ភ្នំពេញ ៖ សូចនាករសេដ្ឋកិច្ចសំខាន់ៗក្នុងខែឧសភារយៈ និងក្នុងរយៈពេល៥ខែ ដើមឆ្នាំ២០២៤ បានបង្ហាញពីសញ្ញាណកាន់តែល្អជាបន្តបន្ទាប់ ជាពិសេសលើវិស័យពាណិជ្ជកម្មអន្តរជាតិ និងទេសចរណ៍ ស្របពេលដែលស្ថានភាពអតិផរណាកំពុងវិលត្រលប់មកស្ថានភាពល្អប្រសើរឡើងវិញ ប៉ុន្តែសកម្មភាពសាងសង់មានការធ្លាក់ចុះបន្តិច។ នេះបើយោងតាមរបាយការណ៍ស្តីពីនិន្នាការសេដ្ឋកិច្ចសង្គម៖ របាយការណ៍ប្រចាំខែឧសភា ឆ្នាំ២០២៤ របស់ក្រសួងសេដ្ឋកិច្ច និងហិរញ្ញវត្ថុ ដែលចេញផ្សាយកាលពីសប្តាហ៍មុន។

ការធ្លាក់ចុះនៃសកម្មភាពក្នុងខែឧសភាកន្លងទៅនេះ គឺបណ្តាលមកពីកត្តារដូវកាល តែសកម្មភាពទាំងនេះនឹងរើបឡើងវិញកាន់តែល្អប្រសើរជាបន្តបន្ទាប់នៅខែខាងមុខ។ ផ្អែកលើការតាមដានជាប់ជាប្រចាំ ទាំងសេដ្ឋកិច្ចក្នុងប្រទេស និងសេដ្ឋកិច្ចសកល សកម្មភាពសេដ្ឋកិច្ចកម្ពុជា នឹងរើបឡើងវិញជាបណ្តើរៗ ជាពិសេសក្នុងវិស័យសេវាកម្ម និងកសិកម្ម។

យោងតាមរបាយការណ៍ដែលបង្ហាញពីសូចនាករសេដ្ឋកិច្ចសំខាន់ៗក្នុងខែឧសភា និងរយៈពេល៥ខែ ឆ្នាំ២០២៤ ដោយបង្ហាញពីសញ្ញាណកាន់តែល្អជាបន្តបន្ទាប់ បានឱ្យដឹងថា សន្ទស្សន៍ថ្លៃទំនិញប្រើប្រាស់ និងសេវាកម្មនៅរាជធានីភ្នំពេញ ដោយក្នុងខែឧសភា ឆ្នាំ២០២៤ កើនឡើង ០,៨% ធៀបនឹងខែមុន និង១,១% ធៀបនឹងខែឧសភា ឆ្នាំ២០២៣។ សន្ទស្សន៍ថ្លៃក្រុមទំនិញប្រើប្រាស់ និងសេវាកម្មសំខាន់ៗ ដែលមានកំណើនធៀបនឹងខែមុន រួមមាន៖ សន្ទស្សន៍ថ្លៃក្រុមអាហារ និងភេសជ្ជៈមិនមែនជាតិស្រវឹង កើនឡើង ១,៤%, សន្ទស្សន៍ថ្លៃក្រុមសំលៀកបំពាក់ និងស្បែកជើង កើនឡើង ១,៤%, សន្ទស្សន៍ថ្លៃក្រុមភោជនីយដ្ឋាន កើនឡើង ០,៦%, និងសន្ទស្សន៍ថ្លៃក្រុមការសិក្សា កើនឡើង ០,៤%។ ធៀបនឹងខែឧសភា ឆ្នាំ២០២៣, សន្ទស្សន៍ថ្លៃក្រុមការសិក្សា កើនឡើង ២,៩%, សន្ទស្សន៍ថ្លៃក្រុមសំលៀកបំពាក់ និងស្បែកជើង កើនឡើង ២,៥%, និងសន្ទស្សន៍ថ្លៃក្រុមអាហារ និងភេសជ្ជៈ មិនមែនជាតិស្រវឹង កើនឡើង ១,៦%។

