ភ្នំពេញ៖ អ្នកឧកញ៉ា សួរ វីរៈ អគ្គនាយកក្រុមហ៊ុន វិរៈ ប៊ុនថាំ អេចប្រេស និងជាសមាជិកនៃសមាគមឧកញ៉ាកម្ពុជា ត្រូវបានតែងតាំងជា «កុងស៊ុលកិត្តិយសអ៊ីស្រាអែលប្រចាំកម្ពុជា» ក្នុងគោលបំណងជួយជំរុញចំណងទំនាក់ទំនងមិត្តភាពរវាងប្រទេសទាំងពីរឱ្យកាន់តែជិតស្និទ្ធ ស៊ីជម្រៅ ដែលនឹងផ្តល់ផលប្រយោជន៍ដល់ប្រទេស និង​ប្រជាជនប្រទេសទាំងពីរ។

ពិធីប្រកាសជាផ្លូវការត្រូវបានប្រារព្ធឡើងនារសៀលថ្ងៃទី១៩ ខែកុម្ភៈ ឆ្នាំ២០២៥ ក្រោមអធិបតីភាព ឯកឧត្តម ឃួន ផុនរតនៈ រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ និងលោកស្រី Orna Sagiv ឯកអគ្គរដ្ឋទូតរបស់ប្រទេសអ៊ីស្រាអែលប្រចាំព្រះរាជាណាចក្រកម្ពុជា។

ថ្លែងក្នុងពិធីប្រកាសតែងតាំងជាផ្លូវការនាសណ្ឋាគារ Hyatt Regency ឯកឧត្តម ឃួន ផុនរតនៈ រដ្ឋលេខាធិការនៃក្រសួងការបរទេស បានកោតសរសើរ និងវាយតម្លៃខ្ពស់ដល់អ្នកឧកញ៉ា សួរ វីរៈ ដែលត្រូវបានឯកអគ្គរដ្ឋទូតអ៊ីស្រាអែលប្រចាំកម្ពុជា សម្រេចតែងតាំងជាកុងស៊ុលកិត្តិយសអ៊ីស្រាអែលប្រចាំកម្ពុជា និងបានជំរុញឱ្យខិតខំពង្រឹងទំនាក់ទំនងរវាងប្រជាជាតិទាំងពីរព្រមទាំងសម្របសម្រួលការ  វិនិយោគ និងកិច្ចសហប្រតិបត្តិការដែលផ្តល់ផលប្រយោជន៍ដល់ប្រទេសទាំងពីរ ជាពិសេសចូលរួមក្នុងការជួយជំរុញវិស័យទេសចរណ៍ ពាណិជ្ជកម្ម រវាងប្រទេសទាំងពីរតែម្តង។

លោកស្រី អ៊័រណា សាហ្គីហ្វ(Orna Sagiv) ក្នុងនាមប្រទេស និងប្រជាជនអ៊ីស្រាអែល បានថ្លែងអំណរគុណដល់អ្នកឧកញ៉ា សួរ វីរៈ ដែលបានផ្តល់កិត្តិយសទទួលយកការតែងតាំងជាកុងស៊ុលកិត្តិយសអ៊ីស្រាអែលប្រចាំកម្ពុជា ហើយលោកស្រីក៏បានរំពឹងយ៉ាងមុតមាំថា តាមរយៈតួនាទីនេះនឹងចូលរួមចំណែកក្នុងជួយដល់ការជំរុញនូវកំណើនភ្ញៀវទេសចរឱ្យបានកាន់តែច្រើនបន្ថែមទៀតរវាងប្រទេសទាំងពីរផងដែរ។

លោកស្រីបានបង្ហាញពីសង្ឃឹមយ៉ាងខ្លាំងថា ៖

«អ្នកឧកញ៉ា សួរ វីរៈ ជាមនុស្សសំខាន់ និងជាអ្នកជំនួញដ៏ជោគជ័យដែលនឹងជំរុញវិស័យពាណិជ្ជកម្ម វិនិយោគទុន និងវិស័យនានាជាច្រើនទៀតព្រមទាំងទំនាក់ទំនង រវាងប្រទេសទាំងពីរឱ្យកាន់តែជិតស្និទ្ធ និងល្អប្រសើរ»។

