សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ក្រសួងការពារជាតិអាម៉េរិក បានទុកពេលត្រឹម ២១ ថ្ងៃ ឱ្យក្រុមហ៊ុនផលិតអាវុធធំៗ ដាក់ជូនផែនការលម្អិតសម្រាប់ពន្លឿនការផលិតសព្វាវុធសំខាន់ៗ ខណៈស្តុកមីស៊ីលរបស់អាម៉េរិកបានធ្លាក់ចុះយ៉ាងខ្លាំង បន្ទាប់ពីការប្រើប្រាស់សព្វាវុធក្នុងប្រតិបត្តិការយោធានៅមជ្ឈិមបូព៌ានាពេលថ្មីៗនេះ។
យោងតាមសារព័ត៌មាន Defense News ក្នុងលិខិតផ្លូវការមួយកាលពីដើមខែសីហា អនុរដ្ឋមន្ត្រីការពារជាតិអាម៉េរិក លោក Steve Feinberg បានកំណត់ពេល ២១ ថ្ងៃ ឱ្យថ្នាក់ដឹកនាំក្រុមហ៊ុនផលិតសព្វាវុធក្នុងវិស័យការពារជាតិ ដាក់ស្នើផែនការលម្អិតអំពីកាលវិភាគប្រគល់ទំនិញ និងវិធីបង្កើនសមត្ថភាពផលិតកម្មឱ្យបានលឿនជាងមុន សម្រាប់សព្វាវុធសំខាន់ៗ។
លោក Feinberg បានគូសបញ្ជាក់ថា រយៈពេលផលិតដែលត្រូវការច្រើនឆ្នាំដូចកាលពីមុន មិនអាចទទួលយកបានទៀតឡើយ។ លោកក៏បានអំពាវនាវឱ្យក្រុមហ៊ុនផលិតអាវុធធំៗ ដូចជា Lockheed Martin, Boeing និង RTX បង្ហាញការប្តេជ្ញាចិត្តផ្នែកហិរញ្ញវត្ថុ តាមរយៈការកែសម្រួល និងពង្រីករោងចក្រ ព្រមទាំងការវិនិយោគទុនផ្ទាល់ខ្លួន។
អ្នកនាំពាក្យក្រសួងការពារជាតិ លោក Sean Parnell បានបញ្ជាក់ថា ការឆ្លើយតបរបស់វិស័យឯកជននឹងចូលរួមដោយផ្ទាល់ក្នុងការរៀបចំសំណើថវិកាឆ្នាំ ២០២៨ របស់ក្រសួងការពារជាតិអាម៉េរិក។
ការជំរុញឱ្យពន្លឿនសមត្ថភាពផលិតកម្មនេះ កើតឡើងបន្ទាប់ពីអាម៉េរិកបានប្រើប្រាស់សព្វាវុធទំនើបៗក្នុងបរិមាណច្រើន អំឡុងជម្លោះជាមួយអ៊ីរ៉ង់ ដែលបានធ្វើឱ្យស្តុកមីស៊ីលការពារអាកាសសំខាន់ៗរបស់ខ្លួនធ្លាក់ចុះ។
តាមការវិភាគរបស់មជ្ឈមណ្ឌលសិក្សាយុទ្ធសាស្ត្រ និងអន្តរជាតិ (CSIS) ស្តុកមីស៊ីលការពារអាកាស Patriot របស់អាម៉េរិកបានធ្លាក់ចុះពីប្រមាណ ២,៣០០ គ្រាប់ មកនៅត្រឹមតិចជាង ៨៣០ គ្រាប់។ ចំណែកស្តុកមីស៊ីល THAAD ក៏បានធ្លាក់ចុះជិតពាក់កណ្តាល ដោយនៅសល់តិចជាង ៣០០គ្រាប់ប៉ុណ្ណោះ។
ជាមួយគ្នានេះ ការផលិតមីស៊ីលជំនួសតាមវដ្តផលិតកម្មធម្មតាត្រូវការពេលប្រមាណ ៤២ ខែ សម្រាប់ប្រព័ន្ធ Patriot និងរហូតដល់ ៥៣ ខែ សម្រាប់ប្រព័ន្ធ THAAD។ កត្តានេះបានជំរុញឱ្យអាម៉េរិកត្រូវការពន្លឿនផលិតកម្មក្នុងវិស័យការពារជាតិ ដើម្បីបំពេញស្តុកឡើងវិញ និងរក្សាសមត្ថភាពឆ្លើយតបក្នុងករណីមានប្រតិបត្តិការយោធានាពេលអនាគត។
ក្នុងការពង្រឹងការផ្គត់ផ្គង់សព្វាវុធ ក្រុមហ៊ុន RTX ទើបទទួលបានកិច្ចសន្យាតម្លៃ ៤៤២ លានដុល្លារ ពីកងទ័ពជើងគោកអាម៉េរិក សម្រាប់ផលិតមីស៊ីល Patriot ប្រភេទ GEM-T ដែលជាកិច្ចសន្យាដ៏សំខាន់មួយសម្រាប់ទីផ្សារក្នុងស្រុក ក្នុងរយៈពេលជាង ៣០ ឆ្នាំមកនេះ។
ក្រុមហ៊ុន L3Harris ដែលជាអ្នកផលិតប្រព័ន្ធរុញច្រាន ក៏បានចុះកិច្ចសន្យាអន្តរកាលរយៈពេលវែងជាមួយក្រសួងការពារជាតិអាម៉េរិក ដើម្បីបង្កើនការផលិតម៉ូទ័ររ៉ុក្កែត សម្រាប់ប្រព័ន្ធ Patriot (PAC-3) និងប្រព័ន្ធ THAAD ផងដែរ៕
Account
Security
Favourite Content