ភ្នំពេញ ៖ តបតាមការអញ្ជើញរបស់ប្រធានាធិបតី លោក អេម៉ានុយអែល ម៉ាក្រុង សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាកាលពីថ្ងៃទី ១៨-១៩ ខែមករាកន្លងទៅថ្មីៗនេះ បានអញ្ជើញទៅ​បំពេញ​ទស្សនកិច្ចផ្លូវការនៅទីក្រុងប៉ារីស សាធារណរដ្ឋបារាំង។ ក្នុងដំណើរទស្សនៈកិច្ចនោះ កម្ពុជាបានបង្កើនកិច្ចសហប្រតិបត្តិការជាច្រើនផ្នែកជាមួយនឹងបារាំង។ ក្នុងនោះ កម្ពុជាទទួលបានសមិទ្ធផលធំៗចំនួន៤ផងដែរ ដែលរួមមាន៖ សមិទ្ធផលផ្នែក​កិច្ចការ​នយោបាយ ផ្នែកវប្បធម៌ និងភាសា ផ្នែកកិច្ចការថាមពល និងផ្នែកសេដ្ឋកិច្ច ពាណិជ្ជកម្ម។

បើយោងតាម ឯកឧត្តម តាន់ ហ្សង់ហ្វ្រង់ស្វ័រ រដ្ឋមន្ត្រីប្រតិភូអមនាយករដ្ឋមន្ត្រី​ ទទួលបន្ទុកកិច្ចការ​បរទេសបានឱ្យដឹងថា កម្ពុជា-បារាំង បានឯកភាពគ្នាក្នុងការពង្រឹងកិច្ចសហប្រតិបត្តិការក្នុងក្រប​ខណ្ឌ បារាំង-កម្ពុជា និងក្របខណ្ឌបារាំង-អាស៊ាន។

ក្នុងនោះ កម្ពុជាក៏បានស្នើខ្លួនជាបេក្ខភាពរៀបចំកិច្ចប្រជុំកំពូលហ្វ្រង់កូហ្វូនី នៅឆ្នាំ២០២៦ខាងមុខ ហើយថែមទាំងបានស្នើដល់ប្រធានាធិបតីបារាំង​ឱ្យបង្កើតមជ្ឈមណ្ឌលវប្បធម៌របស់បារាំងប្រចាំតំបន់នៅលើទឹកដីកម្ពុជាទៀតផង។ ដោយឡែក ក្នុងន័យសេដ្ឋកិច្ច ភាគីទាំងពីរក៏នឹងទទួលបានផលចំណេញចេញពីការចាប់ដៃគ្នានេះរៀងៗខ្លួនផងដែរ។

ទាក់ទិននឹងបញ្ហានេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍​ថា វេទិកាកិច្ចប្រជុំកំពូលប្រទេសជាសមាជិកអង្គការ ហ្វ្រង់កូហ្វូនី ជាព្រឹត្តិការណ៍ធំមួយ គឺធំជាងកិច្ចប្រជុំកំពូលអាស៊ានទៅទៀត ដោយអង្គការនេះមានសមាជិកដល់ទៅ ៨០ប្រទេសឯណោះ។ ប្រសិនបើកម្ពុជាជាម្ចាស់ផ្ទះរៀបចំកិច្ចប្រជុំកំពូលនោះមែន សភាពាណិជ្ជកម្មកម្ពុជាក៏នឹងទទួល​បន្ទុករៀបចំកិច្ចប្រជុំវិស័យឯកជនផងដែរ។ នេះបើតាមការឱ្យដឹងបន្ថែមរបស់អ្នកឧកញ៉ា លឹម ហេង។

តាមរយៈកិច្ចប្រជុំនេះ វិស័យឯកជន ជាពិសេសវិនិយោគិនបារាំងនឹងអាចបង្កើនទំនុកចិត្តមកលើកម្ពុជាកាន់តែខ្លាំងមួយកម្រិតទៀត ហើយវាក៏ជាឱកាសសម្រាប់អ្នកវិនិយោគបារាំង​ដែលមាន​ស្រាប់នៅកម្ពុជាក្នុងការពង្រីកខ្លួនបន្ថែមទៀតផងដែរ។

ក្រៅពីនោះ អ្នកឧកញ៉ាក៏បានគូសបញ្ជាក់ផងដែរថា៖

«កម្ពុជា ជាប្រទេសដែលស្ថិតក្នុងសហគមន៍អាស៊ានស្រាប់ មិនត្រឹមតែប៉ុណ្ណោះ យើងក៏មានកិច្ចព្រមព្រៀងពាណិជ្ជកម្មសេរីទ្វេភាគី និងកិច្ចព្រមព្រៀង RCEP ទៀតផង ហើយទាំងនេះហើយដែលជាផលចំណេញលើគោកសម្រាប់វិនិយោគិនបារាំង ដែលចង់មកវិនិយោគនៅកម្ពុជា។ ក្នុងន័យភូមិសាស្ត្រទៀតសោត កម្ពុជាគឺស្ថិតក្នុងទីតាំងភូមិសាស្ត្រដែលអំណោយផល និងមានភាព​ងាយ​ស្រួលដល់វិនិយោគិនបារាំងតែម្ដង។»

គួរបញ្ជាក់ថា ដំណើរទស្សនៈកិច្ចរបស់នាយករដ្ឋមន្ត្រីកម្ពុជា និងគណៈប្រតិភូអម ក៏ដូចជា​វិស័យ​ឯកជន កាលពីពេលកន្លងទៅនេះ គឺជាព្រឹត្តិការណ៍មួយដ៏សំខាន់សម្រាប់រក្សាទំនាក់ទំនងប្រទេស ទាំងពីរ ព្រោះរាប់ចាប់តាំង​ពីឆ្នាំ១៩៩៣ មក បារាំងជាមិត្តជិតស្និទ្ធជាងគេបង្អស់មួយរបស់កម្ពុជា៕​