សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅរៀងរាល់៥នាទីម្ដង មជ្ឈមណ្ឌលជាតិផ្ដល់ឈាមត្រូវការឈាម១ប្លោកដើម្បីផ្ដល់ទៅកាន់មន្ទីរពេទ្យសម្រាប់សង្គ្រោះជីវិតមនុស្ស ដូច្នេះ ក្នុងមួយថ្ងៃ មជ្ឈមណ្ឌលជាតិផ្ដល់ឈាមត្រូវការឈាមប្រមាណជិត៣០០ប្លោកដើម្បីបម្រើឱ្យសេចក្ដីត្រូវការរបស់មន្ទីរពេទ្យនានានៅទូទាំងប្រទេស ។
យោងតាមប្រសាសន៍លោកវេជ្ជបណ្ឌិត លី សុវិទ្យ អនុប្រធានមជ្ឈមណ្ឌលជាតិផ្ដល់ឈាម ថ្លែងនៅក្នុងពិធីទទួលឈាមពីការបរិច្ចាករបស់ថ្នាក់ដឹកនាំ និងបុគ្គលិករបស់ធនាគារអេស៊ីលីដាជិត៧០០នាក់ កាលពីថ្ងៃទី៨ ខែវិច្ឆិកា ឆ្នាំ២០២៤ ឱ្យដឹងថា បច្ចុប្បន្ននេះ មជ្ឈមណ្ឌលជាតិផ្ដល់ឈាមបានទទួលអំណោយឈាមពីសប្បុរសជននានា ដែលបានបរិច្ចាគចំនួន២៥០ប្លោកទៅ៣០០ប្លោក ហើយការផ្គត់ផ្គង់ទៅកាន់មន្ទីរពេទ្យនានាវិញក៏ប្រហាក់ប្រហែលប៉ុណ្ណឹងដូចគ្នា ។
លោកវេជ្ជបណ្ឌិតបន្តថា ពីមួយឆ្នាំទៅមួយឆ្នាំ ការបរិច្ចាគឈាមពីសប្បុរសជនមានកំណើនឡើងប្រមាណ២០ភាគរយ ដោយសារតែពួកគាត់បានយល់ដឹងពីអត្ថប្រយោជន៍នៃការបរិច្ចាគឈាម ព្រោះថាការបរិច្ចាគឈាមនេះ មិនត្រឹមតែមិនធ្វើឱ្យប៉ះពាល់ដល់សុខភាពប៉ុណ្ណោះទេ តែថែមទាំងធ្វើឱ្យអ្នកបរិច្ចាគឈាមទទួលបានសុខភាពល្អថែមទៀត ។
លោកថា ៖
« បើសិនជាអ្នកបរិច្ចាគឈាម បានបរិច្ចាគទៀងទាត់ គឺមនុស្សប្រុស៣ខែម្ដង មនុស្សស្រី៤ខែម្ដង វាប្រៀបដូចជាពួកគាត់បានពិនិត្យសុខភាពទៀងទាត់អញ្ចឹងដែរ ព្រោះថារាល់ពេលបរិច្ចាគឈាមសុទ្ធតែត្រូវបានយកឈាមនោះទៅពិនិត្យស្វែងរកមេរោគនានា » ។
លោកបន្ថែមថា ការបរិច្ចាគឈាមពីសំណាក់ថ្នាក់ដឹកនាំ និងបុគ្គលិករបស់ធនាគារអេស៊ីលីដា បានចូលរួមចំណែកសំខាន់មួយក្នុងការផ្ដល់ឈាមជូនមជ្ឈមណ្ឌលជាតិផ្ដល់ឈាម សម្រាប់យកអំណោយឈាមដ៏ថ្លៃថ្លានេះទៅជួយសង្គ្រោះជនរងគ្រោះដែលត្រូវការឈាមសម្រាប់សង្គ្រោះជីវិតបន្ទាន់ ។
លោក លី ថៃ គណៈប្រធាននាយកប្រតិបត្តិជាន់ខ្ពស់អភិបាលកិច្ចនៃធនាគារអេស៊ីលីដា ភីអិលស៊ី បានមានប្រសាសន៍ថា ព្រឹត្តិការណ៍បរិច្ចាគឈាមរបស់ថ្នាក់ដឹកនាំ និងបុគ្គលិករបស់ធនាគារអេស៊ីលីដា នៅពេលនេះ គឺបានធ្វើឡើងនៅទូទាំងប្រទេសតាមការស្ម័គ្រចិត្តដោយសរុបមានចំនួន៦៧០នាក់ ក្នុងនោះនៅ រាជធានីភ្នំពេញ មានអ្នកស្ម័គ្រចិត្តចំនួន ២៣៥នាក់ និងនៅតាមបណ្ដាខេត្តមានចំនួន៤៣៥នាក់ ។
លោកបន្តថា សកម្មភាពបរិច្ចាគឈាមរបស់ធនាគារអេស៊ីលីដា គឺជាការតបស្នងដល់សង្គម ពីព្រោះថាអាជីវកម្មរបស់ធនាគារអាចរីកចម្រើនបានក៏ដោយសារតែមានការគាំទ្រពីសង្គម ដូច្នេះហើយនៅពេលយើងរីកចម្រើន យើងក៏ត្រូវតបស្នងដល់សង្គម ហើយសង្គមនឹងបន្តគាំទ្រដល់ដំណើរការអាជីវកម្មរបស់ធនាគារបន្តទៀត ។ អ្វីដែលពិសេស ការបរិច្ចាគឈាមនេះ គឺការជួយសង្គ្រោះអាយុជីវិតដល់អ្នករងគ្រោះដែលត្រូវការឈាមសម្រាប់សង្គ្រោះជីវិតផងដែរ ។ ទន្ទឹមនឹងនេះដែរ ការបរិច្ចាគឈាមនេះ ក៏នឹងធ្វើឱ្យសុខភាពអ្នកបរិច្ចាគកាន់តែប្រសើរ ដូច្នេះហើយទើបមើលឃើញថាពីមួយឆ្នាំទៅមួយឆ្នាំ មានការចូលរួមបរិច្ចាគច្រើនពីថ្នាក់ដឹកនាំ និងបុគ្គលិករបស់យើង ។
លោកក៏បានអំពាវនាវនិងលើកទឹកចិត្តដល់សប្បុរសជននានា ចូលរួមបរិច្ចាគឈាមឱ្យបានគ្រប់ៗគ្នា ពីព្រោះថាការបរិច្ចាគឈាមនេះ មិនធ្វើឱ្យប៉ះពាល់ដល់សុខភាព ផ្ទុយទៅវិញមានតែធ្វើឱ្យសុខភាពយើងល្អប្រសើរ ៕
Account
Security
Favourite Content