កំពង់ស្ពឺ ៖ កាលពីព្រឹកថ្ងៃទី ៣១ ខែតុលា ឆ្នាំ២០២៤ កន្លងទៅថ្មីៗនេះ សមាគមធនាគារកម្ពុជា និងសមាគម​មីក្រូហិរញ្ញវត្ថុកម្ពុជា បានសហការគ្នារៀបចំប្រារព្ធនូវ «ទិវាសន្សំអាស៊ាន» លើកទី៤ នៅលើទឹកដី ខេត្តកំពង់ស្ពឺ។

ក្នុងឱកាសនោះ លោក រ័ត្ន សោភ័ណ ប្រធានសមាគមធនាគារនៅកម្ពុជា បានគូសបញ្ជាក់ថា​ ការរៀបចំ​ទិវាសន្សំអាស៊ាននាពេលនេះ គឺដើម្បីចូលរួមចំណែកលើកកម្ពស់ និងធ្វើឱ្យប្រសើរឡើង​នូវបរិយាបន្នហិរញ្ញវត្ថុ ដែលស្របតាមយុទ្ធសាស្ត្រជាតិស្តីពី​បរិយាបន្ន​ហិរញ្ញវត្ថុ ឆ្នាំ២០១៩-២០២៥ ក្នុងការលើកកម្ពស់ការសន្សំប្រាក់ ក៏ដូចជាការ​បង្កើន​ការយល់ដឹង​អំពីអត្ថប្រយោជន៍ក្នុងការបើក​គណនីសន្សំ។

ជាមួយគ្នានោះ លោកក៏បានបង្ហាញនូវការសាទរចំពោះគ្រប់គ្រឹះស្ថានធនាគារ និងហិរញ្ញវត្ថុទាំងអស់ ព្រមទាំងដៃគូពាក់ព័ន្ធដែលបានដាក់ចេញនូវកម្មវិធីអប់រំ និងផ្សព្វផ្សាយអំពីចំណេះដឹ​ងផ្នែក​ហិរញ្ញវត្ថុ​ដល់កុមារ យុវជន និងសាធារណជនទូទៅ ព្រមទាំងបានគាំទ្រដល់កម្មវិធីអប់រំដែលបានដាក់ចេញ​ដោយធនាគារជាតិនៃកម្ពុជា និងសមាគមធនាគារនៅកម្ពុជានាពេលកន្លងមក។

លោកក៏បានឱ្យដឹងដែរថា ៖

«យោងតាមរបាយការណ៍ប្រចាំឆមាសទី១ ឆ្នាំ២០២៤ របស់ធនាគារជាតិនៃកម្ពុជា ទ្រព្យសកម្មរបស់គ្រឹះស្ថានធនាគារបានកើនឡើងជិត ៦% ឬប្រមាណ​ជាង ៨៨ ប៊ីលាន​ដុល្លារអាមេរិក។ ក្នុងនោះ វិស័យធនាគារមានជាង ៩៥%នៃទ្រព្យសកម្ម​ វិស័យ​មីក្រូហិរញ្ញវត្ថុមានចំណែក ៣,៦% និងវិស័យភតិសន្យាហិរញ្ញវត្ថុ ០,៥%។ ឥណទានអតិថិជន​កើនឡើងប្រមាណជា ២,៦% ដែលគិតជាទឹកប្រាក់ប្រមាណជិត ៥៩ ប៊ីលានដុល្លារអាមេរិក ដោយមានចំនួន ៤លានគណនី»។

ទន្ទឹមគ្នានេះ ប្រាក់បញ្ញើអតិថិជនក៏បានកើនឡើងគួរឱ្យកត់សម្គាល់ផងដែរជាមួយនឹងកំណើនជិត ១៣,៤% ឬប្រមាណជាង ៥១,៩ ប៊ីលានដុល្លារអាមេរិក ដោយចំនួនគណនីប្រាក់បញ្ញើ​អតិថិជនបាន​កើនឡើងដល់ ២១,៣ លានគណនី​នៅក្នុងវិស័យធនាគារ។ ការកើនឡើងនូវបញ្ញើអតិថិជនក្នុងគ្រឹះស្ថានហិរញ្ញវត្ថុផ្លូវការបានបង្ហាញពីជំនឿទុកចិត្តរបស់​សាធារណ​ជន​មកលើប្រព័ន្ធធនាគារនៅកម្ពុជា។

