សមាជិកសភាអាមេរិក ៥០នាក់ ទាមទារឱ្យលោក Trump បង្ហាញរបាយការណ៍ចំណាយពិតទៅលើសង្គ្រាមប្រឆាំងនឹងអ៊ីរ៉ង់

បរទេស ៖ សមាជិកសភាតំណាងរាស្ត្រអាមេរិក កំពុងទាមទារឱ្យរដ្ឋបាល លោក Donald Trump ផ្តល់ទិន្នន័យលម្អិតអំពីផលប៉ះពាល់ផ្នែកហិរញ្ញវត្ថុ និងជីវិតមនុស្សក្រោមជម្លោះយោធាជាមួយនឹងប្រទេសអ៊ីរ៉ង់។

យោងតាមការចេញផ្សាយដោយកាសែតប៊ុលហ្គារី Novinata បានឲ្យដឹងថា តំណាងរាស្ត្របក្សប្រជាធិបតេយ្យជិត ៥០ នាក់ នៅក្នុងសភាតំណាងរាស្ត្រអាមេរិក បានផ្ញើលិខិតមួយច្បាប់ជូនចំពោះប្រធានាធិបតី Trump ព្រមទាំងរដ្ឋមន្ត្រីក្រសួងសង្គ្រាម លោក Pete Hegsett ដើម្បីស្នើសុំព័ត៌មានលម្អិតបន្ថែមអំពីការចំណាយទៅលើសកម្មភាពយោធាអាមេរិកប្រឆាំងទៅនឹងអ៊ីរ៉ង់។ នៅក្នុងលិខិតដែលត្រូវបានផ្តល់ជូន NBC News សមាជិកសភាទាំងនោះបានចង្អុលបង្ហាញថា ប្រតិបត្តិការដែលដើមឡើយត្រូវបានបង្ហាញថានឹងមានរយៈពេលពីរ សប្តាហ៍នោះ ពេលនេះបានអូសបន្លាយក្លាយទៅជាសង្គ្រាមទ្រង់ទ្រាយធំដែលមានរយៈពេលជាង ១៥០ ថ្ងៃទៅវិញ ខណៈដែលក្រុមអ្នកប្រជាធិបតេយ្យបានប៉ាន់ស្មាន និងអះអាងថា ចំណាយជាក់ស្តែងគឺបានកើនឡើងលើសពី ៣៧ ពាន់លានដុល្លាររួចទៅហើយ ហើយយោធិនអាមេរិកចំនួន ១៨ រូបបានពលីជីវិតចាប់តាំងពីជម្លោះនេះបានចាប់ផ្តើម។ លិខិតនេះក៏បានគូសបញ្ជាក់អំពីផលប៉ះពាល់សេដ្ឋកិច្ចលើពលរដ្ឋអាមេរិកផងដែរ។ ជាក់ស្ដែង តម្លៃទំនិញនៅក្នុងប្រទេសបានកើនឡើងយ៉ាងខ្លាំង ហើយបន្ទុកហិរញ្ញវត្ថុនៃសង្គ្រាមដែលកំពុងបន្តនេះ ក៏កំពុងតែជះឥទ្ធិពលកាន់តែខ្លាំងឡើងលើគ្រួសារ និងពលរដ្ឋអាមេរិក។

តាមរយៈការស្នើសុំទិន្នន័យចំណាយនេះ តំណាងរាស្ត្របានដាស់តឿនឱ្យរដ្ឋបាល លោក Trump ផ្តល់នូវតម្លាភាពកាន់តែធំអំពីខ្តង់ចំណាយពិតប្រាកដនៃជម្លោះនេះ និងផលវិបាករបស់វាចំពោះថវិកាជាតិ និងសង្គម។ គួរឲ្យដឹងដែរថា ក្នុងអំឡុងពេលបន្តភ្លើងសង្គ្រាម មន្ទីរប៉ង់តាហ្គោន ក៏កំពុងព្យាយាមស្វែងរកការអនុម័តនូវមូលនិធិបន្ថែមរហូតដល់ទៅ ២០០ពាន់លានដុល្លារទៀតនៅក្នុងគម្រោងថវិកាយោធាថ្មី ដើម្បីបំពេញឃ្លាំងស្តុក និងទ្រទ្រង់ប្រតិបត្តិការយោធាបន្ថែមទៀត៕

AMS ECONOMY