បើទោះបីជាទើបតែបានប្រកាសលុបចោលគោលការណ៍សូន្យកូវីដ និងចាប់ផ្តើមដំណើរការសេដ្ឋកិច្ចក្រោយវិបត្តិកូវីដក្តី ប៉ុន្តែរដ្ឋាភិបាលប៉េកាំងថ្មីៗនេះបានប្រកាសពីការបង្កើនចំណាយសម្រាប់វិស័យយោធាដល់ទៅ ៧ភាគរយនៅក្នុងឆ្នាំ២០២៣នេះ។ សេចក្តីប្រកាសដែលត្រូវបានធ្វើឡើងនៅក្នុងអំឡុងពេលនៃកិច្ចប្រជុំសភាកាលពីចុងសប្តាហ៍កន្លងទៅនេះបានបង្ហាញថា ទំហំនៃការចំណាយសម្រាប់វិស័យយោធានៅក្នុងឆ្នាំនេះមានទៅដល់ ២២៥ ពាន់លានដុល្លារ ប៉ុន្តែទោះបីជាយ៉ាងណាក្តីថវិកានេះនៅមានចំនួនតិចជាងការចំណាយយោធារបស់អាមេរិកដល់ទៅ៤ដងនៅឡើយ។

ឆ្នាំ២០២៣នេះ រដ្ឋាភិបាលវ៉ាស៊ីនតោនគ្រោងនឹងចំណាយសម្រាប់វិស័យយោធាដល់ទៅ ៧៩៧ពាន់លានដុល្លារ ពោលគឺកើនឡើងពីការចំណាយកាលពីឆ្នាំ២០២២ ដែលមានត្រឹមតែ ៧២៨ពាន់លានដុល្លារ ហើយទំហំនេះមិនបូកបញ្ចូលជាមួយនឹងជំនួយយោធាទៅឲ្យអ៊ុយក្រែនជាច្រើនពាន់លានដុល្លារផ្សេងនោះទេ។

ទោះបីជាយ៉ាងណាក្តី យោងតាមការចេញផ្សាយដោយទូរទស្សន៍ BBC ចំពោះផែនការថវិកាថ្មីរបស់ចិនឆ្នាំនេះ មានអ្នកវិភាគនយោបាយជាច្រើន បានមើលឃើញពីអ្វីដែលចិនកំពុងរៀបចំនេះគ្រាន់តែមានបំណងដើម្បីចង់បង្ហាញទៅពិភពលោកប៉ុណ្ណោះ។ ជាក់ស្តែង ប៉ុន្មានឆ្នាំចុងក្រោយនេះជាមធ្យម ចិនចំណាយសម្រាប់យោធាជាមួយនឹងអត្រាកំណើន១០ភាគរយប្រចាំឆ្នាំ លើកលើងតែឆ្នាំ២០១៤ ដែលគ្រានោះមានទៅដល់១២,២ភាគរយ។

ចិន បានផ្តោតសំខាន់ទៅលើមូលហេតុមួយចំនួននៃការបង្កើនខ្ទង់ចំណាយយោធាដ៏ច្រើនបែបនេះដោយក្នុងនោះទី១ គឺជាបញ្ហានៃការប៉ុនប៉ង់ពីសំណាក់ក្រុមខាងក្រៅប្រទេស និងទី២គឺដើម្បីទប់ស្កាត់នៃការកើនឡើងការគំរាមកំហែងនានាទាំងក្នុង និងក្រៅប្រទេស ដោយបានចេញបញ្ជាផងដែរឲ្យមានការបង្កើនកិច្ចខិតខំហ្វឹកហាត់យោធាព្រមទាំងការបង្កើនការប្រុងប្រៀបបែបយោធានៅគ្រប់កម្លាំងអង្គភាពទាំងអស់។

កំណើនថវិកាសម្រាប់វិស័យការពារជាតិលើកនេះក៏ត្រូវបានគេមើលឃើញដែរថា បានធ្វើឡើងនៅក្រោយពេលដែលទំនាក់ទំនងរវាងអាមេរិកនិងចិនបានធ្លាក់ទៅដល់ចំណុចដ៏អាក្រក់មួយជុំវិញជំហនៅក្នុងជម្លោះនៅអ៊ុយក្រែនព្រមទាំងការបាញ់ទំលាក់បាឡុងស្រាវជ្រាវរបស់ចិនដោយអាមេរិកផងដែរ។

លើសពីនេះក៏មានបញ្ហាក្តៅក្រហាយដាក់គ្នាទៅលើបញ្ហានៃកោះតៃវ៉ាន់ផងដែរ ជាពិសេសខណៈដែលអាមេរិកបានបញ្ជូនមន្ត្រីជាន់ខ្ពស់ជាបន្តបន្ទាប់ទៅបំពេញទស្សនកិច្ចនៅកោះតៃវ៉ាន់ ហើយបានចោទប្រកាន់ថាចិននឹងគ្រោងលុកលុយកោះតៃវ៉ាន់នៅក្នុងរយៈពេលប៉ុន្មានឆ្នាំខាងមុខទៀតផង។

ទោះបីជាយ៉ាងណាក្តី នៅក្នុងកិច្ចប្រជុំកំពូលរបស់ចិនលើកនេះ លោកនាយករដ្ឋមន្ត្រីចិន Li Keqiang បានលើកឡើងថា ទីក្រុងប៉េកាំងនៅតែបន្តរក្សាជំហរបស់ខ្លួនចំពោះដែនអធិបតេយ្យភាពរបស់ខ្លួន ហើយនឹងបន្តធ្វើការបន្ថែមទៀតដើម្បីរួបរួមជាមួយនឹងកោះតៃវ៉ាន់វិញដោយវិធីសាស្ត្រដែលសន្តិភាពបំផុត។ លោកនាយករដ្ឋមន្ត្រីក៏បានបន្តទៀតថា រដ្ឋាភិបាលទីក្រុងប៉េកាំងនៅតែមានការប្តេជ្ញាចិត្តចំពោះគោលការណ៍ចិនតែមួយដែលមានន័យថា កោះតៃវ៉ាន់ គឺជាផ្នែកមួយនៃទឹកដីរបស់ប្រទេសចិន ហើយនឹងបន្តធ្វើការប្រឆាំងទៅនឹងការទាមទាររបស់កោះតៃវ៉ាន់ដើម្បីក្លាយជារដ្ឋឯករាជ្យ៕