ភ្នំពេញ ៖ ការចេះបង្កើតទម្លាប់សន្សំ និងការចាត់ចែង ទុកដាក់លុយកាក់ឱ្យបានត្រឹមត្រូវ គឺពិតជាមានសារៈសំខាន់ណាស់ដែលអាចបំពេញឱ្យបាននូវតម្រូវការចាំបាច់ក្នុងស្ថានភាពបន្ទាន់ណាមួយកើតឡើង ឬសម្រាប់គម្រោងអនាគតណាមួយ ហើយថែមទាំងអាចជួយឱ្យជៀសផុតពីបំណុលមានអត្រាការប្រាក់ខ្ពស់ ដែលភាគច្រើនគេហៅថា កម្ចីក្រៅផ្លូវការ ឬគ្មានច្បាប់ទម្លាប់ទៀតផង។

ទន្ទឹមនេះ ក៏មានសំនួរលើកឡើងផងដែរថា តើធ្វើដូចម្តេចដើម្បីបង្កើតបានជាទម្លាប់ ឬវប្បធម៌សន្សំ ?

វប្បធម៌សន្សំជាសាច់ប្រាក់ និងជាទ្រព្យសកម្មនៅប្រទេសកម្ពុជាមានតាំងពីយូរណាស់មកហើយ។ ការសន្សំប្រាក់ គឺជាការដកនូវចំណែកណាមួយនៃចំណូលប្រចាំខែ សម្រាប់ទុកដោះស្រាយពេលមានករណីបន្ទាន់ផ្សេងៗ ទុកសម្រាប់ទិញរបស់របរដែលយើងចង់បាន ឬទុកសម្រាប់គម្រោងអ្វីមួយនាពេលអនាគត។ ជាទូទៅ គេដកពី ១០ ទៅ ៣០ ភាគរយនៃប្រាក់ខែសម្រាប់ដាក់ចូលទៅក្នុងការសន្សំ ហើយដើម្បីបង្កើតបានទម្លាប់ ឬរប្បធម៌សន្សំ គេអាចចាប់ផ្តើមពីតិចៗទៅ ឬតិចទៅច្រើន។

ឧទាហរណ៍ ៖ យើងរកបានប្រាក់ចំណូល ១ លានរៀលក្នុងមួយខែ។ យើងអាចចាប់ផ្តើមសន្សំតិចៗ ដោយដកប្រាក់ពី​​ ៥ ទៅ ១០%។ នេះមានន័យថា​ យើងដកប្រាក់ ៥ ម៉ឺន ទៅ ១០ ម៉ឺនរៀល ដើម្បីទុកសន្សំ ហើយការសន្សំតិចៗយូរទៅៗ យើងនឹងបង្កើតបានទម្លាប់ រហូតក្លាយទៅវប្បធម៌សន្សំ។ មួយវិញទៀត ប្រសិនបើយើងមានប្រាក់ចំណូលកើនឡើង យើងអាចបង្កើនការសន្សំបានកាន់តែច្រើន នៅពេលដែលយើងមានទម្លាប់សន្សំ។

ជារួម ការលើកទឹកចិត្តឱ្យមានទម្លាប់សន្សំ និងវប្បធម៌សន្សំ គឺពិតជាមានសារៈសំខាន់ណាស់ ដើម្បីបំពេញតម្រូវការចាំបាច់ និងស្ថានភាពបន្ទាន់ ខណៈការបង្កើនវប្បធម៌សន្សំជាជាងការខ្ចីលុយក្រៅផ្លូវការនឹងធ្វើឱ្យការគ្រប់គ្រងហិរញ្ញវត្ថុកាន់តែមានភាពប្រសើរឡើង ហើយការបង្កើតទម្លាប់ល្អមានន័យថា សមាជិកនីមួយៗក្នុងគ្រួសារដឹងពីសារៈសំខាន់នៃការសន្សំ និងមានផែនការសន្សំរៀងៗខ្លួន ដូច្នេះក្នុងករណីចាំបាច់ណាមួយ ពួកគេមានប្រាក់បម្រុងទុករួចជាស្រេច ហើយការមានប្រាក់បម្រុងទុកនេះទៀតសោត នឹងជួយបញ្ចៀសបុគ្គលម្នាក់ ឬគ្រួសារមួយ ឱ្យចេញឆ្ងាយពីកម្ចីក្រៅផ្លូវការ ដែលអាចទាញពួកគេឱ្យធ្លាក់ចូលទៅក្នុងវិបត្តិបំណុលនៅពេល​ក្រោយ។

