សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រសិនបើអ្នកធ្វើដំណើរកាត់តាមផ្សារទទួលទំពូង ជាពិសេសពេលល្ងាច អ្នកនឹងឃើញមានរទេះលក់អាហារជាច្រើនតម្រៀបត្រៀបត្រា ដែលមានតាំងពីបបរ បង្អែម បាយ-ម្ហូប គ្រឿងសមុទ្រជាដើម។ ក្នុងនោះ មានរទេះមួយដែលមានលក់អាហារអាំងដូចជា គោងៀត ត្រី បន្លែ និងបាយស ដែលអាចរកចំណូលបានដល់ទៅ ៦០ម៉ឺនរៀលក្នុងមួយយប់ៗ។
លោក ម៉ម ណារិទ្ធ ជាម្ចាសរទេះលក់អាហារស្ថិតនៅតាមបណ្ដោយផ្លូវ ១៥៥ ទល់មុខផ្សារអង្គរ បានមានប្រសាសន៍ឱ្យដឹងថា លោកបានចាប់យកមុខលក់អាហារអាំងនេះយូរឆ្នាំមកហើយ ដោយអាចរកបានគួរសម ដែលមួយយប់អាចលក់បានខ្ទង់ ៥០-៦០ម៉ឺនរៀល។
លោកបន្ថែមថា ៖
“របស់ដែលយើងលក់មានដូចជា ងៀតគោ ត្រីប្រឡាក់ សាច់ក្រក ប្រហិត ស្លាបមាន់ គ្រឿងក្នុងមាន់ និងបន្លែ ដែលយើងដាក់អាំងភ្លាមៗសម្រាប់អ្នកមកទិញយកទៅធ្វើជាគ្រឿងក្លែមក៏បាន និងបរិភោគជាមួយបាយក៏បាន។”
សម្រាប់ចំណុចពិសេសវិញ អាហារអាំងរបស់អាជីវកររូបនេះ ពិសេសត្រីប្រឡាក់ ដែលលោកទិញមកប្រឡាក់ខ្លួនឯងថ្មីៗ មានរសជាតិប្រៃផ្អែមល្មម ធ្វើពីត្រីរស់ ត្រីប្រា និងត្រីកេសជាដើម ដែលមានតម្លៃចាប់ពី ៣០០០ពាន់រៀលឡើងទៅ។ ចំណែកងៀតគោ មានចាប់ពីតម្លៃ ៥០០០រៀល ហើយបន្លែអាំង ដូចជា ផ្សិត ពោតបារាំង មានតម្លៃ ១០០០រៀល។ បន្ថែមពីនេះ ចំណុចដែលអតិថិជនចូលចិត្តទៅទិញអាហារនៅទីកន្លែងរបស់លោកគឺផ្អែកលើទឹកជ្រលក់ ម្ទេសឆារ និងជ្រក់ល្ហុងរបស់លោកមានរសជាតិឆ្ងាញ់ ធ្វើខ្លួនឯង មិនជូរពេក មិនប្រៃពេក ពោលគឺមានរសជាតិស៊ីគ្នាមួយនឹងអាហារអាំងផ្ទាល់តែម្ដង ដោយមួយថ្ងៃលោកត្រូវធ្វើជ្រក់ប្រមាណ ១០គីឡូក្រាមផងដែរ។
អ្នកលក់អាហារអាំងពេលរាត្រីរូបនេះបានបន្តឱ្យដឹងថា សម្រាប់ការលក់នេះទៀតសោត លោករៀបចំរទេះតាំងពីម៉ោង ២រសៀល ដើម្បីរៀបចំឥវ៉ាន់ និងរបស់របរចូលរទេះ ដូចជាគ្រឿងសាច់ បន្លែ ជ្រក់ ទឹកកក លុះដល់ពេលល្ងាចបន្តិចទើបលោកចេញលក់ ហើយលក់រហូតដល់យប់ម៉ោង ២ទាបភ្លឺទើបត្រឡប់ចូលផ្ទះវិញ។
យ៉ាងណាក៏ដោយ សម្រាប់មុខរបរមួយនេះហាក់មានភាពហត់នឿយបន្តិច ប៉ុន្តែលោកសប្បាយចិត្តក្នុងការធ្វើជាប្រចាំ ត្បិតវាជាប្រភពចំណូលចម្បងប្រចាំគ្រួសារ ណាមួយជាមុខរបរស្របច្បាប់ ប្រកបដោយភាពថ្លៃថ្នូរ និងអាចរកចំណូលបានច្រើនគួរសមផងដែរ៕
Account
Security
Favourite Content