សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាផ្នែកមួយនៃកិច្ចខិតខំប្រឹងប្រែងរួមគ្នាក្នុងភាពជាដៃគូ គ្រឹះស្ថាន ខេមា និងអង្គការ Water.org បានសហការរៀបចំសិក្ខាសាលាស្ដីពីចំណេះដឹងហិរញ្ញវត្ថុ សម្រាប់បុគ្គលិកលក់សរុបប្រមាណ ១៤០នាក់ នៅសណ្ឋាគារ ហ៊ីម៉ាវ៉ារី។ សិក្ខាសាលានេះជាជំហានដ៏សំខាន់មួយក្នុងការលើកកម្ពស់ចំណេះដឹងហិរញ្ញវត្ថុ និងបំណិនជីវិតនៃការគ្រប់គ្រងហិរញ្ញវត្ថុផ្ទាល់ខ្លួន។
សិក្ខាសាលានេះត្រូវបានរៀបចំឡើងដើម្បីបំពាក់បំប៉នចំណេះដឹងគ្រប់គ្រងហិរញ្ញវត្ថុផ្ទាល់ខ្លួន និងការសម្រេចចិត្តលើផ្នែកហិរញ្ញវត្ថុប្រកបដោយប្រសិទ្ធភាពសម្រាប់ភ្នាក់ងារឥណទាន ប្រធានភ្នាក់ងារឥណទាន និងនាយកសាខា។ តាមរយៈការផ្ដល់នូវវិធីសាស្ត្រជាក់ស្ដែងដើម្បីបណ្ដុះវិន័យហិរញ្ញវត្ថុ សិក្ខាសាលានេះមានគោលបំណងបង្កើនទំនុកចិត្តរបស់សិក្ខាកាមក្នុងការគ្រប់គ្រងហិរញ្ញវត្ថុផ្ទាល់ខ្លួន និងពង្រឹងសមត្ថភាពក្នុងការផ្សព្វផ្សាយចំណេះដឹងហិរញ្ញវត្ថុក្នុងសហគមន៍ដែលពួកគេកំពុងផ្ដល់សេវា។
ថ្លែងក្នុងសន្ទរកថាបិទអង្គសិក្ខាសាលា លោកជំទាវ ឌិត នីតា ប្រធានក្រុមប្រឹក្សាភិបាល នៃគ្រឹះស្ថាន ខេមា បានគូសបញ្ជាក់ថា៖
«នៅ ខេមា យើងជឿជាក់ថា ការកសាងសុខុមាលភាពហិរញ្ញវត្ថុរបស់ភ្នាក់ងារឥណទានរបស់យើងគឺជាគន្លឹះក្នុងការផ្តល់សេវាកម្មហិរញ្ញវត្ថុប្រកបដោយការទទួលខុសត្រូវ។ វគ្គបណ្តុះបណ្តាលនេះមិនត្រឹមតែជួយក្រុមការងាររបស់យើងឱ្យគ្រប់គ្រងហិរញ្ញវត្ថុផ្ទាល់ខ្លួនបានប្រសើរឡើងប៉ុណ្ណោះទេ ប៉ុន្តែថែមទាំងផ្តល់ទំនុកចិត្តដល់ភ្នាក់ងារឥណទានក្នុងការចែករំលែកចំណេះដឹងហិរញ្ញវត្ថុដល់អតិថិជនរបស់យើង ជាពិសេសនៅក្នុងសហគមន៍ជនបទ។ ចំណេះដឹងហិរញ្ញវត្ថុគឺជាបំណិនជីវិតមួយ ដែលអាចជួយបុគ្គលម្នាក់ៗឱ្យបង្ការបំណុលលើសលប់ ជួយសម្រេចបាននូវគោលដៅរបស់ខ្លួន និងរួមចំណែកដល់ស្ថិរភាពហិរញ្ញវត្ថុគ្រួសារ»។
សិក្ខាសាលានេះបានគ្របដណ្តប់លើប្រធានបទជាច្រើន រួមមាន ការរៀបចំថវិកា យុទ្ធសាស្រ្តសន្សំ ការគ្រប់គ្រងបំណុល និងការកសាងភាពធន់ផ្នែកហិរញ្ញវត្ថុ។ គំនិតផ្តួចផ្តើមនេះគឺជាផ្នែកមួយនៃការប្តេជ្ញាចិត្តរបស់ គ្រឹះស្ថាន ខេមា ក្នុងកិច្ចការពារអតិថិជន និងការផ្តល់សេវាហិរញ្ញវត្ថុប្រកបដោយទំនួលខុសត្រូវ ដើម្បីធានាថាភ្នាក់ងារឥណទានមិនត្រឹមតែដើរតួជាអ្នកសម្របសម្រួលកម្ចីប៉ុណ្ណោះទេ ប៉ុន្តែថែមទាំងជាអ្នកប្រឹក្សាហិរញ្ញវត្ថុជាទីទុកចិត្តរបស់អតិថិជនផងដែរ។
អង្គការ Water.org បន្តជាដៃគូដ៏សំខាន់របស់គ្រឹះស្ថាន ខេមា ក្នុងការលើកកម្ពស់ចំណេះដឹងហិរញ្ញវត្ថុ និងបរិយាប័ន្នហិរញ្ញវត្ថុឥណទានទឹកស្អាត និងអនាម័យ ដើម្បីផ្តល់ឱកាសឱ្យប្រជាជនកម្ពុជាមានបង្គន់អនាម័យ និងទឹកស្អាតប្រើប្រាស់។ ដោយឡែក គ្រឹះស្ថាន ខេមា គិតត្រឹមថ្ងៃទី ២២ ខែកក្កដា ឆ្នាំ២០២៥ បានផ្តល់ឥណទានទឹកស្អាតនិងអនាម័យដល់អតិថិជន ១.៧៩៩នាក់ ក្នុងទំហំទឹកប្រាក់សរុបប្រមាណ ១.២៦៣.៣៣២ដុល្លារអាមេរិក ដែលឥណទានទាំងនេះ បានចូលរួមចំណែកផ្តល់ផលជះវិជ្ជមាន និងលើកកម្ពស់សុខុមាលភាពដល់ប្រជាជនចំនួនប្រមាណ ៩.៥៨៥នាក់ ៕
Account
Security
Favourite Content