ភ្នំពេញ៖​ សមាគមសហគ្រិនវ័យក្មេងកម្ពុជា (YEAC) និងអង្គការបណ្តាញសហគ្រិនសកលកម្ពុជា (GEN Cambodia) បានរៀប​ចំធ្វើទិវាសហគ្រិនភាពកម្ពុជាឆ្នាំ២០២៤ ក្រោមប្រធានបទ «វិនិយោគលើ សហគ្រិនវ័យក្មេងដើម្បីសេដ្ឋកិច្ចថាមវន្ត និងបរិយាប័ន្ន» នាព្រឹកថ្ងៃទី៣០ ខែធ្នូ ឆ្នាំ២០២៤ នៅវិទ្យាស្ថានបច្ចេកវិទ្យាកម្ពុជា (សាលាតិចណូ)។

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម តំណាងឯកឧត្តមអគ្គបណ្ឌិត​សភា​ចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានថ្លែងថា ៖ ប្រធានបទនៃទិវាសហគ្រិនភាពកម្ពុជាឆ្នាំនេះ បានសបញ្ជាក់ពីតួនាទីដ៏សំខាន់របស់​សហគ្រិនវ័យក្មេងក្នុងការបង្កើតការប្រកួតប្រជែងលើអាជីវកម្ម ពាណិជ្ជកម្មប្រកបដោយការច្នៃប្រឌិតបណ្តុះនូវឯកទេស និងជំនាញជាក់លាក់ ក្តាប់បាននូវឱកាសថ្មីៗនៃការធ្វើធុរកិច្ចនិងវិនិយោគ ជាពិសេសការធ្វើការពាណិជ្ជូបនីយកម្មឌីជីថល។

លោកជំទាវរដ្ឋមន្ត្រី បានបន្ថែមថា វេទិកានេះនឹងផ្តល់នូវសារៈសំខាន់ជាសារវន្ត ទាំងលើការចែករំលែកព័ត៌មាន បទពិសោធន៍ល្អៗពីវាគ្មិននិងតួអង្គពាក់ព័ន្ធ ព្រមទាំងកសាងនូវបណ្តាញទំនាក់ទំនងគ្នាកាន់តែប្រសើរដល់អ្នកចូលរួមទាំងអស់ផងដែរ។

លោកជំទាវរដ្ឋមន្ត្រីបានគូសបញ្ជាក់ថា៖

« សហគ្រិនវ័យក្មេង ប្រកបដោយថាមវន្ត និងវិស័យឯកជន ដែលរឹងមាំ គឺជាតួអង្គដែលមិនអាច​ខ្វះបានក្នុងការអភិវឌ្ឍសេដ្ឋកិច្ចព្រោះសហគ្រិន ម្ចាស់អាជីវកម្មនិងវិស័យឯកជនគឺជាសរសៃឈាមនៃសេដ្ឋកិច្ចកម្ពុជាយើង» ។

លោកជំទាវរដ្ឋមន្ត្រីបានលើកទឹកចិត្ត និងស្នើឱ្យវិនិយោគិន សមាជិកសហគ្រិនវ័យក្មេង សហគ្រាសធុនមីក្រូ តូច និងមធ្យម រួមគ្នាសិក្សាស្វែងយល់ពីបញ្ហាប្រឈម និងស្វែងរកដំណោះស្រាយ ព្រមទាំងបន្តអភិវឌ្ឍសមត្ថភាព និងឯកទេសនីយកម្មរបស់ខ្លួនដោយត្រូវតាមឱ្យទាន់ការវិវត្តន៍របស់វិទ្យាសាស្រ្ត បច្ចេកវិទ្យា សេដ្ឋកិច្ច-សង្គមដែលមានការប្រែប្រួលយ៉ាងឆាប់រហ័ស ការប្រកួតប្រជែងក្នុងយុគ្គសម័យ ឌីជីថល។ លើសពីនេះ ចាំបាច់ត្រូវរួមសហការគ្នាប្រកបដោយភាពបុរេសកម្ម និង អន្តរសកម្មបំផុតក្នុងការចាប់យកនូវកាលានុវត្តភាពជាសក្តានុពល ដើម្បីជំរុញកំណើនសេដ្ឋកិច្ច-ពាណិជ្ជកម្ម និងលើកកម្ពស់សុខមាលភាពសង្គមឱ្យកាន់តែប្រសើរ។

ឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា (YEAC) បានមានប្រសាសន៍ឱ្យដឹងថា នេះជាលើកទី១១ហើយដែលសមាគមសហគ្រិនវ័យក្មេងកម្ពុជា រួមជាមួយ អង្គការបណ្តាញសហគ្រិនភាពសកលកម្ពុជា ប្រារព្ធទិវានេះនៅប្រទេសកម្ពុជា តាំងពីឆ្នាំ២០១៣មកម៉្លេះ។ស្ថាប័នទាំងពីរត្រូវបានទទួលស្គាល់ជាម្ចាស់ផ្ទះផ្លូវការ(official host) នៃការរៀបចំទិវានេះដែលហៅថាទិវាសប្តាហ៍សហគ្រិនភាពសកលកម្ពុជា។ ទិវានេះមិនត្រឹមតែរៀបចំឡើងនៅក្នុងព្រះរាជាណាចក្រកម្ពុជានោះទេ តែ គឺជាការអបអរសាទរដ៏ធំបំផុត ដែលរៀបចំឡើងស្របពេលគ្នា នៅទូទាំងពិភពលោក។ ដោយឡែកសម្រាប់ឆ្នាំ ២០២៤នេះ សមាគមសហគ្រិនវ័យក្មេងកម្ពុជា រួមជាមួយ អង្គការបណ្តាញសហគ្រិនភាពសកលកម្ពុជា បានរៀបចំទិវានេះឡើង នៅតាមខេត្តមួយចំនួន៩ និងសកលវិទ្យាល័យចំនួន២ផងដែរ។