នៅក្នុងឱកាសនាពេលនោះ អ្នកឧកញ៉ា សួរ វីរៈ បានថ្លែងប្តេជ្ញាចិត្តទទួលខុសត្រូវខ្ពស់ក្នុងនាមជាកុងស៊ុលកិត្តិយសអ៊ីស្រាអែលប្រចាំកម្ពុជា ហើយគោរពគោលបំណងនៃការតែងតាំងនេះដើម្បីការពង្រឹងចំណងមិត្តភាពរវាងប្រជាជាតិទាំងពីរ និងការកសាងអនាគតដោយផ្អែកលើកិច្ចសហការ ការច្នៃប្រឌិត ដើម្បីផលប្រយោជន៍ទៅវិញទៅមករវាងប្រទេសកម្ពុជា និងអ៊ីស្រាអែល រួមទាំងការចែករំលែកក្នុងវិស័យអប់រំ និងវប្បធម៌ ព្រមទាំងសម្របសម្រួលការវិនិយោគ និងកិច្ចសហប្រតិបត្តិការ ក៏ដូចជាពង្រឹងចំណងមិត្តភាពដើម្បីសម្រេចឱ្យបាននូវគោលបំណងរួមគ្នារបស់ប្រទេសជាតិទាំងពីរ។

អ៊ីស្រាអែល និងកម្ពុជា បាន និងកំពុងចែករំលែកបទពិសោធន៍ដ៌សម្បូរបែប ភាពច្នៃប្រឌិត និងភាពជឿជាក់ក្នុងដំណើរឆ្ពោះទៅវឌ្ឍនភាព។ ទោះបីជាប្រទេសទាំងពីរមានទីតាំងស្ថិតនៅឆ្ងាយពីគ្នាក៏ដោយក៏ប្រ​ជា​ជាតិទាំងពីរមានគោលបំណងស្របគ្នាជាច្រើនមានជាអាទិ៍ការអភិវឌ្ឍសេដ្ឋកិច្ចប្រកបដោយនិរ​ន្ត​​រភាព ការពង្រឹងផ្នែកបច្ចេកវិទ្យា វិស័យអប់រំ ដែលនឹងធានាបាននូវអនាគតដ៏ល្អប្រសើរសម្រាប់ប្រជាជន ។

អ្នកឧកញ៉ា បានមានប្រសាសន៍បញ្ជាក់ថា ៖

« ក្នុងអំឡុងពេលដែលខ្ញុំទទួលភារកិច្ចនេះ ខ្ញុំនឹងធ្វើការយ៉ាងជិតស្និទ្ធជាមួយស្ថានទូតអ៊ីស្រាអែល  រាជរដ្ឋាភិបាលកម្ពុជា និងសភាពាណិជ្ជកម្មកម្ពុជា-អ៊ីស្រាអែល ដើម្បីសម្រេចកិច្ចការដែលបានកំណត់ ហើយខ្ញុំនឹងខិតខំបង្កើនឱកាសសហការថ្មីៗបន្ថែមទៀត ព្រមទាំងពង្រឹងចំណងមិត្តភាពដើម្បីសម្រេចឱ្យបាននូវគោលបំណងរួមគ្នារបស់ប្រទេសជាតិទាំងពីរ» ។

ជាមួយគ្នានេះ ដោយមើលឃើញពីកិច្ចសហប្រតិបត្តិការលើវិស័យកសិកម្ម ការគ្រប់គ្រងទឹក នវានុវត្តន៍ និងបច្ចេកវិទ្យាដែលកំពុងតែរីកចម្រើននាពេលបច្ចុប្បន្ននេះ អ្នកឧកញ៉ា សួរ វីរៈ មានសុទិដ្ឋិនិយមថា គ្រប់វិស័យដែលអ៊ីស្រាអែលមានជំនាញ នឹងអាចគាំទ្រដល់គោលដៅអភិវឌ្ឍន៍របស់កម្ពុជា ៕