មិនដល់ប៉ុន្មានខែទៀតទេ ពិភពលោកនឹងខិតចូលមកដល់ឆ្នាំ២០២៥ ដែលគ្រប់គ្នាសង្ឃឹមថាស្ថានភាពធ្វើអាជីវកម្ម និងពាណិជ្ជកម្មសកលនឹងអាចល្អប្រសើរឡើងវិញ។ ដោយឡែក ចំពោះម្ចាស់អាជីវកម្មនានា ទាំងចាស់ និងថ្មី កំពុងត្រៀមយុទ្ធសាស្ត្រ និងផែនការសម្រាប់ឆ្នាំថ្មីនេះហើយដោយក្នុងនោះយុទ្ធសាស្ត្របង្កើនម៉ាកយីហោ ឬយើងហៅថា Branding ក៏កំពុងវិវត្តទៅមុខដូចគ្នា។

Branding សម្រាប់គ្រានេះអាចទទួលរងនូវឥទ្ធិពលជាច្រើនពីការរីកចម្រើនដ៏ខ្លាំងក្លានៃវិស័យបច្ចេកវិទ្យា ការផ្លាស់ប្តូរនៃឥរិយាបថប្រើប្រាស់ទំនិញរបស់អតិថិជន ក៏ដូចជាទំនោរនៃសង្គមសេដ្ឋកិច្ចផង។ ដូចនេះ របៀបនៃការបង្កើត ឬបង្កើនម៉ាកយីហោសម្រាប់ឆ្នាំ២០២៥នេះនឹងមិនមានលក្ខណៈដូចគ្នាទាំងអស់ដូចកាលពីប៉ុន្មានឆ្នាំមុនទៀតឡើយ។ ខាងក្រោមនេះជាការរំពឹងទុកថ្មីទៅលើកត្តារៀបចំម៉ាកយីហោសម្រាប់ម្ចាស់អាជីវកម្មនាឆ្នាំក្រោយដែលយើងមិនគួរមើលរំលង ក្នងនោះមាន ២ចំណុចសំខាន់ៗដែលអ្នកគួរតែពិចារណា និងយកចិត្តទុកដាក់ជាសំខាន់ ៖

ការធ្វើម៉ាកយីហោដែលគាំទ្រកាន់តែខ្លាំងឡើងដោយបច្ចេកវិទ្យា AI (The Rise of AI-Driven Branding)

បច្ចេកវិទ្យា AI ឬ Artificial Intelligence បានជ្រាបចូលក្នុងសកម្មភាពនានានៃការបង្កើត​ម៉ាកយីហោ​រួច​ទៅ​ហើយចាប់តាំងតែពីការធ្វើ​ទីផ្សារ​ផ្ទាល់ខ្លួន និងទៅដល់​សេវាកម្មដល់ដៃ​អតិថិជន។ នៅឆ្នាំក្រោយនេះ យីហោដែលជំរុញដោយ AI ត្រូវបានគេរំពឹងថានឹងកាន់តែទំនើបជាងមុន មានប្រសិទ្ធភាពជាងមុន និងប្រកបដោយភាគច្នៃប្រឌិត។

របៀបនៃការបង្កើតម៉ាកយីហោនឹងអាចប្រើប្រាស់ AI ដើម្បីធ្វើជាការវិភាគទិន្នន័យអ្នកប្រើប្រាស់ដើម្បីអាចផ្តល់ឲ្យអតិថិជននូវបទពិសោធន៍ផ្ទាល់ខ្លួនដ៏ល្អស្របតាមចំណង់ចំណូលចិត្ត និងតម្រូវការរបស់បុគ្គលម្នាក់ៗ។ ដូច្នេះម្ចាស់អាជីវកម្មមិនគួរនៅស្ងៀម ហើយមិនសិក្សាស្វែងយល់ពីបច្ចេកវិទ្យា AI មួយចំនួនដែលអាចជួយជំរុញប្រសិទ្ធភាពលក់ ឬបម្រើសេវាកម្មជូនអតិថិជនរបស់ខ្លួនឡើយបូករួមទាំងពីការសរសេរអត្ថបទដោយ AI និងការបង្កើតរូបភាពវិដេអូដោយ AI ជាដើមផង។

និរន្តភាពក្លាយទៅជាតម្លៃស្នូលនៃយុទ្ធសាស្ត្រធ្វើម៉ាកយីហោ (Sustainability as a Core Brand Value)

ពាក្យថានិរន្តភាពនេះគឺជាក្តីបារម្ភរបស់ពិភពលោកទាំងមូលនាប៉ុន្មានទសវត្សរ៍ចុងក្រោយនេះ ពីព្រោះថាវាបានបង្កឲ្យមានការប្រែប្រួលអាកាសធាតុធ្ងន់ធ្ងរជារៀងរាល់ឆ្នាំ។ ដូច្នេះ សម្រាប់ឆ្នាំ២០២៥ខាងមុខនេះ អតិថិជនគ្រប់ទីកន្លែង គ្រប់តំបន់ និងកាន់តែច្រើនឡើងពួកគេមិនអាចបំភ្លេចចោលបានឡើយនូវការជ្រើសយកការរស់នៅដែលផ្តល់អាទិភាពបំផុតដល់បញ្ហាបរិស្ថាន និងទំនួលខុសត្រូវចំពោះសង្គម។ នេះជាកត្តាស្នូលសម្រាប់ម្ចាស់អាជីវកម្ម និងក្រុមហ៊ុនផលិតផលគ្រប់ប្រភេទដែលត្រូវតែគិតគូរឡើងវិញអំពីគុណភាព និងផលប៉ះពាល់នៃផលិតផលរបស់ខ្លួនចំពោះបរិស្ថាន។ ករណីចាំបាច់ត្រូវតែវិនិយោគទៅលើប្រព័ន្ធផលិតកម្មឡើងវិញ ពួកគេត្រូវតែធ្វើ ពីព្រោះថា មិនដូច្នេះទេ ការប្រកួតប្រជែងទីផ្សារនឹងកាន់តែលំបាកឡើងទោះបីជាផលិតផលរបស់អ្នកធ្លាប់ស្ថិតនៅក្នុងទីផ្សារអស់រយៈពេលយ៉ាងយូរបែបណាក្តី៕

ជាដំណោះស្រាយតាមដំណាក់កាល អ្នកគួរចាប់ផ្តើមធ្វើការពិនិត្យឡើងវិញចំពោះកម្រិតនៃនិរន្តរភាពនៃម៉ាកយីហោ និងសង្វាក់ផ្គត់ផ្គង់របស់អ្នក។ កំណត់តំបន់ដែលអ្នកអាចកាត់បន្ថយការបោះជំហានទៅមុខដែលប៉ះពាល់បរិស្ថាន និងបង្កើនទំនួលខុសត្រូវសង្គមរបស់អ្នកផងដែរ។

ដំណាក់កាលចុងក្រោយ ប្រើប្រាស់បណ្តាញទំនាក់ទំនងដើម្បីផ្សព្វផ្សាយអំពីកិច្ចខិតខំប្រឹងប្រែងប្រកបដោយនិរន្តរភាពរបស់អ្នកដោយតម្លាភាពទៅកាន់ទស្សនិកជន ឬអតិថិជនរបស់អ្នកតាមរយៈការផលិតជាសាច់រឿង ការវេចខ្ចប់ និងប្រព័ន្ធផ្សព្វផ្សាយសង្គមជាដើម៕