សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប៖ ត្នោត គឺជារុក្ខជាតិដែលមានគុណតម្លៃ និងអាចកែច្នៃប្រើជាប្រយោជន៍បានយ៉ាងច្រើន រាប់ចាប់តាំងពីឫស ដើម ធាង ស្លឹក ផ្កា ផ្លែ ពោលគឺចាប់ពីឫសកែវ រហូតដល់ចុងកំពូល ដែលគេអាចប្រមូលផលក្នុងរយៈពេលច្រើនឆ្នាំ ហើយអាចយកខ្លឹមដើមត្នោតចាស់ៗ កែច្នៃធ្វើជាគ្រឿងសង្ហារឹម ជាពិសេស សម្ភារៈប្រើប្រាស់ប្រចាំថ្ងៃបានយ៉ាងស្រស់ស្អាតថែមទៀតផង។
ជាក់ស្ដែង តាមរយៈសិប្បកម្មក្រឡឹងត្នោត និងឈើ នៅក្នុងក្រុងសៀមរាបមួយកន្លែង កំពុងតែកែច្នៃខ្លឹមត្នោតធ្វើជាសម្ភារៈប្រើប្រាស់ក្នុងផ្ទះ និងដាក់លក់យ៉ាងមមាញឹក។
លោកស្រី លី លាប ម្ចាស់សិប្បកម្មក្រឡឹងត្នោត និងឈើសៀមរាប បានប្រាប់បណ្ដាញសារព័ត៌មាន AMS ឱ្យដឹងថា ក្រោយពីផុសលក់សាកល្បងតាមបណ្ដាញសង្គមហ្វេសប៊ុក ក៏មានអតិថិជនធ្វើការកុម្ម៉ង់ទិញជាហូរហែ គ្រាន់តែនៅដំណាក់កាលដំបូងមិនសូវមានអ្នកស្គាល់ច្រើន ធ្វើឱ្យការលក់ចេញតាមអនឡាញមានចំនួនតិច ប៉ុន្តែក្រោយពីព្យាយាមផុសជាប្រចាំមានភ្ញៀវកុម្ម៉ង់ទិញកាន់តែច្រើនឡើងៗ រហូតមកទល់បច្ចុប្បន្ន។
លោកស្រីបញ្ជាក់ថា ៖
“កាលពីដំណាក់កាលដំបូងមុនកូវីដ-១៩ ខ្ញុំផុសលក់តែមិនសូវមានអ្នកស្គាល់នោះទេ រហូតដល់ឆ្នាំ២០២២ ក្រោយសម័យកូវីដមក ខ្ញុំចេះតែផុសលក់បន្តទៀត ទើបអតិថិជនចាប់ផ្ដើមស្គាល់ហើយកុម្ម៉ង់ទិញជាហូរហែ ថ្ងៃខ្លះបានតិចថ្ងៃខ្លះបានច្រើន ថ្ងៃខ្លះអត់ ថ្ងៃខ្លះមានជាធម្មតា ព្រោះជាសិប្បកម្មលក្ខណៈគ្រួសារ។”
ទោះជាការលក់ពេលខ្លះបានតិចពេលខ្លះបានច្រើន ក៏សិប្បកម្មខាងលើ អាចរកប្រាក់ចំណូលបានសមរម្យ សម្រាប់ផ្គត់ផ្គង់ប្រាក់បៀវត្ស ដល់ក្រុមជាងជំនាញចំនួន ០៤នាក់ រួមនឹងប្រាក់ឧបត្ថម្ភបាយទឹក និងប្រាក់ស្នាក់នៅ ក៏ដូចជាការរកចំណូលដើម្បីទិញដើមត្នោតចាស់ៗ (ឬហៅថាត្នោតលៃ) ពីកសិករ ដែលជាផ្នែកមួយជួយឱ្យពួកគាត់រកចំណូលបានខ្លះៗ ពីការលក់ត្នោតចាស់មានអាយុកាលរយឆ្នាំ ជាជាងទុកចោលដោយឥតប្រយោជន៍ ។
