សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សហគមន៍កសិកម្មទំនើប«ប្រាសាទសំបូររុងរឿង», សហគមន៍កសិកម្មទំនើប«កំពង់ធំសាលាវិស័យ» និងសហគមន៍កសិកម្មទំនើប«ទំរីងកំពង់ធំ» ទើបនឹងបើកដំណើរការជាផ្លូវការក្នុងពេលដំណាលៗគ្នាកាលពីពេលកន្លងទៅនេះ។
បើតាមឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា៖ សហគមន៍កសិកម្មទំនើបទាំង៣ខាងលើនេះមានផ្ទៃដីផលិតកម្មសរុបជាង១ពាន់ហិកតា ដោយក្នុងនោះ សហគមន៍កសិកម្មទំនើប មិនគ្រាន់តែអាចទិញធាតុចូលក្នុងតម្លៃទាបជាងការទិញរៀងៗខ្លួននោះទេ តែក៏មិនចាំបាច់ចំណាយដើមទុនផ្ទាល់ខ្លួនក្នុងការដាំដុះដែរ។
ឯកឧត្តមបានបញ្ជាក់ថា៖
« សហគមន៍ទាំង៣នេះ អាចមានសមត្ថភាពបញ្ជាទិញជីរួមគ្នា ទាំងជីសរីរាង្គ និងជីគីមី ក្នុងទំហំប្រហែល៣៥០តោនក្នុងពេលតែមួយ ដែលជាមូលហេតុចម្បងធ្វើឱ្យសហគមន៍ទាំងនេះអាចសន្សំសំចៃលើការចំណាយថ្លៃជីសរុបក្នុងចន្លោះពី១០០លានរៀល រហូតដល់១៥០លានរៀល ប្រសិនបើធៀបទៅនឹងការចំណាយលើថ្លៃជីរបស់កសិករម្នាក់ៗបូកបញ្ចូលគ្នាមុនពេលចូលរួមជាសមាជិកនៃសហគមន៍កសិកម្មទំនើប ព្រោះអ្នកខ្លះធ្លាប់តែទិញរាយម្តងបន្តិចៗ ឬទិញជំពាក់រហូតដល់ពេលប្រមូលផលទើបទូទាត់សង»។
ឯកឧត្តមបានលើកឡើងថា៖ អ្វីដែលរឹតតែប្រសើរជាងនេះទៅទៀតនោះគឺសមាជិកម្នាក់ៗមិនគ្រាន់តែអាចទិញធាតុចូលក្នុងតម្លៃទាបជាងការទិញរៀងៗខ្លួននោះទេ តែពួកគាត់ក៏មិនចាំបាច់ចំណាយដើមទុនផ្ទាល់ខ្លួនក្នុងការដាំដុះដែរ ក្រោយពេលចូលរួមនៅក្នុងសហគមន៍កសិកម្មទំនើប។
ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ធ្លាប់បានលើកថា ក្រសួងបាន និងកំពុងជំរុញចងក្រងសហគមន៍កសិកម្មទំនើប ដែលជាដំណោះស្រាយមួយក្នុងការជំរុញរួមគ្នាអភិវឌ្ឍវិស័យកសិកម្ម សម្រាប់ប្រជាកសិករដែលត្រូវការការគាំទ្រទាំងក្នុងបញ្ហាបច្ចេកទេស ដើមទុន ទីផ្សារ និងបញ្ហាប្រឈមផ្សេងៗឱ្យទាន់ពេលវេលា និងមានប្រសិទ្ធភាព។
ការចងក្រងសហគមន៍កសិកម្មទំនើបស្វាយចន្ទី នឹងផ្សារភ្ជាប់សហគមន៍ទៅកាន់ទីផ្សារដោយផ្ទាល់តាមរយៈការសម្របសម្រួលពីក្រសួង។ មិនត្រឹមតែប៉ុណ្ណោះ ក្រសួងនឹងជួយគាំទ្រផ្នែកទុន និងបច្ចេកទេស ដើម្បីធានាថា សហគមន៍អាចដំណើរការបានដោយរលូន និងទទួលបានតម្លៃបន្ថែម ព្រមទាំងផលចំណេញខ្ពស់។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់AMS Economy នារសៀលថ្ងៃទី៧ខែតុលាថា៖ ដំណើរការរបស់សហគមន៍ទំនើបស្វាយចន្ទីទាំងបីនៅខេត្តកំពង់ធំនេះ កំពុងធ្វើដំណើរទៅរកផ្លូវវិជ្ជមាន ហើយវានឹងជួយជំរុញវិស័យស្វាយចន្ទីឱ្យកាន់តែល្អ។
គួរបញ្ជាក់ថា ស្វាយចន្ទី ជាកសិផលដ៏សំខាន់មួយរបស់កម្ពុជា ដោយគិតត្រឹមឆ្នាំ២០២៤នេះ ប្រទេសកម្ពុជាមានផ្ទៃដីដាំដុះដំណាំស្វាយចន្ទីជាង ៥៨ម៉ឺនហិកតា នៅទូទាំងប្រទេស ដែលអាចផ្ដល់ទិន្នផលជាមធ្យមប្រមាណ ១,៥តោន ក្នុង ១ហិកតា។ នៅក្នុងរយៈពេល៧ខែដើមឆ្នាំ២០២៤ កម្ពុជាផលិតគ្រាប់គ្រាប់ស្វាយចន្ទីឆៅបានជាង ៨៣ម៉ឺនតោន កើនឡើង ៣៦,៧% ដែលធ្វើឱ្យកម្ពុជា ជាប់ចំណាត់ថ្នាក់លេខ២ ជាប្រទេសផលិត និងនាំចេញគ្រាប់ស្វាយចន្ទីច្រើនជាងគេលើពិភពលោក៕
Account
Security
Favourite Content