សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្រុមគ្រូពេទ្យវះកាត់ជនជាតិចិនថ្មីៗនេះ បានទទួលជោគជ័យក្នុងការវះកាត់ដាក់ឧបករណ៍ភ្ជាប់ខួរក្បាលនឹងកុំព្យូទ័រ (BCI ឬ brain-computer interface) ជាលក្ខណៈពាណិជ្ជកម្មដំបូងគេបង្អស់លើពិភពលោកទៅលើអ្នកជំងឺម្នាក់ ដែលវាត្រូវបានគេមើលឃើញថាគឺជាជំហានមួយក្នុងការយកឈ្នះក្រុមហ៊ុន Neuralink របស់លោក Elon Musk នាំយកបច្ចេកវិទ្យាវេជ្ជសាស្ត្រដ៏ទំនើបនេះមកកាន់ទីផ្សារនៅពេលអនាគត។
យោងតាមអត្ថបទមួយដែលត្រូវបានចេញផ្សាយដោយកាសែតរុស្សី RT បានបញ្ជាក់ថា ការវះកាត់ជាប្រវត្តិសាស្ត្រនេះ បានធ្វើឡើងនៅមន្ទីរពេទ្យមួយក្នុងក្រុងស៊ាងហៃទៅលើអ្នកជំងឺម្នាក់ដែលបានបាត់បង់សមត្ថភាពចលនាដៃ ដោយសារគ្រោះថ្នាក់ចរាចរណ៍កាលពី ១០ ឆ្នាំមុន។
ឧបករណ៍នេះមានឈ្មោះថា NEO ត្រូវបានបង្កើតឡើងដោយក្រុមហ៊ុនបច្ចេកវិទ្យាវេជ្ជសាស្ត្រចិន Neuracle។ ឧបករណ៍ដែលមានទំហំប៉ុនកាក់ ហើយត្រូវបានដាក់នៅលើផ្ទៃនៃខួរក្បាល។
ខុសពីបច្ចេកវិទ្យារបស់ Neuralink ដែលតម្រូវឱ្យមានរ៉ូបូតវះកាត់ដើម្បីដោតសរសៃអំបោះឆ្មារៗចូលទៅក្នុងសាច់ខួរក្បាលឧបករណ៍របស់ NEO នេះមិនមានផលប៉ះពាល់ដល់សាច់ខួរក្បាលឡើយ ពោលគឺវាស្ថិតនៅផ្នែកខាងក្រៅនៃខួរក្បាល ដើម្បីចាប់យកសញ្ញាប្រព័ន្ធប្រសាទរួចបញ្ជូនទៅកាន់កុំព្យូទ័រ ដើម្បីបកប្រែទៅជាបញ្ជាចលនាសម្រាប់ភ្ជាប់ចុងក្រោយទៅស្រោមដៃដែលជាម៉ាស៊ីនរ៉ូបូតរបស់អ្នកជំងឺ។
ក្រុមបុគ្គលិកមន្ទីរពេទ្យបានរាយការណ៍ថា ការវះកាត់បានប្រព្រឹត្តទៅយ៉ាងរលូនតាមការគ្រោងទុក។ បច្ចុប្បន្ន អ្នកជំងឺកំពុងសម្រាកព្យាបាលដោយមានសញ្ញាជីវិតមានស្ថេរភាពល្អ ហើយបន្ទះឈីបនោះបានចាប់ផ្ដើមចាប់យកសញ្ញាសកម្មភាពខួរក្បាលប្រកបដោយគុណភាពខ្ពស់។សមិទ្ធផលដ៏សំខាន់នេះ បានធ្វើឱ្យប្រទេសចិនដើរមុនគូប្រជែងលោកខាងលិច ក្នុងការធ្វើពាណិជ្ជកម្មលើបច្ចេកវិទ្យាប្រព័ន្ធប្រសាទ។
ទោះបីជាក្រុមហ៊ុន Neuralink បានជោគជ័យក្នុងការសាកល្បងដាក់បន្ទះឈីបលើមនុស្សក៏ដោយ ប៉ុន្តែក្រុមហ៊ុននេះមិនទាន់ទទួលបានការអនុម័តជាផ្លូវការសម្រាប់លក់ជាលក្ខណៈពាណិជ្ជកម្មពីស្ថាប័នគ្រប់គ្រងរបស់សហរដ្ឋអាមេរិកនៅឡើយទេ។
ចំណែកឯឧបករណ៍ NEO របស់ក្រុមហ៊ុន Neuracleវិញ ទទួលបានការអនុម័តឱ្យប្រើប្រាស់ជាលក្ខណៈពាណិជ្ជកម្មពីស្ថាប័នគ្រប់គ្រងវេជ្ជសាស្ត្រចិនតាំងពីខែមីនាមកម្ល៉េះ ដែលអនុញ្ញាតឱ្យមន្ទីរពេទ្យនានាអាចទិញ និងប្រើប្រាស់ប្រព័ន្ធនេះភ្លាមៗសម្រាប់អ្នកជំងឺដែលរងរបួសខួរឆ្អឹងខ្នង និងបញ្ហាជំងឺខ្វិនអវយវៈជាដើម។
ខណៈពេលដែលក្រុមអ្នកស្រាវជ្រាវបានព្យាករណ៍ថា ឧបករណ៍ BCI អាចនឹងពង្រីកវិសាលភាពទៅលើឧបករណ៍អេឡិចត្រូនិក និងមនុស្សយន្តនាពេលអនាគត ការផ្តោតអារម្មណ៍ចម្បងនាពេលបច្ចុប្បន្ននៅតែជាផ្នែកព្យាបាល ដែលផ្តល់ក្តីសង្ឃឹមថ្មីសម្រាប់អ្នកជំងឺទាំងឡាយណាដែលចង់វិលត្រឡប់មកមានដំណើរការឡើងវិញ ក្រោយពេលរងរបួសប្រព័ន្ធប្រសាទធ្ងន់ធ្ងរ៕
Account
Security
Favourite Content