ទន្ទឹមនេះ ទំហំពាណិជ្ជកម្មសរុប (លើកលែងមាស) ក្នុងខែឧសភា ឆ្នាំ២០២៤ សម្រេចបានកំណើនល្អឡើងវិញគួរឱ្យកត់សម្គាល់ បើទោះជាមានផលរំខានពីវិបត្តិសកល បញ្ហាបម្រែបម្រួលអាកាសធាតុ និងការថមថយតាមរដូវកាលនៃការនាំចេញ កសិផលបន្តិចក្តី។ ជាក់ស្តែង ក្នុងខែឧសភា ឆ្នាំ២០២៤ នេះ ការនាំចេញបានកើនឡើង ១៨,៥% និងការនាំចូល កើនឡើង ៧,១% ធៀបនឹងខែមុន, ខណៈដែលគិតត្រឹម ៥ខែដើមឆ្នាំ២០២៤ ការនាំចេញកើនឡើង ១៥,៤% និងការនាំចូល កើនឡើង ១១,៤% ធៀបនឹងរយៈពេលដូចគ្នាឆ្នាំមុន។

បន្ថែមលើនេះ ឱនភាពនៃតុល្យភាពជញ្ជីងពាណិជ្ជកម្មក្នុងរយៈពេល ៥ខែដូចគ្នាកាលពីឆ្នាំមុន បានធ្លាក់ចុះពីទំហំ ១ ៣៧៨ លានដុល្លារ មកត្រឹម ១ ១៩៣ លានដុល្លារ ថយចុះ ១៣,៤% ធៀបនឹង ៥ខែដូចគ្នាឆ្នាំមុន ដែលការណ៍នេះ បានបង្ហាញពីនិន្នាការនៃការប្រើប្រាស់ផលិតផលក្នុងស្រុក និងសន្ទុះនៃ ការនាំចេញប្រសើរទៅកាន់ទីផ្សារអន្តរជាតិ។

ក្នុងខែឧសភា ឆ្នាំ២០២៤ ចំនួនភ្ញៀវទេសចរបេទេសចូលទស្សនាតំបន់អង្គរបន្តធ្លាក់ចុះធៀបនឹងខែមេសា ឆ្នាំ ២០២៤ ដោយសារកត្តារដូវកាលការបិទវិស្សមកាលទេសចរណ៍ (Low-Season) ប៉ុន្តែបានកើនឡើងបើគិតសរុបរយៈពេល ៥ខែដើមឆ្នាំ២០២៤។ ជាក់ស្តែង ក្នុងខែឧសភា ឆ្នាំ២០២៤ តំបន់អង្គរទទួលបានភ្ញៀវទេសចរបរទេសចំនួន ៥០ ៨៧៩ នាក់ ធ្លាក់ ៣១,១% ធៀបនឹងខែមេសា ឆ្នាំ២០២៤ និងចំណូលពីការលក់បណ្ណពីគ្រឹះស្ថានអង្គរមានប្រមាណ ២,២៨ លានដុល្លា ធ្លាក់ ៣៦,១% ធៀបនឹងខែមេសា ឆ្នាំ២០២៤។ រយៈពេល៥ខែដើមឆ្នាំ២០២៤ ភ្ញៀវទេសចរអន្តរជាតិ ចូលទស្សនាអង្គរបានកើនឡើង ៣៧,០% ទន្ទឹមនឹងចំណូលពីការលក់សំបុត្ររបស់គ្រឹះស្ថានអង្គរបានកើនឡើង ៣៨,២%។

