កណ្តាល ៖ ការប្រមូលផលត្រីទឹកសាបនៅរដូវត្រីបន្លាស់ទីចេញពីបឹងទន្លេសាបចុងឆ្នាំ២០២៥នេះ អាចនឹងមានការកើនឡើងលើសឆ្នាំកន្លងទៅប្រមាណជា១០ភាគរយ។ នេះបើតាមការលើកឡើងរបស់ ឯកឧត្តម រដ្ឋលេខាធិការ ហាស់ សារ៉េត ក្នុងឱកាសតំណាងដ៏ខ្ពស់ខ្ពស់ពីឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អមដំណើរដោយឯកឧត្តម គួច ចំរើន អភិបាលខេត្តកណ្តាល អង្គការស្បៀងអាហារ និងកសិកម្ម (FAO) តំណាងមន្ត្រីជលផល និងក្រុមការងារក្រសួងកសិកម្ម បានចុះសង្កេតការប្រមូលផលត្រីនៅដាយត្រីលេខ១៥ ស្ថិតនៅឃុំកោះចិន ស្រុកពញាឮ ខេត្តកណ្តាល កាលពីថ្ងៃចុងសប្ដាហ៍កន្លងទៅនេះ។

ឯកឧត្តម ហាស់ សារ៉េត រដ្ឋលេខាធិការ បានគូសបញ្ជាក់ថា ផលត្រីឆ្នាំនេះមានកំណើនក្នុងរង្វង់១០ភាគរយបើប្រៀបធៀបឆ្នាំ២០២៤។ ផលត្រីកើននេះ​ដោយសារការអនុវត្តបានល្អលើការងារសំខាន់ៗជាអាទិ៍៖

ក្រោមការដឹកនាំរបស់រាជរដ្ឋាភិបាលក្នុងអាណត្តិទី៧ ដែលមានក្រសួងកសិកម្ម រុក្ខាប្រមាញ់ និងនេសាទ ជាសេនាធិការ តាមរយៈយន្តការអន្តរក្រសួង និងមានការចូលរួមពីអាជ្ញាធរដែនដីគ្រប់លំដាប់ថ្នាក់ ពិសេសនៅតាមបណ្តាខេត្តនៃបឹងទន្លេសាប ក្រុមការងារគ្រប់គ្រងបានល្អធនធានធម្មជាតិ បឹងទន្លេសាប ទប់ស្កាត់ការទន្ទ្រានដី និងព្រៃលិចទឹក ដែលជាជម្រកត្រីចម្រុះពងកូន។

ជាមួយគ្នានេះ ប្រជាពលរដ្ឋទូទៅ ជាពិសេសប្រជានេសាទ និងសហគមន៍មានការយល់ដឹងខ្ពស់ចូលរួមចំណែកក្នុងការគ្រប់គ្រងអភិរក្សធនធានជលផលបានល្អប្រសើរ ក្នុងឆ្នាំនេះក្រោយពីប្រជានេសាទ ធ្វើការនេសាទតាមបឹង តាមដងទន្លេពេលដែលពួកគាត់ជួបប្រភេទត្រីកម្រ ត្រីដែលជិតផុតពូជ ដែលពីមុនមិនមានវត្តមាន ដូចជា ត្រីគល់រាំង ត្រីរាជ ត្រីត្រសក់ គាត់តែងតែប្រលែងទៅវិញ ហើយឯកឧត្តមរដ្ឋមន្ត្រីបានឱ្យមន្ត្រីជំនាញធ្វើលិខិតសរសើរ និងអរគុណដល់ប្រជានេសាទទាំងនោះផងដែរ។ ក្រៅពីនេះ ក្រុមការងារបានអនុវត្តវិធានការច្បាប់ តាមរយៈការប្រើប្រាស់កម្លាំងសរុប មធ្យោបាយ និងវិធានការសរុបក្នុងការទប់ស្កាត់បទល្មើសជលផល ដែលក្នុងនោះមានកងកម្លាំងប្រដាប់អាវុធ ដែលជាកម្លាំងស្នួលដ៏មានប្រសិទ្ធភាព ដើម្បីទប់ស្កាត់ល្មើសច្បាប់ទាំងឡាយដែលនៅតែបន្តកើតមាន។

