ភ្នំពេញ៖ ក្រសួងអប់រំ យុវជន និងកីឡា ទីភ្នាក់ងារសហប្រតិបត្តិការអន្តរជាតិកូរ៉េ (Koica) និងកម្មវិធីស្បៀងអាហារពិភពលោក(WFP) នៅថ្ងៃទី២៩ ខែមេសា ឆ្នាំ២០២៥ បានសម្ពោធគម្រោងទឹកប្រាក់ចំនួន១០លានដុល្លារអាមេរិកបន្ថែម ដើម្បីបន្តគាំទ្រ និងពង្រីកកម្មវិធីផ្តល់អាហារតាមសាលារៀនដោយប្រើប្រាស់កសិផលសហគមន៍។

បច្ចុប្បន្ន កម្មវិធីផ្តល់អាហារតាមសាលារៀនរបស់រដ្ឋាភិបាល បានផ្តល់អាហារជូនដល់សិស្សានុសិស្សប្រមា​ណ​១៩ម៉ឺននាក់នៅតាមសាលាបឋមសិក្សាចំនួន៦៨៦សាលា។ ការវិនិយោគបន្ថែមថ្មីពីសាធារណរដ្ឋកូរ៉េក្នុងដំណាក់កាលទី២នាពេលនេះ គឺជាការកសាងបន្ថែមលើសមិទ្ធផលកន្លងមកកាលពីដំណាក់កាលទី១(២០២០-២០២៤) និងអនុញ្ញាតឱ្យក្រសួងអប់រំ យុវជន និងកីឡា និងកម្មវិធីស្បៀងអាហារពិភពលោកអាចផ្តល់អាហារ​ថ្មីៗដ៏មានជីវជាតិជារៀងរាល់ព្រឹកក្នុងរយៈពេល ៥ឆ្នាំបន្តទៀត ជូនដល់សិស្សានុសិស្សនៅមតេ្តយ្យសិក្សា និងបឋមសិក្សាចំនួន ១៣៣,៣០០នាក់ នៅតាមសាលាបឋមសិក្សា ៤២៨សាលា ដែលសាលារៀនទាំងនេះនឹងត្រូវផ្ទេរចូលទៅក្នុងកម្មវិធីផ្តល់អាហារតាមសាលារៀនរបស់រដ្ឋាភិបាលទៅតាមដំណាក់កាលជាបន្តបន្ទាប់រហូតអស់ទាំងស្រុងនៅត្រឹមឆ្នាំ២០២៨។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា៖

«យើងសូមថ្លែងអំណរគុណយ៉ាងជ្រាលជ្រៅចំពោះការបន្តការគាំទ្រពីសំណាក់រដ្ឋា​​ភិបាលនៃសាធារណរដ្ឋកូរ៉េ ទីភ្នាក់​ងា​រ​សហប្រតិបត្តិការអន្តរជាតិកូរ៉េ និងកម្មវិធីស្បៀងអាហារពិភពលោក។ កម្មវិធីផ្តល់អាហារតាមសាលារៀននេះមិនត្រឹមតែបានធ្វើឱ្យប្រសើរឡើងនូវលទ្ធភាពទទួលបានអាហារូបត្ថម្ភគ្រប់គ្រាន់សម្រាប់កុមារប៉ុណ្ណោះទេ គឺថែមទាំងជាការវិនិ​យោ​គ​លើអនាគតរបស់ប្រទេសកម្ពុជាទាំងមូល ដោយបានជួយកសាងប្រព័ន្ធអប់រំមួយឱ្យរឹងមាំ មានភាពធន់ជាងមុន និងបានរួមចំណែកគាំទ្រដល់គោលដៅអភិវឌ្ឍន៍ជាតិរបស់យើង»។

រាជរដ្ឋាភិបាលកម្ពុជាបានបង្ហាញយ៉ាងច្បាស់ពីភាពជាអ្នកដឹកនាំ និងការប្តេជ្ញាចិត្តយ៉ាងមុតមាំរបស់ខ្លួនចំពោះកម្មវិធីផ្តល់អាហារតាមសាលារៀនមួយនេះ។ កាលពីខែសីហា ឆ្នាំ២០២៤ រាជរដ្ឋាភិបាលកម្ពុជាបានអនុ​ម័​ត​គោលនយោបាយស្តីពីការផ្តល់អាហារតាមសាលារៀន ដែលជាការទទួលស្គាល់ជាផ្លូវការនូវតួនាទីរបស់កម្មវិធីផ្ដល់នេះក្នុងការរួមចំណែកដល់ការលើកកម្ពស់គុណភាពអប់រំ អាហារូបត្ថម្ភកុមារ វិស័យកសិកម្ម និងកិច្ចគាំពារសង្គម។ កម្មវិធីផ្តល់អាហារតាមសាលារៀននេះត្រូវបានបង្កើតឡើងស្របនឹងយុទ្ធសាស្រ្តអភិវឌ្ឍន៍មូលធនមនុស្ស និងអាទិភាពនៃយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ដែលកំពុងដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត ដើម្បីជំរុញ និងលើកកម្ពស់វិស័យអប់រំនៅកម្រិតមត្តេយ្យដល់មធ្យមសិក្សា ជាពិសេសការយកចិត្តទុកដាក់លើសុខភាពរបស់សិស្សតាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន។ ទាំងអស់នេះគឺធ្វើឡើងដើម្បីកសាងមូលធនមនុស្សជំនាន់ក្រោយដែលប្រកបដោយសុខភាពការអបរំ និងភាពធន់ ។

