សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របនឹងស្ថានភាពទីផ្សារលំនៅឋាននៅក្នុងប្រទេសកម្ពុជាមិនទាន់មានភាពប្រសើរចាប់តាំងពីជួបវិបត្តិកូវីដ១៩មក អ្នកអភិវឌ្ឍន៍លំនៅឋានធំៗជាច្រើនបានស្នើរាជរដ្ឋាភិបាលក្នុងការកែប្រែបទដ្ឋានគតិយុត្តិច្បាប់ដោយអាចអនុញ្ញាតឱ្យជនបរទេសនៅកម្ពុជាមានសិទ្ធិទិញលំនៅឋានជាប់ដីនៅក្នុងគម្រោងបុរីនានាបាន ។
សំណើនេះធ្វើឡើងនៅក្នុងកិច្ចប្រជុំមួយរវាងសមាគមអ្នកអភិវឌ្ឍន៍លំនៅឋានកម្ពុជា និងក្រសួងរៀបចំដែនដី នគរូបនីយកម្ម និងសំណង់ កាលពីចុងសប្ដាហ៍កន្លងទៅនេះ ដើម្បីពិភាក្សាលើស្ថានភាពវិស័យសំណង់ និងវិស័យអចលនទ្រព្យនៅកម្ពុជា ដែលកំពុងស្ថិតនៅក្នុងបញ្ហាប្រឈមនៅឡើយ ។
សមាគមអ្នកអភិវឌ្ឍន៍លំនៅឋានកម្ពុជាក៏បានសូមអំពាវនាវឱ្យប្រមុខរាជរដ្ឋាភិបាលជួយអន្តរាគមន៍ ធ្វើយ៉ាងណាកុំឱ្យវិស័យនេះធ្លាក់ចុះកាន់តែដុនដាបបន្ថែមទៀត និងសង្ឃឹមថាប្រមុខរដ្ឋាភិបាល នឹងយកសំណើនេះទៅពិចារណាដើម្បីស្ដារស្ថានភាពវិស័យអចលនទ្រព្យឱ្យប្រសើរ ។
ជាការកត់សម្គាល់ឃើញថា លំនៅឋាននៅក្នុងបុរីមួយចំនួននៅរាជធានីភ្នំពេញ បានដាក់លក់ព្រោងព្រាត តែមិនមានអ្នកទិញ ដោយផ្ទះខ្លះត្រូវម្ចាស់ផ្ទះលក់ទៅឱ្យម្ចាស់បុរីវិញក្នុងតម្លៃចរចា ប៉ុន្តែម្ចាស់បុរីក៏មិនអាចទិញផ្ទះពីអតិថិជនបានច្រើនដែរដោយសារតែអ្នកលក់មានចំនួនច្រើន ។
លោក ប៉ូ អ៊ាវគង់ អ្នកជំនាញអចលនទ្រព្យមួយរូបនៅកម្ពុជា និងជានាយកប្រតិបត្តិក្រុមហ៊ុនអចលនទ្រព្យ Advance បានមានប្រសាសន៍ថា ការផ្ដល់សិទ្ធិឱ្យជនបរទេសមានសិទ្ធិទិញផ្ទះជាន់ផ្ទាល់ដីក្នុងបុរី និងទិញដីបាននៅក្នុងប្រទេសម្ពុជា វានឹងជួយដល់អ្នកអភិវឌ្ឍន៍បានមួយកម្រិតនៅក្នុងស្ថានភាពដែលវិស័យនេះនៅមានបញ្ហាប្រឈម ដោយសារតែវិបត្តិនាពេលកន្លងមក ។ ប៉ុន្តែរាជរដ្ឋាភិបាលក៏នឹងគិតពិចារណាក្នុងការយល់ព្រមតាមសំណើ និងមានការប្រយ័ត្នប្រយែងខ្ពស់ ជាពិសេសដីធ្លីដែលនៅជាប់ព្រំដែននៃប្រទេស ពីព្រោះថាប្រទេសជិតខាងកម្ពុជា ជាអ្នកមានជាងកម្ពុជា បើសិនជាយើងបើកសិទ្ធិឱ្យជនបរទេសទិញដីបាន ជនបរទេសដែលជាប់កម្ពុជានឹងមកទិញដីនៅជាប់ព្រំដែន និងមានបញ្ហានៅពេលអនាគត ។
លោកបន្តថា ប្រទេសមួយចំនួន ក៏បានបើកសិទ្ធិឱ្យជនបរទេសទិញដី និងផ្ទះជាន់ផ្ទាល់ដីដែរ ប៉ុន្តែគេកំណត់តំបន់សម្រាប់ជនបរទេសដែលអាចទិញដីបាន សម្រាប់កម្ពុជាក៏អាចធ្វើទៅបានដែរ ដូចជាខេត្តព្រះសីហនុ ដែលជាខេត្តនៅជាប់សមុទ្រ និងមិនមែនព្រំដែនគោកជាប់ជាមួយប្រទេសជិតខាង ដូច្នេះអាចឱ្យជនបរទេសអាចទិញដី និងអភិវឌ្ឍន៍បានដើម្បីជំរុញការអភិវឌ្ឍតំបន់នោះឱ្យកាន់តែរីកចម្រើន ៕
Account
Security
Favourite Content