ឯកឧត្តមបានបញ្ជាក់ថា ៖

«ការកើនឡើងផ្អែកលើកត្តា ៣យ៉ាង ក្នុងនោះរួមមានការគ្រប់គ្រងបានល្អ ជាពិសេសទប់ស្កាត់ការទន្រ្ទានដីព្រៃលិចទឹក ដែលជាជម្រកត្រីពងកូនតាមរយៈយន្តការអន្តរក្រសួង ក៍ដូចជាការចូលរួមពីអាជ្ញាធរដែនដីគ្រប់លំដាប់ថ្នាក់។ កត្តាទី២ ដោយសារប្រជាពលរដ្ឋ ក៏ដូចជាប្រជាសហគមន៍ មានការយល់ដឹងកាន់តែច្រើនឡើងៗ ក្នុងការចូលរួមអភិរក្សធនធានជលផល ពិសេសពេលនេសាទបានត្រីកម្រ តែងព្រលែងចូលក្នុងទន្លេវិញ និងទី៣ គឺប្រជានេសាទបានអនុវត្តវិធីសាស្ត្រនេសាទត្រីស្របតាមបច្ចេកទេសនៃច្បាប់បានកំណត់»។

លោកស្រី ជា សីលា អ្នកគ្រប់គ្រងគម្រោងអច្ឆរិយភាពនៃទន្លេមេគង្គបានមានប្រសាសន៍ថា ក្នុងអំឡុងពេល ២ ទៅ ៣ឆ្នាំចុងក្រោយនេះ ផលត្រីមានការកើនឡើងគួរកត់សម្គាល់ប្រាកដមែន ពិសេសត្រីកម្រដែលជិតផុតពូជ ឬបាត់វត្តមានពីទេន្លេមេគង្គ ដែលត្រូវបានប្រទះឃើញឡើងវិញជាបន្តបន្ទាប់។

លោកស្រីបានអះអាងថា ៖

«គិតត្រឹមខែវិច្ឆិកា ឆ្នាំ២០២៥ មកទល់បច្ចុប្បន្ន ក្រុមការងារនៃគម្រោងបានចុះអន្តរាគមន៍ជួយសង្គ្រោះត្រីធំៗជាច្រើនក្បាល ពោលគឺមានចំនួនសរុប ៤៩ក្បាល ដោយក្នុងនោះមានដូចជា ត្រីរាជ ដែលយើងហៅថា ស្តេចត្រី មានប្រវែង ៣ម៉ែត្រ និងទម្ងន់៣០០គីឡូក្រាម» ។

លោកស្រី ជា សីលា បានបញ្ជាក់ផងដែរថា ចំពោះតម្លៃត្រីចម្រុះសម្រាប់យកទៅធ្វើជាផ្អក ប្រហុក ឬឆ្អើរ អាចមានតម្លៃចាប់ពី ១០០០រៀល ទៅ ១៥០០រៀល ក្នុង១គីឡូក្រាម ខណៈដែលតម្លៃនេះខ្ពស់ជាងឆ្នាំ២០២៤ ដែលត្រីមានតម្លៃត្រឹមតែចន្លោះពី ៨០០រៀល ទៅ ៩០០រៀលប៉ុណ្ណោះក្នុង១គីឡូក្រាម។

លោក ថៃ បុរស អ្នកប្រមូលផលនេសាទនៅដៃឡូតិ៍នេសាទ ឃុំកោះចិន ស្រុកពញាឮ ខេត្តកណ្តាល បានលើកឡើងដែរថា នៅរយៈពេលប៉ុន្មានថ្ងៃនេះ (អំឡុងសប្ដាហ៍ទី៤ ខែធ្នូ) ត្រីចាប់ផ្តើមត្រូវខ្លាំង ដែលអាចប្រមូលផលបានច្រើនជាឆ្នាំមុនប្រាកដមែន ដោយត្រីភាគច្រើនមានដូចជា ត្រីរៀល ត្រីស្លឹកឬស្សី សម្រាប់ធ្វើផ្អក ប្រហុក និងយកទៅឆ្អើរ ហើយក៏សម្បូរប្រភេទត្រីធំៗដែរ ដូចជា ត្រីក្អែក ត្រីព្រលូង ជាដើម។

លោកបញ្ជាក់ថា ៖

«នៅក្នុងឆ្នាំនេះ ទិន្នផលត្រីបានច្រើន ហើយកមានលាយឡំជាមួយត្រីកម្រទៀត ខ្ញុំសប្បាយចិត្ត ហើយបងប្អូនប្រជានេសាទដទៃទៀតក៏សប្បាយដូចគ្នា។ មិនត្រឹមតែប៉ុណ្ណោះ ចំពោះប្រជាពលរដ្ឋដែលជាអ្នកទិញយកទៅច្នៃធ្វើជាប្រហុក ផ្អក ក៏រីករាយ ហើយថែមទាំងអាចឱ្យកម្មករនេសាទមួយចំនួនទទួលបានកម្រៃផងដែរ»។

សូមរំលឹកដែរថា យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ កាលពីពេលកន្លងទៅបានឱ្យដឹងថា ការប្រមូលផលត្រីទឹកសាបឆ្នាំ២០២៥ មានចំនួនជាង ៥០ម៉ឺនតោន កើនឡើងជិត ៤ម៉ឺនតោនធៀបនឹងឆ្នាំ២០២៤៕