ប្រធានសមាគមសហគ្រិនវ័យក្មេងកម្ពុជា បានគូសបញ្ជាក់ថា៖

«ការវិនិយោគលើសហគ្រិនវ័យក្មេងដើម្បីសេដ្ឋកិច្ចប្រកបដោយថាមវន្ត និងបរិយាបន្ន គឺជាមូលបទដ៏សំខាន់ សម្រាប់ទិវាសហគ្រិនភាពកម្ពុជានាឆ្នាំនេះ ក្នុងគោលបំណងលើកកម្ពស់ការយល់ដឹងដល់សហគ្រិន ម្ចាស់អាជីវកម្ម ជាពិសេស ក្នុងចំណោមនិស្សិតដែលនឹងក្លាយជាសហគ្រិននាពេលអនាគ បានស្វែងយល់ស៊ីជម្រៅអំពីការវិនិយោគ តាមរយៈការរៀបចំនូវកម្មវិធីជាច្រើននៅក្នុងថ្ងៃនេះ។ ប្រធានបទនៅឆ្នាំនេះពិតជាពិសេសដោយហេតុ​ថាប្រធានបទស្របនឹងគោលនយោបាយរបស់កម្ពុជាយើងនោះគឺការលើកទឹកចិត្តផ្នែកវិនិយោគទាំងក្នុងស្រុកក្នុងតំបន់ និងអន្តរជាតិ ដែលបង្ករភាពងាយស្រួលដល់ការវិនិយោគ បង្កើតបរិយាកាសវិនិយោគមានអំណោយផល និងជាពិសេសកំណើនសេដ្ឋកិច្ចប្រកបដោយចីរភាពនៅក្នុងប្រទេស»។

សមាគមសហគ្រិនវ័យក្មេងកម្ពុជា មានតួនាទី ស្វែងរកប្រភពហិរញ្ញប្បទានសម្រាប់សមាជិក,អភិវឌ្ឍសហគ្រិនភាពតាមរយៈសេដ្ឋកិច្ចឌីជីថល នវានុវត្តnន៍ និងសេដ្ឋកិច្ចច្នៃប្រឌិត ,ចូលរួមជាមួយក្រសួងពាក់ព័ន្ធកសាងគោលនយោបាយអាជីវកម្មពេញលេញកសាងសមត្ថភាពសហគ្រិន ស្វែងរកទីផ្សារជូនសមាជិកនិង ធានានិរន្តរភាព និងការរីកចម្រើនរបស់សមាគម និងសមាជិក។

លោកឧកញ៉ា បានលើកឡើងថា៖សមាគមសហគ្រិនវ័យក្មេងកម្ពុជាចង់ឃើញសហគ្រិន និងពាណិជ្ជករកម្ពុជាទាំងអស់ប្រកបរបរ អាជីវកម្មប្រកបដោយ នវានុវត្តន៏ បរិយាប័ន្ន និងមានស្ថិរភាពល្អ ហើយចូលរួមចំណែកជាវិជ្ជមានក្នុងការអភិវឌ្ឍប្រទេសជាតិ។

បច្ចុប្បន្ននេះ សមាគមសហគ្រិនវ័យក្មេងកម្ពុជា មានសមាជិកចំនួន ៦០០នាក់ ដែលតំណាងឱ្យក្រុមហ៊ុនចំនួនប្រហែល១៨០០ក្រុមហ៊ុន ក្នុងរាជធានីភ្នំពេញ ខេត្តសៀមរាប ខេត្តបន្ទាយមានជ័យ ខេត្តបាត់ដំបង ខេត្តកំពង់ចាម ខេត្តត្បូងឃ្មុំ ខេត្តក្រចេះ ខេត្តព្រះសីហនុ កំពត និងខេត្ត កែប ហើយកំពុងរៀបចំ សាខាសមាគម ក្នុង ខេត្តកោះកុង ខេត្ត កំពង់ស្ពឺ ខេត្តពោធិសាត់ ខេត្តកំពង់ធំ និងខេត្តព្រៃវែង។ សមាគមសហគ្រិនវ័យក្មេងកម្ពុជា ដាក់គោលដៅបើកសាខាសមាគមឱ្យបានគ្រប់ រាជធានីខេត្តនៃព្រះរាជាណាចក្រកម្ពុជាត្រឹមដំណាច់ឆ្នាំ២០២៦ដើម្បីចងក្រងសហគ្រិនវ័យ ក្មេងទូទាំងប្រទេសចូលរួមជាប្រតិបត្តិករសេដ្ឋកិច្ចអភិវឌ្ឍសហគ្រិន​ភាព និងលើកម្ពស់សេដ្ឋកិច្ចជាតិ៕