សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ពិព័រណ៍វិចិត្រសាលស្ថាបត្យកម្មកម្ពុជា ឆ្នាំ២០២៤ ត្រូវបានរៀបចំឡើងនៅក្រសួងរៀបចំដែនដី នគរូបនីយកម្ម និងសំណង់ រយៈពេល៧ថ្ងៃ ចាប់ពីថ្ងៃទី២៥ ខែវិច្ឆិកា ដល់ថ្ងៃទី០១ ខែធ្នូ ឆ្នាំ២០២៤ ។ កម្មវិធីនេះមានការចូលរួមត្រួតពិនិត្យ និងវាយតម្លៃពីសំណាក់មន្ត្រីជំនាញជាន់ខ្ពស់របស់ក្រសួងរៀបចំដែនដី នគរូបនីយកម្ម និងសំណង់ ជាពិសេសចាប់ពីថ្ងៃទី២៧ ខែវិច្ឆិកា ដល់ថ្ងៃទី០១ ខែធ្នូ ឆ្នាំ២០២៤ ។
នៅក្នុងកម្មវិធីនៃពិព័រណ៍រយៈពេល៧ថ្ងៃ ជាពិសេសចាប់ពីថ្ងៃទី២៧ វិច្ឆិកា ដល់ថ្ងៃទី១ ខែធ្នូ ឆ្នាំ២០២៤ មានការធ្វើបទបង្ហាញពីក្រុមជ័យលាភីនៃការប្រកួតទៅតាមប្រធានបទនីមួយៗ ដូចជា បទបង្ហាញក្រោមប្រធានបទដង្ហើមទីក្រុង បទបង្ហាញពីបណ្ដាញផ្លូវព្រះមុន្នីវង្ស និងផ្លូវព្រះនរោត្តម បទបង្ហាញក្រោមប្រធានបទស្ថាបត្យកម្មខ្មែរ និងការអភរិក្សជាដើម ។
នៅក្នុងថ្ងៃទី២៧ ខែវិច្ឆិកា ឆ្នាំ២០២៤នេះដែរ កម្មវិធីក៏មានការចូលរួមពីសំណាក់ឯកឧត្តម ម៉ម សូផាណា ទីប្រឹក្សាក្រសួងរៀបចំដែនដី នគរូបនីយកម្ម និងសំណង់ ឯកឧត្តម រ័ត្ន វិរៈ រដ្ឋលេខាធិការក្រសួងរៀបចំដែនដី នគរូបនីយកម្ម និងឯកឧត្តម ហង្ស សុតសំភារ អគ្គលេខាធិការ គណៈស្ថាបត្យករកម្ពុជាផងដែរ ។
ដោយឡែក នៅថ្ងៃទី២៨ ខែវិច្ឆិកា ឆ្នាំ២០២៤ កម្មវិធីនេះមានការចូលរួមពីសំណាក់ឯកឧត្តម ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ឯកឧត្តម ឡៅ ទិព្វសីហា រដ្ឋលេខាធិការ និងជាអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ ។ នៅថ្ងៃដដែលនេះដែរ ក៏មានការធ្វើបទបង្ហាញពីប្រធានបទ ការសិក្សាគំរូបន្ទប់ទឹកសាធារណៈ និងលំនៅឋានមានតម្លៃសមរម្យ ខណៈដែលមន្ត្រីជំនាញរបស់ក្រសួងរៀបចំដែនដី ក៏នឹងធ្វើបទបង្ហាញផងដែរពីបទដ្ឋានកូដ និងស្ដង់ដារសុវត្ថិភាពស្ថាបត្យកកម្មបង្ហាញដល់អ្នកចូលរួមក្នុងថ្ងៃនោះ ។
ឯកឧត្តម ហង្ស សុតសំភារ អគ្គលេខាធិការ គណៈស្ថាបត្យករកម្ពុជា ដែលបានអញ្ជើញចូលរួមនៅក្នុងកម្មវិធីពិព័រណ៍ថ្ងៃទី២៧ ខែវិច្ឆិកា ឆ្នាំ២០២៤ បានមានប្រសាសន៍ថា ការតាំងពិព័រណ៍នេះជារឿងមួយសំខាន់ តែអ្វីដែលសំខាន់ជាងនេះទៅទៀតគឺការធ្វើបទបង្ហាញរបស់សិស្ស-និស្សិត ជាម្ចាស់ជ័យលាភីនៃការប្រកួតប្រជែងកន្លងមក ដែលជាការផ្ដល់គំនិតយោបល់ និងជាការបង្ហាញដល់អាជ្ញាធរ សម្រាប់ពិចារណាក្នុងការអនុវត្ត និងរៀបចំទីក្រុងឱ្យកាន់តែប្រសើរ កាន់តែទាក់ទាញបន្ថែមទៀត ពោល គឺនឹងជំរុញឱ្យទីក្រុងនានារបស់កម្ពុជាកាន់តែមានសោភ័ណ្ឌភាព ។
គួរបញ្ជាក់ផងដែរថា នៅថ្ងៃបញ្ចប់នៃកម្មវិធីពិព័រណ៍ វិចិត្រសាលស្ថាបត្យកម្មកម្ពុជា ឆ្នាំ២០២៤ ដែលនឹងប្រព្រឹត្តទៅនៅថ្ងៃទី០១ ខែធ្នូ នឹងមានការផ្តល់វត្តមានអញ្ជើញចូលរួមជាអធិបតីពីសំណាក់ ឯកឧត្តមសាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ។ ដូច្នេះ ចាប់ពីពេលថ្ងៃនេះ រហូតដល់ថ្ងៃបញ្ចប់នៃកម្មវិធី សាធារណជន សិស្ស និស្សិត ដែលកំពុងសិក្សាជំនាញពាក់ព័ន្ធ អាចចូលរួមទស្សនាការដាក់តាំងបង្ហាញស្នាដៃពីនិស្សិត និងក្រុមហ៊ុនឧបត្ថម្ភក្នុងកម្មវិធី ដោយអាចសួរព័ត៌មានលម្អិតបន្ថែមពាក់ព័ន្ធនឹងស្ថាបត្យកម្មនៅទីនោះបានផងដែរ ៕
Account
Security
Favourite Content