លោកស្រី Moon Jung Choi នាយិកានៃទីភ្នាក់ងារសហប្រតិបត្តិការអន្តរជាតិកូរ៉េ ប្រចាំប្រទេសកម្ពុជាបានមានប្រសាសន៍ថា៖

«យើងមានកិត្តិយសណាស់ ដែលបានបន្តកិច្ចសហការយ៉ាងសំខាន់មួយនេះជាមួយរាជរដ្ឋាភិបាលកម្ពុជា និងកម្មវិធីស្បៀងអាហារពិភពលោក។ ការគាំទ្រនៅក្នុងដំណាក់កាលទី២នេះ គឺបានបញ្ជាក់ជាថ្មីនូវការបេ្តជ្ញាចិត្តរបស់រដ្ឋាភិបាលនៃសាធារណរដ្ឋកូរ៉េក្នុងការគាំទ្រដល់ការអភិវឌ្ឍប្រកបដោយនិរន្តរភាព និងបរិយាបន្នសម្រាប់ប្រជាជនកម្ពុជាតាមរយៈការ​គាំទ្រប្រព័ន្ធជាតិ ដែលមានតួនាទីផ្តល់នូវការអភិវឌ្ឍន៍យូរអង្វែងក្នុងវិស័យអប់រំ អាហារូបត្ថម្ភ និងជីវភាពរស់នៅតាមទីជនបទ»។

កម្មវិធីផ្តល់អាហារតាមសាលារៀនបានអនុវត្តវិធីសាស្រ្តប្រើប្រាស់កសិផលក្នុងសហគមន៍ ដោយផ្សារភ្ជាប់ការអប់រំ និងអាហារូបត្ថម្ភជាមួយកសិកម្មក្នុងភូមិ ដោយការបញ្ជាទិញកសិផលផ្សេងៗពីក្រុមកសិករខ្នាតតូចក្នុងសហគមន៍។ នៅក្នុងប្រទេសកម្ពុជាដែលមានប្រមាណ ៥៧ភាគរយនៃចំនួនគ្រួសារសរុបពឹងផ្អែកលើវិស័យកសិកម្ម  វិធីសាស្រ្តនេះបានជួយជំរុញសេដ្ឋកិច្ចក្នុងស្រុក ពង្រឹងប្រព័ន្ធស្បៀង និងដើរតួជាសំណាញ់សុវត្ថិភាពសម្រាប់កុ្រមគ្រួសារដែលងាយរងគ្រោះ ដោយគ្រោះអាសន្នផ្សេងៗ។

កម្មវិធីនេះមិនត្រឹមតែផ្តល់អាហារដ៏មានជីវជាតិប៉ុណ្ណោះទេ ថែមទាំងបានផ្តល់នូវការពង្រឹងសមត្ថភាព ការ​ធ្វើឲ្យប្រសើរឡើងនូវហេដ្ឋារចនាសម្ព័ន្ធរូបវន្តក្នុងសាលារៀន និងការអភិវឌ្ឍន៍ស្ថាប័នទាំងថ្នាក់ជាតិ ថ្នាក់ក្រោមជាតិ រួមទាំងសាលារៀនផ្ទាល់ផងដែរ។ កិច្ចខិតខំប្រឹងប្រែងទាំងនេះត្រូវបានរៀបចំឡើងដើម្បីធានាឱ្យបានថា ក្រសួងអប់រំ យុវជន និងកីឡា នឹងមានសមត្ថភាពគ្រប់គ្រាន់ដើម្បីទទួលយកភាពជាម្ចាស់យ៉ាងពេញលេញទៅលើកម្មវិធីនេះ និងអាចធានាបាននូវគុណភាព ប្រសិទ្ធិភាព និងនិរន្តរភាពនៃកម្មវិធី។

លោកស្រី គ្លែរ កូណាន់ ជាតំណាង និងជានាយិកានៃកម្មវិធីស្បៀងអាហារពិភពលោកប្រចាំកម្ពុជាបានមានប្រសាសន៍ថា៖

«កម្មវិធីស្បៀងអាហារពិភពលោក មានមោទនភាពបំផុតក្នុងការបន្តគាំទ្រដល់ដំណើររបស់ប្រទេសកម្ពុជា ក្នុងការឆ្ពោះទៅកាន់ភាពជាម្ចាស់យ៉ាងពេញលេញនៃកម្មវិធីផ្តល់អាហារតាមសាលារៀនប្រកបដោយនិរន្តរភាព។ កិច្ចសហការជាថ្មីជាមួយទីភ្នាក់ងារសហប្រតិបត្តិការអន្តរជាតិកូរ៉េ និងក្រសួងអប់រំ យុវជន និងកីឡា ជាឧទាហរណ៍ដ៏មានអានុភាពមួយអំពីរបៀបនៃកិច្ចសហការគ្នា ដែលអាចធ្វើឱ្យប្រសើរឡើងនូវសុខុមាលភាពរបស់កុមារ ការបង្កើនគុណភាពនៃការសិក្សា និងការកសាងសហគមន៍ដែលមានភាពធន់បន្ថែមទៀត»។

ការចុះហត្ថលេខាលើគម្រោងដំណាក់កាលទី២នេះ បង្ហាញពីភាពជាដៃគូកាន់តែស៊ីជម្រៅជាងមុនរវាងក្រសួងអប់រំ យុវជន និងកីឡា ទីភ្នាក់ងារសហប្រតិបត្តិការអន្តរជាតិកូរ៉េ និងកម្មវិធីស្បៀងអាហារពិភពលោក ក្នុងការវិនិយោគលើអនាគតរបស់ប្រទេសកម្ពុជា តាមរយ:កម្មវិធីផ្ដល់អាហារតាមសាលារៀន៕