សម្រាប់សេដ្ឋកិច្ចជាតិវិញ គឺនៅពេលដែលគ្រួសារ ឬបុគ្គលម្នាក់ៗប្រើប្រាស់វិធីសន្សំប្រាក់ដោយការយកប្រាក់ទៅដាក់នៅធនាគារ និងគ្រឹះស្ថានមីក្រូហិរញ្ញវត្ថុទទួលបា្រក់បញ្ញើ។ វិធីសន្សំបែបនេះ អ្នកសន្សំខ្លួនឯងក៏ទទួលបានការប្រាក់ត្រឡប់មកវិញ រីឯសេដ្ឋកិច្ចជាតិក៏មានចរន្ដល្អ។ សេដ្ឋកិច្ចមានចរន្តល្អ ព្រោះថាធនាគារ និងគឹ្រះសា្ថនមីក្រូហិរញ្ញវត្ថុទទួលបានប្រាក់បញ្ញើមានប្រាក់បម្រុងទុកច្រើនសម្រាប់ផ្ដល់ជាឥណទានដល់ប្រជាជន ឬម្ចាស់អាជីវកម្មក្នុងស្រុក ដែលមានបំណងចង់ពង្រីកអាជីវកម្មរបស់ខ្លួនជាដើម។

ដូច្នេះហើយ លោកអ្នកគួរឈ្វេងយល់ពីរបៀប និងប្រភេទក្នុងការសន្សំ ពិសេសការសន្សំប្រាក់នៅគ្រឹះស្ថានធនាគារ និងមីក្រូហិរញ្ញវត្ថុ ដែលទទួលប្រាក់បញ្ញើ មានសុវត្ថិភាព ហើយថែមទាំងទទួលបានការប្រាក់ទៀតផង។

ដើម្បីឱ្យមានភាពងាយស្រួល យើងសូមណែនាំថា អ្នកអាចបែងចែកការសន្សំរបស់អ្នកជា ៣ធំៗ ដូចជា ៖ ការសន្សំសម្រាប់ពេលមានអាសន្ន ការសន្សំរយៈពេលខ្លីឬមធ្យម និងការសន្សំរយៈពេលវែង។

១. ការសន្សំសម្រាប់ពេលមានអាសន្ន គឺរឿងចាំបាច់ ព្រោះវាជួយឱ្យអ្នកទប់ទាល់នឹងហានិភ័យ និងជៀសផុតពីបំណុលដែលមានអត្រាការប្រាក់ខ្ពស់។ ចំពោះការសន្សំនេះ អ្នកអាចទុកលុយសន្សំខ្លះនៅក្នុងផ្ទះសម្រាប់ពេលបន្ទាន់ខ្លាំង ហើយអ្នកអាចពិចារណាប្រើប្រាស់សេវាធានារ៉ាប់រងសុខភាព គ្រោះថ្នាក់ ឬជីវិតសម្រាប់គ្រួសារ។

២. ការសន្សំរយៈពេលខ្លី ឬមធ្យម អាចជាការសន្សំសម្រាប់ការរៀបការ ការដើរលេងកម្សាន្ត ឬការទិញរបស់របរផ្ទាល់ខ្លួនជាដើម។ អ្នកអាចដាក់ប្រាក់សន្សំនេះក្នុងគណនីសន្សំផ្ទាល់ខ្លួននៅគ្រឹះស្ថានធនាគារ និងមីក្រូហិរញ្ញវត្ថុ ដែលទទួលប្រាក់បញ្ញើ ដាច់ដោយឡែកពីគណនីអាជីវកម្ម។

៣. ការសន្សំរយៈពេលវែង អាចជាការសន្សំដើម្បីទិញផ្ទះ ការសិក្សារបស់កូន ឬប្រាក់សម្រាប់ចូលនិវត្តន៍ជាដើម។ ដើម្បីទទួលការប្រាក់ខ្ពស់ អ្នកអាចបើកគណនីសន្សំរយៈពេលវែងនៅគ្រឹះស្ថានធានាគារ ឬមីក្រូហិរញ្ញវត្ថុ ដែលទទួលប្រាក់បញ្ញើ។

ជាមួយនឹងគម្រោងសន្សំច្បាស់លាស់ អ្នកអាចចាយវាយដោយរីករាយគ្មានក្តីកង្វល់ ឬភ័យព្រួយ ព្រោះអ្នកបានប្រាកដហើយថា អ្នកបានរៀបចំអនាគតរបស់អ្នក ឬគ្រួសាររបស់អ្នករួចរាល់ហើយ៕