សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ យោងតាមអគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា គិតត្រឹមខែកញ្ញា ឆ្នាំ២០២៤កន្លងទៅនេះ កម្ពុជាសម្រេចបានការនាំចេញកៅស៊ូចំនួន ២៤៨ ៥៣៥តោន កើនឡើងចំនួន ១,៣១៦តោន ស្មើនឹង ៣,៥១ភាគរយ បើធៀបនឹងរយៈពេលដូចគ្នាកាលពីឆ្នាំមុន ខណៈដែលតម្លៃមានភាពល្អប្រសើរជាងឆ្នាំកន្លងទៅ ពោល គឺទទួលបានតម្លៃ ១៥៨៦ដុល្លារក្នុងមួយតោន កើនឡើង ២១៥ដុល្លារ/តោន ស្មើនឹង ១៥,៧២ភាគរយ បើធៀបនឹងឆ្នាំមុន។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ប្រាប់ AMS ថា ក្នុងរយៈពេលប៉ុន្មានខែចុងក្រោយនេះ តម្លៃកៅស៊ូមានភាពល្អប្រសើរ ធ្វើឱ្យកៅស៊ូគ្រួសារទទួលបានផលចំណេញច្រើនគួរសម ហើយក្រុមហ៊ុនចម្ការកៅស៊ូធំៗក៏ទទួលបានផលចំណេញដូចគ្នាផងដែរ។
អ្នកឧកញ៉ាបានបញ្ជាក់ថា ៖
«យើងសង្ឃឹមថា បើតម្លៃកៅស៊ូកាន់តែមានតម្លៃល្អ នឹងអាចជួយជំរុញឱ្យការដាំកៅស៊ូមានភាពរីកចម្រើន ស្របពេលដែលមានរោងចក្រសំបក់កង់រថយន្តចំនួន៣ កំពុងដំណើរការយ៉ាងសកម្មនៅកម្ពុជា ហើយនៅពេលឆាប់ៗខាងមុខនេះនឹងមានរោងចក្រផលិតសម្បកកងរថយន្តចំនួន២ទៀតត្រៀមបើកដំណើរការ»។
អ្នកឧកញ៉ា បានគូសបញ្ជាក់ថា ការដែលមានវត្តមានរោងចក្រសំបក់កង់រថយន្តនៅកម្ពុជា ធ្វើឱ្យការប្រើប្រាស់កៅស៊ូក្នុងស្រុកកាន់តែមានភាពល្អប្រសើរច្រើន ជៀសវាងការនាំចេញនូវវត្ថុធាតុដើមពាក់កណ្ដាលសម្រេចនៃកៅស៊ូ ហើយនាំចូលផលិតផលសម្បកកងរយន្តចូលមកពីក្រៅប្រទេសដែលមានតម្លៃថ្លៃ។
អ្នកឧកញ៉ា លឹម ហេង បានមានប្រសាសន៍សង្កត់ធ្ងន់ថា ៖
«ក្រសួងកសិកម្មគួរដល់ពេលត្រូវបង្កើតគោលនយោបាយស្ដីពីកៅស៊ូ គាំពារកៅស៊ូ ព្រោះកន្លងមកយើងបានបង្កើតគោលនយោបាយ ស្វាយចន្ទី ដំឡូងមី ជាដើម ប៉ុន្តែកៅស៊ូនៅមិនទាន់មានឡើយ ដូច្នេះ សូមស្នើឱ្យក្រសួងបង្កើតនូវគោលនយោបាយនេះ និងអាចគាំពារដល់ក្រុមហ៊ុនកៅស៊ូ និងកៅស៊ូគ្រួសារផងដែរ។ ការដែលយើងមានការគាំពារ ដោយការលើកទឹកចិត្តបែបណា ឬការផ្តល់ការអនុគ្រោះផ្នែកពន្ធយ៉ាងណាចំពោះផលិតផលកៅស៊ូ គឺដើម្បីលើកតម្កើងវិស័យកៅសូនេះ ព្រោះមានតែកៅស៊ូ និងស្វាយចន្ទីទេ ដែលយើងអាចជំរុញបាន ហើយជាការកត់សម្គាល់ វិស័យ២មុខនេះ កម្ពុជាអាចប្រកួតប្រជែងជាមួយផ្នែកកសិកម្មនៃប្រទេសជិតខាងយើងបាន ។ ដូច្នេះយើងត្រូវការ ផ្នែកគាំពារតាមរយៈការបង្កើតនូវគោលនយោបាយ រួមទាំងហិរញ្ញវត្ថុ និងបច្ចេកទេស ជាពិសេសការពង្រីកផ្ទៃដីបន្ថែមផងដែរ»។
សូមជម្រាបថា ដំណាំកៅស៊ូ មានវត្តមាននៅក្នុងប្រទេសកម្ពុជាជាង ១សតវត្សរ៍មកហើយ និងកំពុងបន្តរួមចំណែកដល់សេដ្ឋកិច្ចជាតិ។ សម្រាប់កម្ពុជា វិស័យកៅស៊ូ ជាប្រភពចំណូលថវិកាជាតិ និងប្រភពការងាររបស់ប្រជាជន។ តាមរយៈគម្រោង FORSEA ផលិតកម្មកៅស៊ូក្នុងប្រទេសកម្ពុជា ថៃ និងវៀតណាម មានប្រមាណជិត៤៥ភាគរយ នៃផលិតផលកៅស៊ូពិភពលោក ដែលលាតសន្ធឹងលើផ្ទៃដីជាង ៥,៥ លានហិកតា៕
Account
Security
Favourite Content