ភ្នំពេញ ៖ កន្លងមកគេធ្លាប់តែឮព័ត៌មានក្រៅផ្លូវការថា ការទទួលទានត្រីទីឡាប់យ៉ាអាចធ្វើបង្កឱ្យមានបញ្ហា ឬប៉ះពាល់ដល់សុខភាព ប៉ុន្តែមិនដូច្នោះទេ បច្ចុប្បន្ន ត្រីទីឡាប់យ៉ាមានការគាំទ្រខ្លាំងនៅលើទីផ្សារ ទាំងផ្សារបែបប្រពៃណីនៅតាមមូលដ្ឋាន តាមទីផ្សារទំនើប ភោជនីយដ្ឋាន និងសណ្ឋាគារលំដាប់ខ្ពស់ ជាពិសេសគេអាចច្នៃជាអាហារដែលទទួលទានឆៅបានដូចត្រីសាលម៉ុនដែរ ខណៈដែលតម្លៃក៏ទទួលបានខ្ពស់។

លោក សាំង​ បូរ៉ា ជំនួយការនាយកប្រតិបត្តិនៃក្រុមហ៊ុន ខេមបូឌា ហ្វេ្រសហ្វាម មានទីតាំងនៅក្នុងភូមិថ្នល់បត់ ឃុំកោះចិន ស្រុកពញាឮ ខេត្តកណ្តាល បានឱ្យដឹងថា កន្លងមកលោកធ្លាប់បានឮព័ត៌មានក្រៅផ្លូវការថា ការទទួលទានត្រីទីឡាប់យ៉ាអាចធ្វើឱ្យមានបញ្ហា ឬប៉ះពាល់ដល់សុខភាព ប៉ុន្តែតាមពិតមិនដូច្នោះទេ ប្រសិនបើការចិញ្ចឹមត្រូវបានធ្វើឡើងស្របតាមលក្ខណៈបច្ចេកទេស និងស្តង់ដារអនាម័យត្រឹមត្រូវ ត្រីទីឡាប់យ៉ាគេអាចយកទៅបង្កក ហើយទទួលទានសាច់ឆៅបានដូចត្រីសាលម៉ុនផងដែរ។

លោកថា ៖ ដោយសារការចិញ្ចឹមត្រូវបានធ្វើឡើងស្របតាមស្តង់ដារបច្ចេកវិទ្យាជប៉ុន មានអនាម័យខ្ពស់ និងទទួលបានការបណ្តុះបណ្តាលជំនាញបច្ចេកទេសពីក្រសួងកសិកម្ម អង្គការជាតិ និងអន្តរ ជាពិសេសមានការពិនិត្យគុណភាពសាច់ទៀងទាត់ពីវិទ្យាស្ថានប៉ាស័្ទរកម្ពុជា រៀងរាល់៦ខែម្តង ធ្វើឱ្យត្រីទីឡាប់យ៉ា មានការគាំទ្រច្រើន ជាពិសេសគាំទ្រពីបណ្តាភោជនីយដ្ឋានខ្មែរ-ជប៉ុន ផ្សារទំនើបក្នុងក្រុងភ្នំពេញ រួមមានផ្សារទំនើបស្នាដៃម៉ែ និងផ្សារទំនើបអ៊ីអនជាដើម។ លើសពីនេះក៏មានដៃគូក្រៅប្រទេសចូលមកសហការនាំចេញក្នុងបរិមាណច្រើន ដូចជា ប្រទេសចិន កម្ម៉ង់៦០តោនក្នុងមួយឆ្នាំ ប៉ុន្តែខាងក្រុមហ៊ុននៅមិនទាន់មានលទ្ធភាពផ្គត់ផ្គង់នៅឡើយ ហើយកំពុងសហការជាមួយកសិករពង្រីកការចិញ្ចឹមបន្ថែមទៀត។

លោក ងន់ សុខលាភ នាយកប្រតិបត្តិអង្គការ តុកែញញឹមកម្ពុជា( Smiling Gecko) បានមានប្រសាសន៍ថា តាមការពិត ត្រីទីឡាប់យ៉ា មានសារធាតុអាស៊ីត ខ្លាញ់អូមេហ្គា៣ និងអូមេហ្គា៦ មានប្រយោជន៍ក្នុងការជួយទ្រទ្រង់សុខភាពអ្នកទទួលទានបានល្អ ជាពិសេសអាចជួយកាត់បន្ថយជំងឺបេះដូងកម្រិតខ្ពស់ទៀតផង។

លោកបានបញ្ជាក់ថា ៖ «ត្រីទីឡាប់យ៉ា ពិតជាអាចជួយទ្រទ្រង់សុខភាពបានប្រសើរ ប្រសិនបើយើងចិញ្ចឹមស្របទៅតាមលក្ខណៈស្តង់ដារបច្ចេកទេសត្រឹមត្រូវ​ មានការត្រួតពិនិត្យគុណភាពទឹក ពិនិត្យគុណភាពចំណីមុនពេលដាក់ឱ្យត្រីស៊ី ពិសេសត្រូវពិនិត្យគុណភាពសាច់ត្រីមុនបញ្ចេញលក់ទៅកាន់ទីផ្សារ ជៀសវាងកើតមានបាក់តេរីផ្សេងៗ»។

