បរទេស ៖ យោងទៅតាមប្រភពព័ត៌មានពី Aljazeera បានរាយការណ៍ថា លោកប្រធានាធិបតីសហរដ្ឋអាមេរិក Joe Biden បានប្រកាសចេញនូវផែនការសេដ្ឋកិច្ចដ៏ទូលំទូលាយមួយឈ្មោះថា “Bidenomics”  ដែលនឹងជួយស្ដារ “ក្តីសុបិនរបស់អាមេរិក ឬ American Dream” មកវិញ។

កាលពីថ្ងៃពុធ សប្ដាហ៍នេះ នៅក្នុងការថ្លែងសុន្ទរកថាពីទីក្រុង Chicago លោក Joe Biden បានគូសបញ្ជាក់ពីផែនការសេដ្ឋកិច្ចរបស់ខ្លួនឈ្មោះថា “Bidenomics” ដែលជាគោលនយោបាយសេដ្ឋកិច្ចនេះនឹងផ្តោតលើការជំរុញជីវភាពក្រុមវណ្ណៈកណ្តាល  និង ប្រឆាំងទៅលើទ្រឹស្តី​ ‘trickle-down’ ដែលជាទ្រឹស្តីកាត់ផ្តាច់ពន្ធ ឬ ផ្តល់អត្ថប្រយោជន៍ផ្សេងទៀតសម្រាប់អ្នកមាន។

ទ្រឹស្តី​ ‘trickle-down’ គឺជាចំណុចស្នូលនៃគោលនយោបាយរបស់អតីតប្រធានាធិបតី Ronald Reagan ដែលនិយាយអំពីការកាត់បន្ថយពន្ធសម្រាប់ក្រុមហ៊ុនអ្នកមាន និងក្រុមហ៊ុនធំៗ ហើយផ្តល់អត្ថប្រយោជន៍​ដល់​ប្រជាជន​វណ្ណៈ​កណ្តាល និង វណ្ណៈ​កម្មករ ដែល​ជំរុញ​កំណើន​សេដ្ឋកិច្ច​កាន់តែ​ទូលំទូលាយ។ ទោះជាយ៉ាងណាក៏ដោយ អ្នកជំនាញជាច្រើនបានជំទាស់ទៅនឹងប្រសិទ្ធភាពនៃការអនុវត្តទ្រឹស្តីមួយនេះ។

យោងទៅតាមប្រភពព័ត៌មានពី CNN បានបង្ហាញថា គោលការណ៍សំខាន់ ៣ ដែល Bidenomics ផ្តោតទៅលើមានដូចជា៖ ការវិនិយោគសាធារណៈនៅអាមេរិក, ការពង្រឹង និង ផ្តល់ការអប់រំដល់អ្នកធ្វើការ, និង ការលើកកម្ពស់ការប្រកួតប្រជែង។ នៅក្នុងការវិនិយោគសាធារណៈ រដ្ឋបាល Biden នឹងផ្តោតលើហេដ្ឋារចនាសម្ព័ន្ធ ថាមពលស្អាត និង វិស៏យឈីប semiconductor ហើយកិច្ចខិតខំប្រឹងប្រែងនេះមានគោលបំណងទាក់ទាញការវិនិយោគឯកជន។ ចាប់តាំងពីឆ្នាំ ២០២១ មក ការចំណាយលើការសាងសង់លើរោងចក្រផលិតបានកើនឡើងទ្វេដង។ កាលពីដើមសប្តាហ៍នេះ លោក Biden បានគូសបញ្ជាក់ពីរបៀបដែលរដ្ឋនានានឹងទទួលបានថវិកាប្រហែលជាង ៤២ ពាន់លានដុល្លារសម្រាប់សេវាអ៊ីនធឺណិតល្បឿនលឿន ដែលជាផ្នែកនៃច្បាប់ហេដ្ឋារចនាសម្ព័ន្ធឆ្នាំ ២០២១ ។

មិនត្រឹមតែប៉ុណ្ណោះ រដ្ឋបាល Biden នឹងចាត់វិធានការដើម្បីរៀបចំការងារនាពេលអនាគតសម្រាប់អ្នកធ្វើការ រួមទាំងអ្នកដែលមិនត្រូវការសញ្ញាបត្រមហាវិទ្យាល័យរយៈពេលបួនឆ្នាំផងដែរ ដោយលោកប្រធានាធិបតី​បាន​គាំទ្រ​សហជីព និង ការ​បង្កើត​កម្មសិក្សា  ថ្មីៗនេះគាត់បានទៅទស្សនាមហាវិទ្យាល័យសហគមន៍នៅរដ្ឋ North Carolina ដើម្បីពិភាក្សាអំពីការបណ្តុះបណ្តាលការងារនៅក្នុងការផលិតកម្រិតខ្ពស់ ហើយបានកត់សម្គាល់ពីការវិនិយោគចំនួន ៥០០ លានដុល្លារនៅក្នុងកម្មវិធី Good Jobs Challenge ដែលជាផ្នែកមួយនៃផែនការសង្គ្រោះរបស់អាមេរិក។ ស្របពេលនេះដែរ កម្លាំងពលកម្មគឺខ្ពស់ជាងកាលពីជាង ២០ ឆ្នាំមុន ដោយសារប្រាក់ឈ្នួលប្រសើរជាងមុន អត្ថប្រយោជន៍ និងកាលវិភាគកាន់តែល្អប្រសើរជាងមុនផងដែរ។ ការផ្តោតសំខាន់មួយទៀតនោះគឺ កាលើកកម្ពស់ការប្រកួតប្រជែង ដោយលោកប្រធានាធិបតីផ្តោតទៅលើការជំរុញការប្រកួតប្រជែងដើម្បីកាត់បន្ថយការចំណាយ និង​កម្រិតទីផ្សារសម្រាប់អាជីវកម្មខ្នាតតូច។ កាលពីខែមករាកន្លងទៅនេះ គណៈកម្មការសហព័ន្ធពាណិជ្ជកម្មបានស្នើច្បាប់មួយ ដើម្បីហាមឃាត់និយោជកពីការដាក់កិច្ចព្រមព្រៀងដែលមិនប្រកួតប្រជែងលើនិយោជិត និងដើម្បីលុបចោលកិច្ចព្រមព្រៀងដែលមានស្រាប់ទាំងអស់។ ដូចគ្នានេះផងដែរ លោកប្រធានាជិបតីបានគូសបញ្ជាក់ពីច្បាប់កាត់បន្ថយអតិផរណា ដែលនឹងកាត់បន្ថយតម្លៃអាំងស៊ុយលីន ៣៥ ដុល្លារក្នុងមួយខែសម្រាប់អ្នកចុះឈ្មោះ Medicare៕