សូមបញ្ជាក់ថា សិប្បកម្មត្នោតនិងឈើសៀមរាប មានទីតាំងស្ថិតនៅភូមិមណ្ឌល០៣ សង្កាត់ស្លក្រាម ក្រុងសៀមរាប។ នៅពេលទៅដល់នោះគេឃើញសកម្មភាពជាងកំពុងមមាញឹក ក្នុងការច្នៃផលិតសម្ភារៈប្រើប្រាស់ជាច្រើន មានដូចជាកែវទឹក ប៉ាន់តែ កំសៀវ វែកឆា វែកសម្ល ចង្កឹះ ស្លាបព្រា ចានបាយ ប្រអប់ក្រដាស ថូផ្កា រួមនឹងវត្ថុអនុស្សាវរីយ៍ផ្សេងៗជាច្រើនទៀត ដែលអាចដាក់តាំងលម្អនៅក្នុងផ្ទះបាយដ៏ល្អប្រណិត។
សម្ភារៈប្រើប្រាស់ពីខ្លឹមត្នោតទាំងនេះ មានការកុម្ម៉ង់ទិញពីអតិថិជននៅទីតាំងផ្ទាល់ ពិសេសអតិថិជនដែលធ្វើដំណើរទៅទស្សនាកម្សាន្តខេត្តសៀមរាប និងកុម្ម៉ង់ទិញតាមអនឡាញ ពីអតិថិជនតាមបណ្ដាខេត្តផ្សេងៗ ពិសេសអ្នករស់នៅក្រុងភ្នំពេញ និងនៅតាមទីប្រជុំជនផ្សេងៗទៀតដូចជាក្រុងកំពតជាដើម។
លោកស្រី លី លាប បាននិយាយថា៖
“ពួកគាត់យកទៅប្រើប្រាស់ជាលក្ខណៈគ្រួសារ ខ្លះយកទៅដាក់ម្ហូបទទួលភ្ញៀវនៅតាមហាងបាយ ហាងបុកល្ហុង ហាងកាហ្វេ ហើយខ្លះទៀតទិញយកទៅលក់បន្តនៅតាមផ្សារ និងតាមតំបន់ទេសចរណ៍នានា ដែលមានការគាំទ្រលក់ដាច់ជាហូរហែពីអ្នកទេសចរក្នុងស្រុកនិងក្រៅប្រទេស ។”
លោកស្រីអះអាងថា សម្ភារៈច្នៃពីខ្លឹមត្នោតទាំងនេះមានភាពធន់ រឹងមាំ ប្រើប្រាស់បានយូរ ហើយមានតម្លៃសមរម្យ ឧទាហរណ៍ដូចជាចង្កឹះមួយឡូត៍មានតម្លៃប្រមាណជា ៨,០០០រៀល និងប៉ាន់តែ កែវតែ បូករួមនឹងទ្រនាប់មួយឈុតតូចមានតម្លៃត្រឹមតែ ៦០,០០០រៀល ដែលនេះជាតម្លៃសមរម្យ សម្រាប់អតិថិជនក្នុងស្រុកភាគច្រើន មានលទ្ធភាពទិញយកទៅប្រើប្រាស់តាមផ្ទះ ឬដាក់តាំងលំអរក្នុងផ្ទះបាយជាដើម។
រំលឹកទៅដល់ការបង្កើតទីតាំងសិប្បកម្មដំបូង លោកស្រីមិនបានជួលជាងជំនាញទាំងនេះទេ ប៉ុន្តែដោយសារគ្រួសារជាជាងឈើ គាត់ច្នៃលក់សាកល្បងនៅពេលទំនេរ ហើយក៏មានការគាំទ្រជាហូរហែ ជំរុញឱ្យការផលិតកាន់តែមានភាពមមាញឹក ទើបម្ចាស់សិប្បកម្មសម្រេចចិត្តជួលជាងមកជួយធ្វើការងារជាប្រចាំថ្ងៃ បានចំនួន ០៤នាក់បន្ថែមទៀត។
តាមរយៈការដាក់លក់តាមអនឡាញក្ដី ឬការលក់នៅទីតាំងផលិតក្ដី លោកស្រីអំពាវនាវដល់អតិថិជនទាំងក្នុងនិងក្រៅប្រទេស ជួយគាំទ្រសិប្បកម្មខាងលើឱ្យកាន់តែច្រើនថែមទៀត ប្រៀបដូចជាការផ្ដល់ការងារដល់ពលរដ្ឋខ្មែរ ជួយគាំទ្រផលិតផលខ្មែរ ក៏ដូចជាជួយឱ្យកសិករតំបន់នោះអាចរកចំណូលបន្ថែម ក្រៅពីការងារធ្វើស្រែចម្ការ៕
Account
Security
Favourite Content