ក្នុងពិធីដដែលនោះ លោកជំទាវ ឌិត នីតា ប្រធានសមាគមមីក្រូហិរញ្ញវត្ថុនៅកម្ពុជា ក៏បានរំលេចផងដែរថា ការសន្សំពិតជាមានសារៈសំខាន់ដែលត្រូវតែយកចិត្តទុកដាក់ និងចូលរួមអនុវត្តឱ្យ​មានប្រសិទ្ធ​ភាព ព្រោះថាការសន្សំអាចជួយសម្រួលដល់តម្រូវការចាំបាច់ក្នុងស្ថានភាព​បន្ទាន់នៅពេលអនាគត ជាពិសេសគឺចូលរួមពង្រឹងការគ្រប់គ្រងហិរញ្ញវត្ថុ ឬហៅថាការចាត់ចែងលុយកាក់​ប្រចាំថ្ងៃរឱ្យកាន់តែប្រសើរឡើង។

លោកជំទាវបន្តមានប្រសាសន៍ថា៖

«កន្លងមក សមាគមីក្រូហិរញ្ញវត្ថុកម្ពុជាតែងតែចូលរួមយ៉ាង​សកម្ម​ជាមួយដៃគូ គ្រឹះស្ថានសមាជិក និងធនាគារជាតិនៃកម្ពុជា ក្នុងការផ្តួចផ្តើម និងចូលរួមជំរុញការលើក​កម្ពស់​ចំណេះដឹងហិរញ្ញវត្ថុ ជាពិសេសបង្កើតវប្បធម៌សន្សំដល់សាធារណៈជន តាមរយៈគម្រោងយុទ្ធនាការ និងបង្កើត​មាតិកាសង្គមជាច្រើនទម្រង់ ដើម្បីផ្សព្វផ្សាយជាប្រចាំលើបណ្តាញសង្គមរបស់​សមាគមទំព័រហ្វេស​ប៊ុកលុយខ្ញុំ ទំព័រហ្វេសប៊ុកកសិផលខ្ញុំ និងទំព័រហ្វេសប៊ុករបស់គ្រឹះស្ថានជាសមាជិករបស់​សមាគម។ មិនត្រឹមតែប៉ុណ្ណោះ សមាគមផ្ទាល់ក៏បានបង្កើតកិច្ចជជែកពិភាក្សា បោះពុម្ពសៀវភៅ​បែបអប់រំ និងវីដេអូអប់រំពាក់ព័ន្ធនឹងការសន្សំ ដើម្បីបញ្ជ្រាប និងលើក​កម្ពស់ការ​សន្សំ​នៅកម្ពុជាផងដែរ»។

គួរបញ្ជាក់ថា គិតត្រឹមត្រីមាសទី២ ឆ្នាំ២០២៤ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើទាំង៤គ្រឹះស្ថាន ទទួល​ប្រាក់បញ្ញើសរុបបានចំនួនជាង ២២១០ លាន​ដុល្លារ​​អាមេរិក កើនឡើងប្រមាណ ៤%ធៀបនឹងឆ្នាំមុន ពីអតិថិជនប្រមាណ ១,៩៩លាននាក់ ហើយរំពឹងថា ចំនួនប្រាក់បញ្ញើនេះក៏នឹងបន្តកើនឡើងជា​លំដាប់ផងដែរតាមរយៈ​សេវាកម្ម​ដែលមានភាពច្នៃប្រតិដ្ឋ និងងាយស្រួលសម្រាប់ប្រជាពលរដ្ឋក្នុង​ការប្រើប្រាស់។

ដោយឡែក ទិវាសន្សំអាស៊ាន គឺជាគំនិតផ្ដួចផ្ដើមពីប្រទេសជាសមាជិកអាស៊ានក្នុងការជំរុញបរិយាកាសហិរញ្ញវត្ថុក្នុងតំបន់ ដើរស្របទៅនឹង «ទិវាសន្សំពិភពលោក»​ ដែលត្រូវបានបង្កើតឡើងតាំងតែពីឆ្នាំ ១៩២៤មកម្ល៉េះ ដើម្បីលើកទឹកចិត្តឱ្យប្រជាពលរដ្ឋដាក់ប្រាក់សន្សំក្នុងគ្រឹះស្ថានហិរញ្ញវត្ថុផ្លូវការ៕