សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ម្អម ជាប្រភេទបន្លែម្យ៉ាងដែលគេនិយមទទួលទានដោយសារលក្ខណៈពិសេសគឺក្លិនឈ្ងុយរបស់វាដែលគេអាចយកមកបន្ថែមក្នុងសម្លរក៏បាន ឬហូបជាមួយស៊ុបរឹតតែមានឱជារស។ ដោយមើលឃើញពីតម្រូវការទីផ្សាររបស់ម្អម កសិករម្នាក់បានយកដីស្រែរបស់ខ្លួនមកច្នៃដាំម្អម ហើយអាចទទួលបានទិន្នផលល្អ និងមានតម្រូវការទីផ្សារគួរសមដែលក្លាយជាប្រភពចំណូលជួយដល់ជីវភាពគ្រួសារប្រចាំថ្ងៃ។
លោក សយ គីមអៀង ជាកសិករដែលបានកែប្រែពីដីធ្វើស្រែមកដាំម្អមវិញ ស្ថិតនៅក្នុងស្រុកព្រៃឈរ ខេត្តកំពង់ចាម បានរៀបរាប់ឱ្យដឹងថា លោកបានចាប់ផ្ដើមដាំម្អមដោយសារឃើញគេលក់ម្អមទាំងបាច់ៗនៅផ្សារ និងមានតម្រូវការជាហូរហែ ក៏បានសម្រេចចិត្តទិញពូជពីផ្សារមកសាកដាំលើដីប្រមាណ ២អា ហើយឃើញថាទទួលបានផលល្អក៏បន្តដាំរហូតដល់សព្វថ្ងៃ និងពង្រីកការដាំដុះរហូតដល់ប្រមាណ ៧០អា ។
លោកបានបញ្ជាក់ថា ៖
«ម្អម ជាដំណាំដែលងាយស្រួលដាំ ចាយទុនតិច ពិសេស គឺអាចប្រមូលបានច្រើនដង ដោយយើងអាចប្រមូលផលបាន ២០ថ្ងៃជាប់គ្នា ដោយសារវាដុះក្រាស់ ហើយជាធម្មតាអាចកាត់លក់បានជាមធ្យម ២០០ដៃក្នុងមួយថ្ងៃ ដោយ ១០០ដៃ អាចមានតម្លៃ ៥ម៉ឺនរៀល លក់ទៅឱ្យឈ្មួញក្នុងតំបន់ដែលទិញយកទៅលក់បន្តនៅផ្សារជិតៗ ក៏ដូចជាមានម៉ូយផ្សេងទៀតដែលទិញច្រើនៗយកទៅលក់បន្តនៅទីក្រុងក៏មាន»។
លោកបន្តឱ្យដឹងថា ចំពោះការដាំម្អម ហាក់មិនសូវពិបាកប៉ុន្មាននោះទេ ពោលគឺគេត្រូវយកចិត្តទុកដាក់ខ្លាំងនៅពេលដាំដំបូងដែលអាចមានសត្វល្អិតមកស៊ីបំផ្លាញ និងត្រូវការបាញ់ថ្នាំការពារ ជាពិសេសនៅរដូវធ្លាក់ខ្យល់ដែលអាចមានដង្កូវស៊ី។ ក្រៅពីនេះ គេក៏ត្រូវបន្ថែមជីអ៊ុយរេ ដើម្បីបំប៉នដើមម្អមឱ្យលូតលាស់ល្អនៅពេលវាចាប់ផ្ដើមចាប់ឫស លុះរយៈពេល ៤០ថ្ងៃគឺអាចចាប់ផ្ដើមកាត់លក់បានជាបណ្តើរៗ។
ដោយឡែក ចំពោះការរៀបចំដីសម្រាប់ដាំ ក៏មិនខុសពីដំណាំត្រកៀតប៉ុន្មានដែរ ដែលគេត្រូវការភ្ជួរ រាស់ ដាក់ជី និងបញ្ចូលទឹកក្នុងស្រែ ព្រោះវាជារុក្ខជាតិត្រូវការទឹកជាប្រចាំ ដែលតម្រូវឱ្យកសិករមើលថែទាំទឹកឱ្យបានគ្រប់គ្រាន់បន្ទាប់ពីស្ទូងកូនហើយ ពោលគឺថែទាំទឹកយ៉ាងណាឱ្យម្អមអាចបណ្ដែតខ្លួនបាន តែពេលម្អមធំជិតបានកាត់គេត្រូវបូមទឹកចេញ ទុកឱ្យដីរឹងទើបងាយស្រួលដល់ការប្រមូលផល។
ចុងក្រោយ លោក គីមអៀង ក៏មានមតិដែរថា សម្រាប់អ្នកចង់ដាំម្អម អាចសាកល្បងដាំបានដោយសារពូជម្អមវាមិនថ្លៃនោះទេ ហើយការដាំក៏ងាយស្រួល មិនពិបាកមើលថែទាំច្រើន ដោយការដាំម្ដងអាចប្រមូលផលបាន ២-៣ដងទើបតម្រូវឱ្យសម្អាតដី និងស្ទូងដាំឡើងវិញ៕
Account
Security
Favourite Content