បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា ក្រុមហ៊ុនផលិតរថយន្តយក្សរបស់ជប៉ុន Nissan គ្រោងនឹងបញ្ឈប់បុគ្គលិកចំនួន ៩ ០០០ នាក់នៅទូទាំងពិភពលោក និងកាត់បន្ថយសមត្ថភាពផលិត ២០ ភាគរយ ដោយសារការលក់ធ្លាក់ចុះនៅក្នុងទីផ្សារធំៗរបស់ខ្លួន។

យោងតាមសេចក្តីថ្លែងការណ៍ដែលបានចេញផ្សាយកាលពីថ្ងៃចុងសប្ដាហ៍កន្លងទៅនេះបានឲ្យដឹងថា Nissan បានកាត់បន្ថយការព្យាករណ៍ប្រាក់ចំណេញប្រតិបត្តិការប្រចាំឆ្នាំរបស់ខ្លួន ៧០ ភាគរយមកនៅត្រឹម ១៥០ ពាន់លានយ៉េន (៩៧៦ លានដុល្លារ)។ លើសពីនេះ Nissan បានប្រកាសថា ខ្លួននឹងលក់ភាគហ៊ុនរបស់ ១០ភាគរយនៅក្នុងក្រុមហ៊ុន Mitsubishi Motor ដែលនឹងកាត់បន្ថយពីភាគហ៊ុនរបស់ខ្លួនបច្ចុប្បន្ន ៣៤ ភាគរយ។

លោក Makoto Uchida នាយកប្រតិបត្តិ និងជាប្រធានក្រុមហ៊ុន Nissan នឹងស្ម័គ្រចិត្តលះបង់ប្រាក់ខែរបស់ខ្លួន ៥០ភាគរយ ខណៈដែលសមាជិកគណៈកម្មាធិការប្រតិបត្តិផ្សេងទៀតក៏នឹងស្ម័គ្រចិត្តកាត់បន្ថយប្រាក់ខែរបស់ពួកគេផងដែរ។ ស្ថានភាព Nisssan ដូចទៅនឹងក្រុមហ៊ុនផលិតរថយន្តបរទេសផ្សេងទៀត ដែលកំពុងជួបការលំបាកនៅក្នុងប្រទេសចិន ដោយសារក្រុមហ៊ុនចិន BYD និងក្រុមហ៊ុនផលិតក្នុងស្រុកផ្សេងទៀតកំពុងដណ្តើមចំណែកទីផ្សារជាមួយនឹងរថយន្ត EV និងកូនកាត់ Hybrid ដែលមានតម្លៃសមរម្យ និងបច្ចេកវិទ្យាទំនើប។ យ៉ាងណាមិញ ឬសគល់នៃ​បញ្ហា​ធំ​របស់ Nissan គឺ​នៅ​សហរដ្ឋ​អាមេរិក ដោយសារ​វខ្វះ​ការ​ផលិត​រថយន្ត​កូនកាត់​ដែល​គួរ​ឲ្យ​ទុក​ចិត្ត ខណៈដែលគូប្រជែងជប៉ុន Toyota កំពុងកើនឡើងនៃតម្រូវការរថយន្តកូនកាត់ Hybrid។

ជាមួយគ្នានេះ ស្របពេលដែល NIssan កំពុងប្រឈមមុខនឹងស្ថានភាពធ្ងន់ធ្ងរ ពួកគេបានចាត់វិធានការជាបន្ទាន់ដើម្បីពង្រឹងប្រតិបត្តិការរបស់ខ្លួនឲ្យមានភាពធូរស្រាល និងធន់ជាងមុន រួមទាំងមានសមត្ថភាពសម្របខ្លួនបានយ៉ាងឆាប់រហ័សទៅនឹងការផ្លាស់ប្តូរនៅក្នុងទីផ្សារ។ គួរឲ្យបញ្ជាក់ដែរថា Nissan គឺជាក្រុមហ៊ុនផលិតរថយន្តធំទី ៣ របស់ប្រទេសជប៉ុន កំពុងប្រឈមការលក់ធ្លាក់ចុះនៅក្នុងទីផ្សាររថយន្តកំពូលរបស់ពិភពលោកគឺប្រទេសចិន។ ការលក់នៅចិនបានធ្លាក់ចុះជាខ្លាំងរហូតដល់ ១៤,៣ ភាគរយ ដោយសារមានការប្រកួតប្រជែងកាន់តែខ្លាំងឡើងពីក្រុមហ៊ុនផលិតរថយន្តក្នុងស្រុក ខណៈដែលការលក់នៅសហរដ្ឋអាមេរិកបានធ្លាក់ចុះ ៣ ភាគរយ។ ជាមួយគ្នានេះ ទីផ្សារចិន និងអាមេរិកមានចំណែកជិតពាក់កណ្តាលនៃការលក់សរុបជាសកលរបស់ក្រុមហ៊ុន Nissan។ ជារួម ការលក់សរុបជាសកលរបស់ Nissan បានធ្លាក់ចុះ ៣,៨ ភាគរយមកនៅត្រឹម ១,៦ លានគ្រឿងសម្រាប់ឆមាសទីមួយឆ្នាំ២០២៤។

យោងតាមសេចក្តីថ្លែងការណ៍មួយបានឲ្យដឹងថា Nissan គ្រោងនឹងជំរុញការដាក់ឱ្យប្រើប្រាស់រថយន្តថាមពលថ្មីនៅក្នុងប្រទេសចិន និងរថយន្តប្រភេទ Plug-in hybrids និង e-POWER នៅសហរដ្ឋអាមេរិកក្នុងពេលដំណាលគ្នា ដើម្បីជំរុញការលក់ឲ្យមានប្រសិទ្ធភាព។ Makoto Uchida នាយកប្រតិបត្តិក្រុមហ៊ុន Nissan លើកឡើងថា វិធានការផ្លាស់ប្តូរទាំងនេះមិនមានន័យថាក្រុមហ៊ុនកំពុងធ្លាក់ចុះទាំងស្រុងនោះទេ។ ​Nissan កំពុងរៀបចំរចនាសម្ព័ន្ធអាជីវកម្មរបស់ខ្លួនឡើងវិញឱ្យកាន់តែមានភាពធូរស្រាល និងមានភាពធន់ជាងមុន ខណៈដែលមានការរៀបចំលើការគ្រប់គ្រងឡើងវិញ ដើម្បីឆ្លើយតបឲ្យបានឆាប់រហ័ស និងមានភាពបត់បែនចំពោះការផ្លាស់ប្តូរនៅក្នុងបរិយាកាសអាជីវកម្ម៕