សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
លោក ស្រ៊ុន ពៅ ប្រធានសមាគមចិញ្ចឹមសត្វកម្ពុជា បានជំរុញឲ្យប្រជាកសិករពិចារណាលើករាចិញ្ចឹមគោ ឬក្របីដើម្បីយកសាច់លក់ ដោយសារការចិញ្ចឹមសត្វពាហនៈទាំងនេះនឹងផ្តល់ផលចំណេញច្រើន ព្រមទាំងធននឹងជំងឺទៀតផង។
អ្នកជំនាញផ្នែកចិញ្ចឹមសត្វរូបនេះ បានលើកឡើងថា ការចិញ្ចឹមគោ ឬក្របីយកសាច់លក់ លក្ខណៈកសិដ្ឋានតាមបច្ចេកទេសអាចផ្តល់ផលចំណេញខ្ពស់ជាងការចិញ្ចឹមមាន់ទា ឬជ្រូក ដោយសារសត្វប្រភេទទាំងពីរនេះវាធន់នឹងជំងឺជាងមាន់ទា ឬជ្រូក។
លោក ស្រ៊ុន ពៅ បានបញ្ជាក់យ៉ាងដូច្នេះថា ៖
«បាបញ្ហាទី១ បញ្ហាទី២ គោឥឡូវគេឱ្យស៊ីចំណីដូចជ្រូកចឹង ហើយគោនឹងអត់មានប្រឈមជំងឺអីធ្ងន់ធ្ងរដូចជ្រូកទេ ចឹងមើលទៅសព្វថៃនេះខ្ញុំនៅតែឃើញវិស័យគោលមួយល្អ ថ្ងៃក្រោយទៅគឺអ្នកចិញ្ចឹមគោល្អជាងអ្នកចិញ្ចឹមជ្រូក»។
ប្រធានសមាគមចិញ្ចឹមសត្វកម្ពុជារូបនេះបានរៀបរាប់ថា ការចិញ្ចឹមគោបំប៉នយកសាច់លក់ នឹងធ្វើឲ្យកសិករចំណេញ ២ដងសម្រាប់គោមួយក្បាល គឺទី១ គោទិញចូលសម្រាប់បំប៉នយកសាច់មានតម្លៃទាបជាងពេលលក់ចេញវិញ។ ទី២ ការចិញ្ចឹមបំប៉នក្នុងរយៈពេល ២ ទៅ ៣ខែ គោអាចឡើងគីឡូចាប់ពី ១៥០គីឡូក្រាម ទៅដល់ ៣០០គីឡូក្រាម។
លោក ឆុង ផាត ឈ្មូញទិញគោនៅម្តុំផ្សារថ្នល់បត់ ក្នុងស្រុកសំរោងទង ខេត្តកំង់ស្ពឺ បានមានប្រសាសន៍ថា ជាធម្មតា ទិញគោនៅតូចសម្រាប់ចិញ្ចឹមបំប៉នយកសាច់លក់ក្នុងតម្លៃប្រមាណ ៨៥០០ រៀលក្នុងមួយគីឡូក្រាម។ លុះដល់គោឡើងសាច់ល្មមលក់ លោកអាចលក់ចេញវិញក្នុងតម្លៃ ៩៥០០ រៀល ទៅ ១១០០០រៀល ក្នុងមួយគីឡូក្រាម។
លោក ឆុង ផាត បានបញ្ជាក់ដូច្នះថា ៖
«គោ បើយើងនិយាយអោយចំទៅតាមតែយើងចេះចិញ្ចឹម ចេះថែទាំ យើងទិញចូលក្នុងតម្លៃ ៨៥០០ ហើយយើងលក់ទៅវិញ ៨៥០០ ឬ ៩០០០ ក៍យើងនៅចំណេញដែរ ព្រោះគោពេលណាយើងទិញយកមកនៅតូច ទម្ងន់នៅតិច លុះពេលយើងលក់ចេញ វាបានឡើងទម្ងន់ វាធំជាងមុន ដូច្នេះ វានៅតែចំណេញ»។
លោក តេង សុភក្រ្ត ម្ចាស់កសិដ្ឋានចិញ្ចឹមក្របី នៅក្នុងឃុំចំបក់ ស្រុកព្រែកប្រសប់ ខេត្តក្រចេះ បានមានប្រសាសន៍ថា ចំពោះការចិញ្ចឹមក្របីមានភាពងាយស្រួលជាងការចិញ្ចឹមគោ ដោយសារក្របីធន់ជំងឺ និងងាយស្រួលផ្តល់ចំណីជាងគោ។ ក្របីអាយុ ៣ឆ្នាំ គេអាចលក់បានចន្លោះពី ២លាន ៥សែនរៀល ទៅដល់ ៣លានរៀល ក្នុងមួយក្បាល ជាពិសេស សត្វក្របីមានទីផ្សារល្អដែលគេអាចនាំចេញទៅប្រទេសវៀតណាមច្រើន។
លោកបានបញ្ជាក់ថា ៖
« ឱ្យតែមាន មិនខ្លាចអត់ទីផ្សារនោះទេ គ្រាន់តែថា ពេលខ្លះលក់បានថ្លៃ ពេលខ្លះអាចធ្លាក់ថ្លៃបន្តិច មុនលក់បានមួយក្បាល៤លានរៀល តែឥលូវបានត្រឹមជាង ៣លានរៀល ប៉ុន្តែបន្តិចទៀតអាចឡើងថ្លៃវិញដូចដើមវិញហើយ»។
ពាក់ព័ន្ធទៅនឹងទីផ្សារសាច់គោ និងក្របីនេះដែរ អ្នកជំនាញកសិកម្ម បានផ្តល់យោបល់ឲ្យប្រជាកសិករកម្ពុជាគួរងាកមកចិញ្ចឹមគោយកសាច់បែបកសិដ្ឋានដើម្បីធានាគុណភាពសាច់ អនាម័យ និងសុវត្ថិភាព។ ប៉ុន្តែការចិញ្ចឹមបែបកសិដ្ឋានត្រូវការការរៀបចំហេដ្ឋារចនាសម្ព័ន្ធមួយចំនួន ដូចជា ការដាំស្មៅ និងជម្រកត្រឹមត្រូវជាដើម៕
Account
Security
Favourite Content