បរទេស៖ យោងតាមប្រភពព័ត៌មានពី Al Jazeera បានរាយការណ៍ថា ដៃគូពាណិជ្ជកម្មសំខាន់ៗជាច្រើនរបស់សហរដ្ឋអាម៉េរិកបានរិះគន់ចំពោះការសម្រេចចិត្តរបស់ប្រធានាធិបតី លោក Donald Trump ក្នុងការដំឡើងអត្រាពន្ធលើការនាំចូលដែកថែប និងអាលុយមីញ៉ូម។

កាលពីថ្ងៃចន្ទ សប្ដាហ៍នេះ ប្រធានាធិបតីសហរដ្ឋអាម៉េរិក លោក Donald Trump បានបញ្ជាក់ថា អាម៉េរិកនឹងយកពន្ធ ២៥ ភាគរយពីប្រទេសទាំងអស់មិនថាមកពីណាទេដោយគ្មានករណីលើកលែង។ ការយកពន្ធគយនេះនឹងចូលជាធរមាននៅថ្ងៃទី១២ ខែមីនា ហើយវិធានការនេះនឹងប៉ះពាល់ដល់ការនាំចូលរាប់លានតោនពីប្រទេសផ្សេងៗដូចជា កាណាដា ប្រេស៊ីល ម៉ិកស៊ិក និងកូរ៉េខាងត្បូង ដែលភាគច្រើនមិនបង់ពន្ធនាំចូលសហរដ្ឋអាម៉េរិកកាលពីមុន។ ដៃគូពាណិជ្ជកម្មរបស់អាម៉េរិកជាច្រើនបានប្រតិកម្មបន្ទាប់ពី Trump បានចុះហត្ថលេខាលើបទបញ្ជាប្រតិបត្តិប្រកាសពន្ធ ២៥ ភាគរយលើដែកថែប និងអាលុយមីញ៉ូម ដែលជាមធ្យោបាយកាត់បន្ថយការនាំចូល ការលើកទឹកចិត្តដល់ការវិនិយោគ និងការពង្រីកផលិតកម្មដែកថែបក្នុងស្រុក។

សម្រាប់អាជីពនយោបាយរបស់ Trump ភាគច្រើនលោកតែងទទួលបានការរិះគន់ប្រឆាំងនឹងផលប៉ះពាល់នៃពាណិជ្ជកម្មសេរី ជាមួយនឹងទស្សនៈថា កិច្ចព្រមព្រៀងជាមួយបរទេសគឺជាកិច្ចព្រមព្រៀងអាក្រក់ដែលទាញយកផលប្រយោជន៍ពីសហរដ្ឋអាម៉េរិក។ យ៉ាងណាមិញ ការប្រកាសពន្ធរបស់ Trump បានជំរុញឱ្យមានការព្រួយបារម្ភអំពីការធ្លាក់ចុះសេដ្ឋកិច្ចដែលអាចកើតមាន និងវិធានការប្រឆាំងគ្នាទៅវិញទៅមករវាងសហរដ្ឋអាមេរិក និងដៃគូពាណិជ្ជកម្មសំខាន់ៗ។

កាលពីថ្ងៃអង្គារ មេដឹកនាំរបស់ប្រទេសម៉ិកស៊ិក កាណាដា និងសហភាពអឺរ៉ុបបានរិះគន់ចំពោះវិធានការនេះថា មិនសមហេតុផល ហើយពួកគេនឹងឆ្លើយតបទៅអាម៉េរិកជាមួយនឹងវិធានការផ្ទាល់ខ្លួនរបស់ពួកគេ។

លោកស្រី Ursula von der Leyen ប្រធានគណៈកម្មាធិការអឺរ៉ុប បានលើកឡើងថា គាត់មានការសោកស្តាយយ៉ាងខ្លាំងចំពោះការសម្រេចចិត្តរបស់សហរដ្ឋអាម៉េរិកក្នុងការដាក់ពន្ធលើការនាំចេញដែកថែប និងអាលុយមីញ៉ូមរបស់អឺរ៉ុប។ យ៉ាងណាមិញ សហភាពអឺរ៉ុបនឹងធ្វើសកម្មភាពដើម្បីការពារផលប្រយោជន៍សេដ្ឋកិច្ចរបស់ខ្លួន។ សហភាពអឺរ៉ុបចាត់ទុកថា ពន្ធនេះមិនសមហេតុផល និងបានព្រមានថា ពួកគេនឹងបង្កើតវិធានការឆ្លើយតបយ៉ាងម៉ឺងម៉ាត់ និងសមាមាត្រទៅវិញ។

រដ្ឋមន្ត្រីសេដ្ឋកិច្ចម៉ិកស៊ិក លោក Marcelo Ebrard បានលើកឡើងថា ពន្ធគយថ្មីនេះមិនសមហេតុផល ខណៈដែលនាយករដ្ឋមន្ត្រីកាណាដា លោក Justin Trudeau បានលើកឡើងថា ពួកគេមិនអាចទទួលយកបាននោះទេ។ លោក Trudeau បានបញ្ជាក់ថា លោកនឹងធ្វើការជាមួយរដ្ឋបាល Trump ដើម្បីបញ្ជាក់ពីផលប៉ះពាល់អវិជ្ជមាននៃពន្ធគយ។ កាណាដាមានចំណែកជិត ៨០ ភាគរយនៃការនាំចូលអាលុយមីញ៉ូមរបស់សហរដ្ឋអាមេរិក។ ដែកថែប និងអាលុយមីញ៉ូមរបស់កាណាដាត្រូវបានប្រើប្រាស់នៅក្នុងឧស្សាហកម្មសំខាន់ៗមួយចំនួនរបស់សហរដ្ឋអាម៉េរិក មិនថាវាជាវិស័យការពារជាតិ ការកសាងនាវា ការផលិត ថាមពល រថយន្តនោះទេ។ យ៉ាងណាមិញ នាយក​រដ្ឋមន្ត្រី​រូបនេះអះអាងថា ប្រសិនបើ​កាណាដារងសម្ពាធនោះ ខ្លួននឹង​ឆ្លើយតបទៅវិញដោយយក​ពន្ធ​សងសឹក​។ ​ប្រសិន​បើ​ពេលនោះមកដល់​ពិតមែន កាណាដានឹង​ឆ្លើយ​តប​ទៅវិញដោយ​រឹង​មាំ និង​ច្បាស់​លាស់ ដើម្បីក្រោកឈរការពារកម្មករ និងឧស្សាហកម្ម​កាណាដា។ ទន្ទឹមនឹងនេះ ប្រទេសប្រេស៊ីលមានការភ្ញាក់ផ្អើលចំពោះការដាក់ពន្ធរបស់ Trump ដោយលើកហេតុផលថា ការដំឡើងពន្ធនឹងមិនផ្តល់ផលប្រយោជន៍ដល់ប្រទេសទាំងពីរនោះទេ៕