ដោយសារការចិញ្ចឹមមានលក្ខណៈបច្ចេកទេសស្របតាមស្តង់ដារ បច្ចុប្បន្ននេះ ត្រីទីឡាប់យ៉ា មានការគាំទ្រខ្លាំងនៅតាមបណ្តាផ្សារនានា ជាពិសេសផ្សារទំនើប ភោជនីយដ្ឋានខ្មែរ-ជប៉ុន ក៏ដូចជាបណ្តាសណ្ឋាគារមួយចំនួនទៀតនៅក្នុងក្រុងភ្នំពេញ។ ជាមួយគ្នានេះ ស្របតាមកំណើននៃការគាំទ្រនាពេលបច្ចុប្បន្ន អង្គការ តុកែញញឹមកម្ពុជា( Smiling Gecko) បានសហការជាមួយកសិករចិញ្ចឹមត្រីប្រមាណ២០គ្រួសារ មានទីតាំងនៅជិតកសិដ្ឋានរបស់អង្គការផ្ទាល់ ស្ថិតក្នុងភូមិស្រែសារ ឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង ដោយសហការផ្តល់ទាំងពូជ ជួយ ផ្តល់ទាំងបច្ចេកទេសចិញ្ចឹម និងជួយរកទីផ្សារលក់ជូនពួកគាត់ថែមទៀត។

លោកបញ្ជាក់ថា ៖ «ដោយសារមានការជួយជ្រោមជ្រែងផ្តល់បច្ចេកទេសពីក្រសួងកសិកម្ម ពីអង្គការជាតិ និងអន្តរជាតិ បច្ចុប្បន្ននេះ កសិដ្ឋាន ទទួលបានការគាំទ្រពីដៃគូបរទេសច្រើន ដោយពួកគេកំពុងរៀបចំបែបបទក្នុងការនាំចេញសាច់ត្រីទីឡាប់យ៉ាទៅលក់នៅទីផ្សារប្រទេសជប៉ុន ឥណ្ឌា និងទីផ្សារអឺរ៉ុបផងដែរ»។

លោក​ ថាយ​ សុមុនី​ ប្រធាន​នាយកដ្ឋាន​អភិវឌ្ឍន៍​វារីវប្បកម្មនៃរដ្ឋបាលជលផល​ ក្រសួងកសិកម្ម​ រុក្ខាប្រមាញ់ ​និងនេសាទ បានមានប្រសាសន៍ថា កម្ពុជាមានសមត្ថភាពបង្កាត់ពូជត្រីទីឡាប់យ៉ាបានជោគជ័យដូចប្រទេសជិតខាងដែរ រួមមានដូចជាក្រុមហ៊ុន Cambodia Fresh Farm, Smiling Gecko Cambodia, នាយកដ្ឋានជលផល និស្សិតសាកលវិទ្យាល័យកសិកម្ម ពលរដ្ឋនៅស្ទឹងសង្កែ និងស្រុកឯកភ្នំ ខេត្តបាត់ដំបងជាដើម ដែលជាឱកាសថ្មីសម្រាប់កសិករមានបំណងចង់ចិញ្ចឹមត្រីទីឡាប់យ៉ា ដោយមិនចាំបាច់ទិញកូនត្រីទីឡាប់យ៉ាពីប្រទេសជិតខាងដូចពេលមុនទៀតនោះឡើយ ជាពិសេស ក្រុមហ៊ុនមានផ្តល់ពូជ ផ្តល់បច្ចេកទេសចិញ្ចឹម និងជួយរកទីផ្សារឱ្យកសិករថែមទៀតផង។

លោកបានបញ្ជាក់ថា ៖ «ត្រីទីឡាប់យ៉ា ផ្តល់ប្រូតេអ៊ីនខ្ពស់សម្រាប់ទ្រទ្រង់រាងកាយ និងមានរសជាតិឆ្ងាញ់ ព្រមទាំងអាចធ្វើម្ហូបបានច្រើនមុខ ដូចជា ស្ងោរ ចៀន ដុតអំបឹល និងចំហុយមីសួរជាដើម។ល។ ចំណែកនៅតាមភោជនីយដ្ឋានលំដាប់ខ្ពស់ គេច្នៃត្រីទីឡាប់យ៉ាធ្វើម្ហូបអាចលក់បានតម្លៃខ្ពស់រហូតដល់២៥ដុល្លារក្នុងមួយក្បាល។ ត្រីទីឡាប់យ៉ា មិនមានផលប៉ះពាល់ដល់សុខភាពដូចការលេចឮព័ត៌មានក្រៅផ្លូវការនាពេលកន្លងមកនោះទេ ហើយប្រជាពលរដ្ឋគួរពិចារណាចិញ្ចឹមត្រីទីឡាប់យ៉ាឱ្យបានច្រើន ជាជាងចិញ្ចឹមត្រីឆ្តោ ដោយសារត្រីទីឡាប់យ៉ា​ វាស៊ីចំណីតិចជាងត្រីឆ្តោ ចិញ្ចឹមត្រឹមរយៈពេលខ្លី ៤-៥ខែ អាចប្រមូលផលលក់បាន ចំណែកត្រីរ៉ស់ ឬត្រីឆ្តោ ស៊ីចំណីច្រើន ហើយចំណាយពេលយូរក្នុងការចិញ្ចឹមទៀតផង៕ វិន ឈុនហ៊ាត