សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បន្ទាប់ពីរាជរដ្ឋាភិបាលតាមរយៈធនាគារជាតិកម្ពុជា បានសម្រេចអនុញ្ញាតឱ្យគ្រឹះស្ថានធនាគារ និងមីក្រូហិរញ្ញវត្ថុ រៀបចំឥណទានស្តង់ដារឡើងវិញ រហូតដល់ដំណាច់ឆ្នាំ២០២៥ ប្រតិបត្តិករក្នុងវិស័យហិរញ្ញវត្ថុនៅកម្ពុជា បានត្រៀមខ្លួនរួចជាស្រេចក្នុងការអនុវត្តន៍ការរៀបចំឥណទានស្តង់ដារឡើងវិញជូនដល់អតិថិជនដែលជួបការលំបាកផ្នែកហិរញ្ញវត្ថុពិតប្រាកដក្នុងអំឡុងពេលវិបត្តិសេដ្ឋកិច្ចសកលកំពុងជះផលអវិជ្ជមានដល់កម្ពុជា។
ទោះបីជាអនុញ្ញាតឱ្យមានការរៀបចំឥណទានស្តង់ដារឡើងវិញក្តី ក៏ប្រតិបត្តិករក្នុងវិស័យនេះនៅកម្ពុជា អះអាងថា ការរៀបចំរៀបឥណទានឡើងវិញនេះ នឹងត្រូវធ្វើឡើងក្រោមការពិនិត្យពិច័យច្បាស់លាស់ទៅលើលក្ខខណ្ឌ និងស្ថានភាពជាក់ស្តែងរបស់អតិថិជន ដើម្បីធ្វើយ៉ាងណាកុំឱ្យប៉ះពាល់ដល់វិស័យទាំងមូល។
លោកស្រី ម៉ារ អមរា អនុប្រធាននាយកប្របត្តិជាន់ខ្ពស់ និងជាគណៈប្រធាននាយិកាប្រតិបត្តិហិរញ្ញវត្ថុនៃធនាគារ អេស៊ីលីដា បានបញ្ជាក់ប្រាប់ថា ស្ថាប័នលោកស្រី នឹងពិនិត្យពិច័យឱ្យបានច្បាស់លាស់ទៅលើលក្ខខណ្ឌ និងស្ថានភាពរបស់អតិថិជន ដើម្បីធ្វើយ៉ាងណាឱ្យការរៀបចំឥណទានឡើងវិញ មានភាពត្រឹមត្រូវ និងច្បាស់លាស់។
លោកស្រីបានបន្តថា ការណែនាំរបស់រាជរដ្ឋាភិបាលចំពោះការរៀបចំឥណទានឡើងវិញ និងការបន្ធូរបន្ថយលក្ខខណ្ឌមួយចំនួនដល់អតិថិជនដែលកំពុងជួបការលំបាក គឺជាកិច្ចការត្រឹមត្រូវ និងទាន់ពេលវេលា ព្រោះជួយសម្រាលដល់បន្ទុករបស់អតិថិជនក្នុងអំឡុងពេលមានបញ្ហាសេដ្ឋកិច្ចសកល ដែលកំពុងបង្កផលប៉ះពាល់កម្ពុជា។
លោកស្រីបានថ្លែងថា ៖
«ខ្ញុំគិតថា ជាពេលវេលាមួយល្អត្រូវចូលរួមក្នុងការងារហ្នឹង (ការណែនាំរបស់រដ្ឋាភិបាល ចំពោះវិស័យហិរញ្ញវត្ថុ) និយាយទៅ គឺជួយឱ្យប្រជាពលរដ្ឋ គាត់អាចមានសាច់ប្រាក់គ្រាន់ក្នុងការបង្វិលទៅលើអាជីវកម្មរបស់គាត់។ ជាពេលវេលាដែលយើងត្រូវធ្វើ ហើយខ្ញុំគិតថា ជារឿងដែល្អ និងត្រឹមត្រូវបំផុត»។
លោក សុខ វឿន អនុប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា បានឱ្យដឹងថា ក្នុងការរៀបចំឥណទានឡើងវិញនេះ អតិថិជនដែលជួបផលលំបាកក្នុងបញ្ហាហិរញ្ញវត្ថុ អាចទូទាត់សងក្នុងទំហំទឹកប្រាក់តិចជាងមុន ហើយទឹកប្រាក់ដែលនៅសល់បន្ទាប់ពីការរៀបឥណទានឡើងវិញ គាត់អាចយកចាក់បញ្ចូលក្នុងប្រព័ន្ធសេដ្ឋកិច្ច តាមរយៈការប្រើប្រាស់ផ្សេងៗទៅតាមគោលដៅរបស់គាត់។
