(ភ្នំពេញ)៖ ច្បាស់ណាស់ ភាពជោគជ័យនៃអាជីវកម្មមួយមិនមែនកើតឡើងដោយភាពចៃដន្យនោះទេ គ្រប់ជំហាន គឺសុទ្ធតែកើតចេញពីការគ្រោងទុករបស់ម្ចាស់អាជីវកម្ម។ ការសម្លឹងមើលតែមួយជ្រុង ក៏មិនអាចរុញអាជីវកម្មមួយជោគជ័យបានដែរ ពោលគឺម្ចាស់អាជីវកម្មត្រូវយកចិត្តទុកដាក់លើគ្រប់ធាតុចូលដែលពាក់ព័ន្ធ។

ក្នុងឱកាសសិក្ខាសាលាស្ដីអំពីគន្លឹះសម្រាប់ក្លាយជាម្ចាស់អាជីវកម្មដែលមានប្រសិទ្ធភាព ដែលរៀបចំដោយបណ្ដាញទំនាក់ទំនងអាជីវកម្ម (BNI​ Master) អ្នកជំនាញដែលសុទ្ធសឹងតែមានបទពិសោធន៍យូរឆ្នាំលើវិស័យជំនួញបានចែករំលែកនូវគន្លឹះមួយចំនួនដែលមានប្រយោជន៍សម្រាប់អ្នកដែលទើបនឹងចាប់ផ្ដើមអាជីវកម្មថ្មីថ្មោង (Start-up)។

លោក សោម សម្បត្តិ អគ្គនាយកក្រុមហ៊ុនថ្នាំពណ៍ ខាំផេន ដែលជាវាគ្មិនមួួយរូបក្នុងសិក្ខាសាលា ខាងលើកឡើងពីបទពិសោធន៍របស់លោកថា ចំណុចប្រឈមសម្រាប់អាជីវកម្មដែលទើបតែបើក​ដំបូងៗ គឺច្រើនតែជួបបញ្ហារឿងលុយកាក់ បញ្ហាបច្ចេកទេស បញ្ហាចំណេះដឹង កម្រិតយល់ដឹងពីទីផ្សារ ជាពិសេសគឺមិនទាន់យល់ច្បាស់ពីចំណុចខ្លាំង និងចំណុចខ្សោយរបស់ខ្លួន។

ម៉ាកផលិតផលថ្នាំពណ៍ជាតិ ដែលមានវត្តមាននៅក្នុងស្រុកតាំងតែពីឆ្នាំ២០០៤ បានជំនះនូវឧបសគ្គជាច្រើនរហូតអាចឈរជើងលើទីផ្សារបានជាង ២០ឆ្នាំនេះ។

លោក សោម សម្បត្តិ បានលើកឡើងពីចំណុចសំខាន់ៗចំនួន៣ ដែលមានចំណែកយ៉ាងធំក្នុងការរុញឱ្យអាជីវកម្មមួយដើរដល់ចំណុចជោគជ័យ។ ចំណុចទាំងនោះមានដូចជា មានវត្ថុធាតុដើមល្អ មានរូបមន្ដនៃការផលិតល្អ និងមានក្បួននៃការប្រើប្រាស់ល្អ។

ទាក់ទិននឹងចំណុចទាំងនេះ លោកបានលើកជាឧទាហរណ៍ថា ៖

«បើទោះជាចុងភៅពូកែយ៉ាងណាក៏ដោយ បើបន្លែ គ្រឿងផ្សំមិនល្អ ម្ហូបក៏មិនអាចមានរសជាតិឆ្ញាញ់បានដែរ…ហើយបើសិនជាមានវត្ថុធាតុដើមល្អហើយ តែមិនមានរូបមន្ដក្នុងការចម្អិនច្បាស់លាស់ រសជាតិក៏មិនអាចស្ថិតស្ថេរដែរ វាគង់មានថ្ងៃខ្លះឆ្ញាញ់ ថ្ងៃខ្លះមិនឆ្ញាញ់។»

រីឯចំណុចចុងក្រោយ លោកបានបកស្រាយថា ផលិតផលមួយចំនួនជាផលិតផលដែលល្អ មានការ​វេចខ្ចប់ត្រឹមត្រូវ មានគុណភាពល្អ ប៉ុន្តែបើសិនជាអតិថិជនមិនបានដឹងពីរបៀបប្រើ វាក៏ទាញឱ្យផលិត​ផលនោះធ្លាក់ចុះទៅតាមនោះដែរ។

ត្រង់ចំណុចនេះ លោកបានណែនាំឱ្យម្ចាស់អាជីវកម្មមានការគិតគូលើការផ្ដល់ការណែនាំពីរបៀបប្រើឱ្យបានត្រឹមត្រូវ ទើបហៅថាផលិតផលនោះមានប្រសិទ្ធភាពពិតប្រាកដ។

ក្រៅពីចំណុចស្នូលទាំងនេះ លោកក៏បានបន្ថែមនូវជំនាញមួយដែលម្ចាស់អាជីវកម្មគួរប្រកាន់ខ្ចាប់ដែរ នោះគឺ ការទំនាក់ទំនង ជាពិសេសជាមួយអ្នកផ្គត់ផ្គង់។ ការមានទំនាក់ទំនងល្អជាមួយអ្នកផ្គត់ផ្គង់គឺជា ការធានាបាននូវនិរន្តភាពនៃវត្ថុធាតុដើម សម្រាប់ឱ្យអាជីវកម្មដំណើរការបានរលូនដូចគ្នា៕