សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រព័ន្ធធនាគារនៅកម្ពុជានៅតែទទួលបានជំនឿទុកចិត្តពីវិនិយោគិន និងសាធារណជន និងបានបន្តពង្រីកវិសាលភាព ក្រោយវិបត្តិកូវីដ១៩ ហើយនៅតែបន្តរក្សាបានភាពធន់និងរឹងមាំ ដែលបានដើរតួនាទីយ៉ាងសកម្មក្នុងការលើកស្ទួយសកម្មភាពសេដ្ឋកិច្ចនិងរក្សាស្ថិរភាពហិរញ្ញវត្ថុ។ ជាក់ស្តែង គិតត្រឹមឆមាសទី១ ឆ្នាំ២០២៣ គ្រឹះស្ថានហិរញ្ញវត្ថុទទួលប្រាក់បញ្ញើមានចំនួន ៦៤ ក្នុងធនាគារពាណិជ្ជចំនួន ៥៩ និងគ្រឹះស្ថានមីក្រូហិរញ្ញវត្ថុចំនួន ៥។ នេះបើយោតាមរបាយការណ៍ប្រចាំឆមាសទី១ និងទិសដៅការងារឆមាសទី២ ឆ្នាំ២០២៣ របស់ធនាគារជាតិនៃកម្ពុជា។
គ្រឹះស្ថានហិរញ្ញវត្ថុមិនទទួលប្រាក់បញ្ញើមានចំនួន ៣ ១៥០ ក្នុងនោះ ធនាគារឯកទេសចំនួន ៩ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើចំនួន ៨២ គ្រឹះស្ថានភតិសន្យាហិរញ្ញវត្ថុចំនួន ១៧ គ្រឹះស្ថានផ្តល់សេវាទូទាត់សងប្រាក់ចំនួន ៣៥ គឹ្រះស្ថានឥណទានជនបទចំនួន ១០៥ អ្នកដំណើរការតតិយភាគីចំនួន ៦ អាជីវកម្មប្តូរប្រាក់ចំនួន ២ ៨៩០ និងការិយាល័យតំណាងធនាគារបរទេសចំនួន ៦។
សម្រាប់វិស័យធនាគារ ឥណទានត្រូវបានផ្តល់ទៅកាន់វិស័យសំខាន់ៗក្នុងសេដ្ឋកិច្ច ដោយមានកំណើន ១១,៩% ថមថយធៀបនឹងគ្រាដូចគ្នាឆ្នាំមុន (២៥%)។ វិស័យដែលមានកំណើនខ្ពស់ជាងគេ រួមមាន ៖ វិស័យកម្មន្តសាល (២២,២%) ការទិញផ្ទះជាកម្មសិទ្ធផ្ទាល់ខ្លួន (១៧,៥%) ការជួញដូរអចលនទ្រព្យ (១៣,៦%) កសិកម្ម (១៣,៤%)។ល។
សម្រាប់វិស័យមីក្រូហិរញ្ញវត្ថុ វិស័យនេះបន្តផ្តល់ហិរញ្ញប្បទានដល់សហគ្រាសធុនតូចមីក្រូ តូច និងមធ្យម ព្រមទាំងប្រជាពលរដ្ឋនៅតាមទីជនបទ ដោយឥណទានបានកើនឡើង ១៤,៨% ថមថយបន្តិចធៀបនឹងគ្រាដូចគ្នាឆ្នាំមុន (១៦,២%)។ វិស័យដែលមានកំណើនខ្ពស់ជាងគេរួមមាន ៖ កម្មន្តសាល (៣០,៨%) អង្គភាពគ្រួសារ (១៨,៤%) ពាណិជ្ជកម្មនិងជំនួញ (១៥%) សំណង់ (១៤%) កសិកម្ម (១៣,២%) ។ល។
ក្នុងឱកាសថ្លែងសុន្ទរកថាបើកសន្និបាតបូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០២៣ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា មានប្រសាសន៍ថា ក្នងបរិការណ៍ដែលសេដ្ឋកិច្ចកម្ពុជាកំពុងទទួលរងឥទ្ធិពលពីការថមថយនៃសកម្មភាពសេដ្ឋកិច្ចពិភពលោក ធនាគារជាតិនៃកម្ពុជាបានបន្តរក្សាស្ថិរភាពថ្លៃនិងស្ថិរភាពហិរញ្ញវត្ថុ អភិវឌ្ឍប្រព័ន្ធធនាគារនិងប្រព័ន្ធទូទាត់ ដែលបានជួយជ្រោងកំណើនសេដ្ឋកិច្ចនិងការអភិវឌ្ឍវិស័យនានាឱ្យប្រព្រឹត្តទៅដោយពិលាស។
ឯកឧត្តម ជា ចាន់តូ បានបញ្ជាក់ថា ៖
“ជាមួយគ្នានេះដែរ ប្រព័ន្ធធនាគារកម្ពុជានៅបន្តរក្សាបានភាពធន់និងរឹងមាំ ដែលបានដើរតួនាទីយ៉ាងសកម្មក្នុងការលើកស្ទួយសកម្មភាពសេដ្ឋកិច្ចនិងរក្សាស្ថិរភាពហិរញ្ញវត្ថុ។ ក្រៅពីនេះ សេវាហិរញ្ញវត្ថុត្រូវបានបន្តពង្រីកវិសាលភាព ដែលបានលើកស្ទួយជីវភាពរស់នៅរបស់ប្រជាពលរដ្ឋនៅគ្រប់ទីកន្លែងឱ្យកាន់តែប្រសើរឡើង និងរួមចំណែកដល់ការអភិវឌ្ឍប្រកបដោយបរិយាបន្ន៕”
Account
Security
Favourite Content