លោក សុខ វឿន បានថ្លែងប្រាប់ដូច្នេះថា ៖
«ត្រង់ចំណុចនេះ គឺមិនខុសពីឆ្នាំ២០២០ នោះទេ គឺត្រូវតែសិក្សាពីលំហូរសាច់ប្រាក់របស់អតិថិជន ចំណូលចំណាយរបស់អតិថិជន។ ប្រសិនណាបើចំណូលចំណាយរបស់អតិថិជនល្អ ហើយលទ្ធភាពសងរបស់គាត់នៅខ្ពស់ទេ គឺមិនលើកទឹកចិត្តឱ្យធ្វើការរៀបចំឥណទានឡើងវិញនោះទេ។ ករណីដែលយើងរៀបចំឥណទានឡើងវិញ មានន័យថា អតិថិជនមានបញ្ហារួចហើយ ឬអតិថិជនមិនទាន់មានបញ្ហា ប៉ុន្តែចំណូលរបស់គាត់អត់សមមូលការទូទាត់សងទៅកាន់ស្ថាប័ន។ រាល់ការស្នើសុំរៀបចំឥណទានឡើងនេះ មន្ត្រីនៅតាមគ្រឹះស្ថនធនាគារ និងហិរញ្ញវត្ថុ នឹងពិនិត្យមើលបញ្ហាទាំងអស់នេះ»។
កាលពីថ្ងៃទី២៣ ខែសីហា ឆ្នាំ២០២៤ សមាគមមីក្រូហិរញ្ញវត្ថុកម្ពុជា (CMA) និងសមាគមធនាគារនៅកម្ពុជា (ABC) បានបង្ហាញស្មារតីរួមក្នុងការសម្រួលដល់អតិថិជនជួបប្រទះស្ថានភាពលំបាកក្នុងការបង់សងឥណទាន ជាពិសេសក្នុងគោលបំណងជួយសម្រួលអតិថិជនដែលមានបញ្ហាលំហូរសាច់ប្រាក់ និងមានការយឺតយ៉ាវក្នុងការបង់សងឥណទានមកគ្រឹះស្ថានធនាគារ និងហិរញ្ញវត្ថុ។
ក្នុងចំណុចដ៏សំខាន់ជាងគេនោះ គឺគ្រឹះស្ថានធនាគារ និងហរិញ្ញវត្ថុ នឹងពិនិត្យឱ្យអស់លទ្ធភាពក្នុងការរៀបចំឥណទានទ្បើងវិញតាមសំណើរបស់អតិថិជន ដោយឈរលើគោលការណ៍បន្ធូបន្ថយប្រាក់ពិន័យ ឬឈានទៅដល់ការលុបចោលប្រាក់ពិន័យ។ ទន្ទឹមនេះការសម្របសម្រួលត្រូវធ្វើឡើងតាមស្ថានភាពជាក់ស្តែង និងលទ្ធភាពរបស់គ្រឹះស្ថានហិរញ្ញវត្ថុ ដើម្បីបន្តរក្សាស្ថិរភាព និងនិរន្តភាពរបស់ស្ថាប័នហិរញ្ញវត្ថុ ក៏ដូចជាប្រព័ន្ធធនាគារទាំងមូល។
គួររំលឹកផងដែរថា ដើម្បីជួយសម្រាលបន្ទុកដល់ប្រជាពលរដ្ឋដែលបន្តជួបការលំបាកផ្នែកហិរញ្ញវត្ថុ ក្រោយពីវិបត្តិកូវីដ-១៩ គ្រឹះស្ថានធនាគារ និងហិរញ្ញវត្ថុ ត្រូវបានអនុញ្ញាតឱ្យរៀបចំឥណទានឡើងវិញជូនអតិថិជនដែលស្ថិតក្នុងវិស័យទេសចរណ៍នៅខេត្តសៀមរាប ដោយពុំចាំបាច់ផ្លាស់ប្តូរចំណាត់ថ្នាក់ឥណទាន និងធ្វើសំវិធានធនបន្ថែម។ គិតត្រឹមខែឧសភា ឆ្នាំ២០២៤ ឥណទានរៀបចំឡើងវិញមាន ចំនួន ៥ ០៨៩ គណនី និងគិតជាទឹកប្រាក់ប្រមាណ ៦៨១,៥ ប៊ីលានរៀល (១៦៦,៥ លានដុល្លារអាមេរិក)៕
Account
Security
Favourite Content