សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្លូវកក្រវាត់ក្រុងទី៣ បានសម្ពោធដាក់ឱ្យប្រើប្រាស់ជាផ្លូវការអស់រយៈពេលជាងកន្លះឆ្នាំមកហើយក្រោមអធិបតីភាពសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ហើយផ្លូវនេះបាន និងកំពុងផ្ដល់ជាប្រយោជន៍យ៉ាងច្រើនដល់ការដឹកជញ្ជូន និងធ្វើដំណើររបស់ពលរដ្ឋ ។ អ្វីដែលពិសេសជាងនេះ ចាប់តាំងពីផ្លូវនេះបានដាក់ឱ្យប្រើប្រាស់ និងមានចរាចរណ៍មមាញឹកមក គេឃើញថា សកម្មភាព និងការអភិវឌ្ឍនៅសំណង់តូចធំនៅតាមបណ្ដោយផ្លូវនេះក៏ចាប់ផ្ដើមជាបន្តបន្ទាប់ ជាមួយនឹងការរំពឹងថា តម្រូវការប្រើប្រាស់ដីធ្លីកាន់តែមានកំណើនខ្ពស់ ។
បើយើងធ្វើដំណើរតាមកំណាត់ផ្លូវនេះ ចាប់ពីស្ពានអាកាសជម្ពូវ័ន្ត ផ្លូវជាតិលេខ៤ ទៅដល់ផ្លូវជាតិលេខ៣ យើងនឹងឃើញមានការត្រៀមដីសម្រាប់អភិវឌ្ឍន៍សំណង់នានានៅតាមបណ្ដោយផ្លូវក្រវាត់ក្រុងទី៣នេះច្រើន ហើយក្នុងនោះក៏ឃើញមានអាជីវកម្មជាច្រើន ដូចជាភោជនីយដ្ឋាន អាហារដ្ឋាន ឃ្លាំងស្តុកទំនិញ និងអាជីវកម្មមួយចំនួនទៀតចាប់ផ្ដើមលេចរូបរាងជាបន្តបន្ទាប់ ហើយក្រៅពីនោះក៏ឃើញថា ដីមួយចំនួនត្រូវបានត្រៀមទុកសម្រាប់អភិវឌ្ឍន៍ជាឃ្លាំង ជាលំនៅឋាន និងជាបង្កើតអាជីវកម្មផ្សេងៗទៀត ។
អ្នកជំនាញអចលនទ្រព្យជាច្រើនបានមើលឃើញថា សម្រាប់ដីធ្លីតាមបណ្ដោយផ្លូវក្រវាត់ក្រុងទី៣ ដែលរាប់ចាប់ពីផ្លូវឈ្នះឈ្នះ ឬពលរដ្ឋនិយមហៅថា ផ្លូវកប់ស្រូវ ទៅភ្ជាប់ជាមួយផ្លូវជាតិលេខ៣ គឺនឹងមានសក្ដានុពលខ្ពស់ ហើយជាតំបន់ដែលមានការអារម្មណ៍ខ្លាំងពីសំណាក់អ្នកវិនិយោគ និងអ្នកអភិវឌ្ឍន៍ ។
លោកប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ថា ៖
«តំបន់តាមបណ្ដោយផ្លូវក្រវាត់ក្រុង យើងឃើញថាតំបន់ប៉ែកខាងលិចឈៀងខាងត្បូង គឺជាតំបន់ដែលមានសក្ដានុពលសម្រាប់អភិវឌ្ឍន៍ ដូចជាសាងសង់ឃ្លាំងសម្រាប់ជួល ព្រោះទីតាំងនោះសំបូរទៅដោយរោងចក្រសហគ្រាស ដែលមានតម្រូវការឃ្លាំងសម្រាប់ស្តុកទំនិញនានាមុននិងក្រោយផលិត»។
លោកបន្តថា ដីធ្លីនៅតំបន់នេះនឹងមានតម្រូវការខ្ពស់សម្រាប់អភិវឌ្ឍន៍ ហើយសម្រាប់តំបន់ប៉ែកខាងត្បូង និងខាងកើតវិញ វាជាតំបន់ដែលនឹងមានតម្រូវការលើដីលំនៅឋាន ជាក់ស្ដែងដូចបានឃើញស្រាប់នៅប៉ែកខាងត្បូងនិងខាងកើត កំពុងមានការអភិវឌ្ឍជាបន្តបន្ទាប់លើលំនៅឋានដោយមានទាំងលំនៅឋានផ្ដោតលើអ្នកមានចំណូលមធ្យម និងអ្នកមធ្យមឡើង ។
ជាកត់សម្គាល់គេមើលឃើញថា តំបន់ណាដែលមានការអភិវឌ្ឍហេដ្ឋារចនាសម្ព័ន្ធ តំបន់នោះទទួលបានការវិនិយោគ និងអភិវឌ្ឍន៍ ហើយបានធ្វើឱ្យតំបន់ដែលស្ងប់ស្ងាត់ក្លាយជាតំបន់អ៊ូរអរ និងទាក់ទាញពលរដ្ឋទៅកាន់តំបន់នោះកាន់តែច្រើនឡើងៗ ៕
Account
Security
Favourite Content