យោងតាមទិន្នន័យខែឧសភា ឆ្នាំ២០២៤ ទំហំផ្ទៃក្រឡាគម្រោងសាងសង់ និងទុនរើបឡើងវិញបន្តិចធៀបនឹងខែមុន ខណៈដែលចំនួនសាងសង់មានការធ្លាក់ចុះ ប៉ុន្តែការនាំចូលនិងការផលិតគ្រឿងសំណង់មានការកើនឡើង ។ ក្នុង ខែឧសភាឆ្នាំ២០២៤ គម្រោងសំណង់ទទួលបានការអនុញ្ញាតសាងសង់សរុបមាន ២៣១ គម្រោង ធ្លាក់ ១៤,១%, មានផ្ទៃ ក្រឡា ១ ៣៧៣ ពាន់ម៉ែត្រការ៉េ កើន ៤៩,៧%, ប្រើប្រាស់ទុន ៧៣៩,៧ លានដុល្លារ កើន ១៥៩,៩% ធៀបនឹងខែមុន។ រយៈពេល៥ខែដើមឆ្នាំ២០២៤ ការអនុម័តគំរោងសាងសង់ជាទឹកប្រាក់បានថយចុះ ២០,២% ប៉ុន្តែទន្ទឹមនឹងនេះ ការនាំចូលគ្រឿងសំណង់បានកើនឡើង ២៣,១% និងការផលិតស៊ីម៉ងត៍ក្នុងស្រុកបានកើនឡើង ៤,៧% ប្រមាណ ៣,៥ លានតោន ដែលជាធាតុបង្ហាញពីការកើនឡើងនៃវិស័យនេះ។

ទាក់ទងនឹងគម្រោងវិនិយោគឯកជនវិញ ស្ថានភាពគម្រោងវិនិយោគឯកជនដែលទទួលបានការអនុញ្ញាតដោយក្រុមប្រឹក្សាអភិវឌ្ឍន៍កម្ពុជា ក្នុងខែឧសភា ឆ្នាំ២០២៤ មានការថយចុះធៀបនឹងខែមុន ប៉ុន្តែបានកើនឡើងខ្ពស់គិតសរុបរយៈពេល៥ខែដើមឆ្នាំ២០២៤។ ជាក់ស្តែង ចំនួនគម្រោងវិនិយោគក្នុងខែឧសភា ឆ្នាំ២០២៤ មាន ២៥ គម្រោង ដែលបានប្រើប្រាស់ទុនវិនិយោគសរុបចំនួន ២៤៦ លានដុល្លារ ថយចុះ ២០,៤% និងបង្កើតការងារថ្មីចំនួន ១៥ ១៣៩ កន្លែង ថយចុះ ៣៥,២៥% ធៀបនឹងខែមុន។ ជាសរុបរយៈពេល ៥ខែ ដើមឆ្នាំ២០២៤ ការអនុម័តវិនិយោគទុនបរទេសបានកើនឡើង ៣២៥,៤% ក្នុងនោះអនុម័ត កម្លាំងពលកម្មថ្មី មានកំណើន ៧៦,០%។

ក្នុងខែឧសភា ឆ្នាំ២០២៤, នៅទីផ្សារក្នុងស្រុក និងទីផ្សារអន្តរជាតិ ថ្លៃប្រេងជាមធ្យម ថយចុះ ធៀបនឹងខែមុន ខណៈដែលថ្លៃអង្ករជាមធ្យមហាក់នៅមានកំណើន។ ធៀបនឹងខែមុន, ថ្លៃប្រេងឥន្ធនៈក្នុងស្រុក និងថ្លៃប្រេងឆៅ អន្តរជាតិ ថយ ៣,១% និង ៧,៥% រៀងគ្នា, ប៉ុន្តែថ្លៃអង្ករក្នុងស្រុក និងអន្តរជាតិ កើន ១៣,៨% និង ២១,៧% រៀង គ្នា។ ជាលទ្ធផល ក្នុងរយៈពេល ៥ខែ ដើមឆ្នាំ២០២៤ ថ្លៃប្រេងឆៅអន្តរជាតិ, ថ្លៃអង្ករក្នុងស្រុក, និងថ្លៃអង្ករអន្តរជាតិនៅខ្ពស់នៅឡើយ ធៀបនឹងរយៈពេលដូចគ្នាឆ្នាំ២០២៣ ដោយបានកើនឡើង ៤,៥%, ១២,១%, និង២៦,២% រៀងគ្នា។ យ៉ាងណាមិញ ថ្លៃប្រេងឥន្ធនៈ និងថ្លៃអង្ករក្នុងស្រុក មិនទាន់ឡើងដល់ចំណុចគួរឱ្យបារម្ភនៅឡើយ៕