាងណាអាចសម្រេចបានគោលដៅរួម ជំរុញ និងលើកកម្ពស់សេដ្ឋកិច្ច។
ប្រមុខរាជរដ្ឋាភិបាលប្រទេសកម្ពុជា នៅថ្ងៃទី១១ ខែវិច្ឆិកា ឆ្នាំ២០២១នេះបានថ្លែងនូវអនុសាសន៍សំខាន់ៗមួយចំនួនដែលជាទិសដៅក្នុងការតភ្ជាប់ហេដ្ឋារចនាសម្ព័ន្ធរបស់ប្រទេសក្នុងតំបន់អាស៊ាន។ ការថ្លែងអនុសាសន៍របស់សម្ដេច ហ៊ុន សែន នេះប្រព្រឹត្តិទៅនាឱកាសនៃកិច្ចប្រជុំរដ្ឋមន្ត្រីដឹកជញ្ជូនអាស៊ានលើកទី២៧ ដើម្បីទិសដៅកសាងសេដ្ឋកិច្ច និងសន្តិសុខរួមមួយ។
នៅក្នុងឱកាសជាម្ចាស់ផ្ទះនៃកិច្ចប្រជុំរដ្ឋមន្ត្រីដឹកជញ្ជូនអាស៊ានឆ្នាំនេះ រាជរដ្ឋាភិបាលកម្ពុជាបានសង្កត់ធ្ងន់ទៅលើយុទ្ធសាស្ត្រសំខាន់ៗមួយចំនួន ធ្វើយ៉ាងណាក្នុងន័យសំដៅពង្រឹងការកសាងផ្លូវតភ្ជាប់ដើម្បីលើកស្ទួយវិស័យដឹកជញ្ជូន។
អនុសាសន៍សំខាន់ៗទាំង៦ចំណុចរបស់សម្ដេចតេជោ ហ៊ុន សែន ថ្លែងនៅក្នុងកិច្ចប្រជុំរួមមានជាអាថិ៍ ជំរុញការដឹកជញ្ជូនឆ្លងដែនរវាងប្រទេសនៅក្នុងតំបន់អាស៊ានឲ្យកាន់តែលឿនជាងមុនបើទោះបីជាស្ថិតនៅក្នុងស្ថានភាពកូវីដក៏ដោយ ពោលគឺធ្វើយ៉ាងណាឲ្យសម្រេចបានផែនការយុទ្ធសាស្ត្រដឹកជញ្ជូនអាស៊ានឆ្នាំ ២០១៦-២០២៥ ដែលជាឆ្អឹងខ្នងនៃចក្ខុវិស័យសហគមន៍សេដ្ឋកិច្ចអាស៊ាន។
ប្រទេសក្នុងអាស៊ានទាំងអស់ត្រូវពន្លឿនការចុះហត្ថលេខា និងដាក់ឱ្យអនុវត្តឱ្យបានឆាប់រហ័សនូវកិច្ចព្រមព្រៀងទូលំទូលាយស្តីពីការដឹកជញ្ជូនតាមផ្លូវអាកាសអាស៊ាន-សហភាពអឺរ៉ុប (AECATA) កិច្ចព្រមព្រៀងសេវាកម្មដឹកជញ្ជូនតាមផ្លូវអាកាសអាស៊ាន-នូវែលសេឡង់ (ANZ-ASA) និងកិច្ចព្រមព្រៀងសេវាកម្មដឹកជញ្ជូនតាមផ្លូវអាកាសអាស៊ាន-កូរ៉េ (AKASA) ដែលទាំងនេះជាគោលការណ៍តភ្ជាប់អាស៊ានទៅកាន់ពិភពលោក។
