សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្សារមូលបត្រកម្ពុជា បានសហការជាមួយធនាគារ អេស៊ីលីដា ភីអិលស៊ី បានរៀបចំនូវកម្មវិធី វេទិកាក្រុមហ៊ុនចុះបញ្ជី ក្នុងគោលបំណងដើម្បីផ្សព្វផ្សាយអំពីសក្ដានុពលរបស់ធនាគារ អេស៊ីលីដា ដើម្បីឱ្យវិនិយោគិនបានស្វែងយល់ពីកាលានុវត្តភាពរបស់ធនាគារនាពេលបច្ចុប្បន្ន និងអនាគត ព្រមទាំងផ្ដល់ឱកាសដល់វិនិយោគិនបានឃើញដោយផ្ទាល់ពីសកម្មភាព និងវឌ្ឍនភាពនៃប្រតិបត្តិការអាជីវកម្មរបស់ខ្លួនផងដែរ ។ ព្រឹត្តិការណ៍នេះ បានធ្វើឡើងនៅព្រឹកថ្ងៃទី០៤ ខែកញ្ញា ឆ្នាំ២០២៤ នៅការិយាល័យកណ្ដាលធនាគារអេស៊ីលីដា ។
លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានមានប្រសាសន៍ថា ធនាគារ អេស៊ីលីដា ជាធនាគារពាណិជ្ជខ្មែរឈានមុខ ដែលប្រជាជនជឿទុកចិត្តបំផុតនៅប្រទេសកម្ពុជា ក្នុងការផ្តល់ និងការបម្រើសេវាកម្មហិរញ្ញវត្ថុ ជូនដល់សាធារណជននៅគ្រប់មជ្ឈដ្ឋាន និងក្នុងសហគមន៍ ខណៈដែលបច្ចុប្បន្ន ធនាគារ អេស៊ីលីដា មានបុគ្គលិកបម្រើការងារជាជនជាតិខ្មែរសរុបចំនួន ១២ ០៧០នាក់ និងមានបណ្តាញប្រតិបត្តិការចំនួន ២៦៤សាខា នៅទូទាំងប្រទេសកម្ពុជា។
ធនាគារ អេស៊ីលីដា បានបោះផ្សាយលក់មូលបត្រកម្មសិទ្ធិលើកដំបូង និងចុះបញ្ជីភាគហ៊ុនដោយជោគជ័យនៅផ្សារមូលបត្រកម្ពុជា នៅថ្ងៃទី២៥ ខែឧសភា ឆ្នាំ២០២០ ដោយមានការចូលរួមពីវិនិយោគិនសរុបចំនួន ២ ៤៩៦នាក់ ដោយកាន់កាប់ភាគហ៊ុនចំនួន ៤ ៣៤៤ ៨៦៥ភាគហ៊ុន ។ គិតត្រឹមដំណាច់ខែមិថុនា ឆ្នាំ២០២៤ វិនិយោគិនរបស់ធនាគារ អេស៊ីលីដា កើនឡើងចំនួន ១៨ ៤៨២នាក់ កំពុងជួញដូរនៅលើទីផ្សារមូលបត្រកម្ពុជាមានចំនួន ៧៦ ០៩៨ ៣២៩ភាគហ៊ុន ស្មើនឹង ១៧,៥៦៨១% នៃភាគហ៊ុនសរុបរបស់ធនាគារ អេស៊ីលីដា ចំនួន ៤៣៣ ១៦៣ ០១៩ ភាគហ៊ុន ។ ទន្ទឹមនឹងនេះ ធនាគារ អេស៊ីលីដា ទំហំជួញដូរនៅទីផ្សារមូលបត្រ (Trading volume) ចំនួន ៧៦ ៧៧៣ ៤៥១ ភាគហ៊ុន និងមូលធនទីផ្សារ (Market Capitalization) សរុបចំនួន ៣,២៩ ទ្រីលានរៀល ។