លើសពីនេះ អាស៊ានត្រូវពង្រីកសហប្រតិបត្តិការជាមួយដៃគូរ ស្វែងរកមូលនិធិ ក៏ដូចជាជំនួយបច្ចេកទេសផងដែរ។ អ្វីដែលសំខាន់ជាងនេះទៀតគឺបញ្ហានៃការប្រែប្រួលអាកាសធាតុរបស់ពិភពលោកទាំងមូល តាមរយៈការបញ្ចេញឧស្ម័នកាបូនឌីអុកស៊ីដប្រមាណ២០ភាគរយរបស់ដំណើរការដឹកជញ្ជូន។ ក្នុងន័យនេះ សម្ដេចបានស្នើឲ្យមានការគ្រប់គ្រងយានយន្ដដោយខិតខំបញ្ចៀសបញ្ហាបរិស្ថានធ្ងន់ធ្ងរ ហើយចុងក្រោយជាបញ្ហាសន្តិសុខអាស៊ាន ទៅលើបញ្ហាគ្រោះថ្នាក់ចរាចរណ៍។ អាស៊ានត្រូវមានការសម្រួលផ្លូវធ្វើដំណើរជាលក្ខណៈប្រព័ន្ធ ដោយមានគោលដៅកាត់បន្ថយគ្រោះថ្នាក់ចរាចរណ៍យ៉ាងតិច ៥០% ពីឆ្នាំ២០២១ ទៅឆ្នាំ២០៣០។
គួរបញ្ជាក់ថា ការរាតត្បាតនៃកូវីដ-១៩ បានធ្វើឱ្យប៉ះពាល់ដល់វិស័យឧស្សាហកម្មគ្រប់វិស័យ គ្រប់ទិដ្ឋភាពនៃជីវិត ខាតបង់ផ្នែកសេដ្ឋកិច្ច និងហិរញ្ញវត្ថុយ៉ាងធ្ងន់ធ្ងរមិនធ្លាប់មាន និងធ្វើឱ្យអនាគតស្ថិតក្នុងភាពមិនច្បាស់លាស់។ ក្នុងនោះ ឧស្សាហកម្មអាកាសចរណ៍ និងទេសចរណ៍បានទទួលរងផលប៉ះពាល់យ៉ាងធ្ងន់ធ្ងរបំផុត ដោយការធ្វើចរាចរណ៍របស់អ្នកដំណើរពិភពលោកបានធ្លាក់ចុះចំនួន៥៣,១% ក្នុងខែកក្កដា ឆ្នាំ២០២១ ធៀបនឹងខែកក្កដា ឆ្នាំ២០១៩។ ប្រាក់ចំណូលអាកាសយានដ្ឋាននឹងទទួលរងការខាតបង់ច្រើនជាង១០៨ ពាន់លានដុល្លារនៅចុងឆ្នាំ២០២១ និងប្រាក់ចំណូលអ្នកធ្វើដំណើរក្នុងមួយគីឡូម៉ែត្ររបស់ក្រុមហ៊ុន អាកាសចរណ៍បានធ្លាក់ចុះ៤៦,៥% នៅក្នុងខែកក្កដា ឆ្នាំ២០២១ ធៀបនឹងខែកក្កដា ឆ្នាំ២០១៩។ នេះបើតាមស្ថិតិពីអង្គការអាកាសចរណ៍ស៊ីវិលអន្តរជាតិ(ICAO)៕
ជីវប្រវត្តិ: ជានិស្សិតនៃសាលកវិទ្យាល័យភូមិន្ទភ្នំពេញ ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍។ បច្ចុប្បន្ន ជាអ្នករាយការណ៍ព័ត៌មាននៅ AMS Economy ។
របាយការណ៍ថ្មីៗ
មើលទាំងអស់ ➧Khmer Insider ជាកម្មវិធីវីដេអូឯកសារមួយដែលបង្កើតឡើងដើម្បីបំផុសគំនិតយុវជន
បទយកការណ៍, អាជីវកម្មថ្មី និងនវានុវត្ត
• 16/10/2024
Khmer Insider ជាកម្មវិធីវីដេអូឯកសារមួយដែលបង្កើតឡើងដើម្បីបំផុសគំនិតយុវជនឲ្យក្លាហានចាប់យកក្តីស្រមៃ ឬចាប់អារម្មណ៍លើការបង្កើតអាជីវកម្មថ្មីៗជាមួយគំនិត ទុន និងឱកាសទីផ្សារផ្សេងៗ