ឯកឧត្តម ហុង សុហួរ អគ្គនាយកផ្សារមូលបត្រកម្ពុជាបានមានប្រសាសន៍ថា ពេលនេះគឺជាឱកាសល្អសម្រាប់វិនិយោគិនដែលចង់វិនិយោគភាគហ៊ុនរបស់ធនាគារអេស៊ីលីដា ហើយឯកឧត្តមហ៊ានធានាអះអាងថានៅពេលឆាប់ៗខាងមុខនេះ តម្លៃហ៊ុនរបស់ធនាគារអេស៊ីលីដា នឹងហក់ឡើងវិញ និងធ្វើឱ្យវិនិយោគិនទទួលផលចំណេញបានខ្ពស់ ។
ឯកឧត្តមបន្តថា សម្រាប់វិស័យមូលបត្រផ្ទាល់ លោកទទួលស្គាល់ថា ចាប់តាំងពីធនាគារអេស៊ីលីដា បានចុះបញ្ជី ចូលក្នុងផ្សារមូលបត្រកម្ពុជា វិស័យមូលបត្រចាប់ផ្ដើមផ្លាស់ប្តូរមុខមាត់ ជាមួយនឹងការកើនឡើងនូវចំនួនវិនិយោគិន និងមានការចាប់អារម្មណ៍ពីក្រុមហ៊ុនជាច្រើនទៀតនៅកម្ពុជា ។
ឯកឧត្តមមានប្រសាសន៍ថា៖
« ថ្វីត្បិតតែវិស័យមូលបត្ររបស់យើងនៅតូច បើប្រៀបធៀបនឹងវិស័យមូលបត្រប្រទេសដទៃ តែខ្ញុំអាចធានាបានថា យើងនឹងអាចរីកចម្រើនជាងនេះ ព្រោះពេលនេះ ចាប់ផ្ដើមមានក្រុមហ៊ុននិងមានវិនិយោគិនចូលរួមក្នុងវិស័យនេះកាន់តែច្រើន » ។
បើតាមរបាយការណ៍របស់ផ្សារមូលបត្រកម្ពុជា បានឱ្យដឹងថា នៅក្នុងអំឡុងឆ្នាំ២០១៩ សកម្មភាពជួញដូរភាគហ៊ុននៅលើទីផ្សារមូលបត្រកម្ពុជាមានវិនិយោគិនសរុបចំនួន ២២ ៤៤៧គណនី ដោយទំហំជួញដូរ (Trading volume) សរុបចំនួន ១៥ ៤៨៩ ៩០៥ភាគហ៊ុន ហើយភាគហ៊ុនសរុបដែលបានចុះបញ្ជី (Listed shares) មានចំនួន ៣០៥ ៣០៤ ៤៩៥ភាគហ៊ុន មានមូលធនទីផ្សារ (Market Capitalization) សរុបចំនួន ២,៨១ ទ្រីលានរៀល។
គួរកត់សម្គាល់ថា បន្ទាប់ពីវត្តមានរបស់ធនាគារ អេស៊ីលីដា នៅលើផ្សារមូលបត្រកម្ពុជា រហូតមកដល់ដំណាច់ខែមិថុនា ឆ្នាំ២០២៤ ផ្សារមូលបត្រកម្ពុជា មានការកើនឡើងដោយចំនួនវិនិយោគិនសរុបចំនួន ៥១ ៧៧១គណនី មានទំហំជួញដូរ (Trading volume) សរុបចំនួន ១៦៨ ៨០៧ ៨២៩ភាគហ៊ុន , ភាគហ៊ុនសរុបដែលបានចុះបញ្ជី (Listed shares) មានចំនួន ៣ ១២៨ ៩១៤ ៧៨៤ ភាគហ៊ុន និងមូលធនទីផ្សារ (Market Capitalization) សរុបចំនួន ១១,២១ ទ្រីលានរៀល ៕
Account
Security
Favourite Content