សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ៖ ក្នុងរយៈពេល ៧ខែ ឆ្នាំ២០២៦ ខេត្តព្រះសីហនុទទួលបានគម្រោងវិនិយោគចំនួន ៨៧គម្រោង ដែលមានទុនវិនិយោគប្រមាណ ៤៣៦លានដុល្លារអាម៉េរិក និងប៉ាន់ស្មានថាអាចបង្កើតការងារបានជិត ៦,០០០កន្លែង។ នេះបើតាមរបាយការណ៍របស់ក្រុមការងារជំរុញការវិនិយោគខេត្តព្រះសីហនុ។
ឯកឧត្តម អ៊ឹម សុខធី ប្រធានលេខាធិការដ្ឋាននៃក្រុមការងារជំរុញការវិនិយោគក្នុងខេត្តព្រះសីហនុ បានមានប្រសាសន៍ថា ក្នុងចំណោមគម្រោងវិនិយោគ និងវិនិយោគិនដែលមកបោះទុនវិនិយោគនៅក្នុងខេត្តព្រះសីហនុ ក្នុងរយៈពេលប៉ុន្មានឆ្នាំមកនេះ ភាគច្រើនជាវិនិយោគិនចិន។
ឯកឧត្តមបានឱ្យដឹងថា ក្រៅពីវិនិយោគិនចិន ក៏មានវិនិយោគិនមកពីតំបន់ផ្សេងៗទៀតក្នុងបរិមាណតិចតួច ដូចជា អឺរ៉ុប និងមជ្ឈិមបូព៌ាជាដើម ដោយផ្ដោតលើវិស័យទេសចរណ៍។ ជាក់ស្ដែង ចាប់តាំងពីរាជរដ្ឋាភិបាលបានប្រកាសឱ្យអនុវត្តកម្មវិធីពិសេសជំរុញការវិនិយោគក្នុងខេត្តព្រះសីហនុ មានគម្រោងវិនិយោគក្នុងវិស័យទេសចរណ៍ចំនួន ១២៨គម្រោងត្រូវបានលើកទឹកចិត្ត។
ក្នុងជំនួបអាហារសាមគ្គីជាមួយវិនិយោគិនចិនមកពីក្រុងអ៊ូស៊ី ប្រទេសចិន ដើម្បីផ្សព្វផ្សាយពីសក្ដានុពលវិនិយោគខេត្តព្រះសីហនុ កាលពីល្ងាចថ្ងៃទី២៩ ខែកក្កដា ឆ្នាំ២០២៦ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានមានប្រសាសន៍ថា រាជរដ្ឋាភិបាលបាននិងកំពុងរៀបចំផែនការមេអភិវឌ្ឍខេត្តព្រះសីហនុ ឱ្យក្លាយជាតំបន់សេដ្ឋកិច្ចពិសេសគំរូពហុបំណង និងខេត្តជាប់ឆ្នេរសមុទ្រកម្ពុជា ទៅជារបៀងសេដ្ឋកិច្ចពហុបំណង និងប្រទាក់ក្រឡា។
ឯកឧត្តមបានបន្តថា ក្នុងផែនការនេះ ខេត្តព្រះសីហនុត្រូវបានរៀបចំឱ្យមានតំបន់ទីក្រុងសមាហរណកម្ម ដែលរួមមានតំបន់រស់នៅប្រណិត តំបន់ទេសចរណ៍ប្រណិត មជ្ឈមណ្ឌលពាណិជ្ជកម្ម និងមជ្ឈមណ្ឌលហិរញ្ញវត្ថុអន្តរជាតិ។
ក្រៅពីនេះ ខេត្តព្រះសីហនុ ក៏នឹងត្រូវរៀបចំជាតំបន់ទេសចរណ៍ធម្មជាតិ ដោយរៀបចំបណ្ដាកោះ និងឆ្នេរដ៏ស្រស់ស្អាតនៅក្នុងខេត្ត ឱ្យក្លាយជារមណីយដ្ឋានឆ្នេរសមុទ្រដែលមានលក្ខណៈទាក់ទាញ។
ឯកឧត្តមបានបន្តថា ក្រៅពីតំបន់ទីក្រុងសមាហរណកម្ម និងតំបន់ទេសចរណ៍ ខេត្តព្រះសីហនុ ក៏នឹងរៀបចំឱ្យមានតំបន់កសិកម្ម ដើម្បីរៀបចំជាតំបន់វារីវប្បកម្ម ការកែច្នៃផលនេសាទ និងកសិផល ការចិញ្ចឹមសត្វ និងកសិ-ឧស្សាហកម្ម។
ដើម្បីទាក់ទាញវិនិយោគិនពីប្រទេសនានា រាជរដ្ឋាភិបាលបានរៀបចំខេត្តព្រះសីហនុឱ្យមានតំបន់ឧស្សាហកម្ម និងភស្តុភារកម្ម ដោយរៀបចំជាសួនឧស្សាហកម្ម តំបន់សេដ្ឋកិច្ចពិសេសពហុបំណង និងជាច្រកចេញ-ចូលអន្តរជាតិ រួមទាំងជាមជ្ឈមណ្ឌលភស្តុភារកម្មជាតិ ដែលមានទំនាក់ទំនងជាមួយទីផ្សារអាស៊ាន និងសកលលោក។
ឯកឧត្តមអភិបាលខេត្តបានបញ្ជាក់ថា រដ្ឋបាលខេត្តព្រះសីហនុតែងតែប្ដេជ្ញាចិត្តយ៉ាងមុតមាំ ក្នុងការផ្ដល់សេវាសាធារណៈប្រកបដោយភាពឆាប់រហ័ស តម្លាភាព ទំនុកចិត្ត និងប្រសិទ្ធភាពខ្ពស់ ព្រមទាំងការពារសន្តិសុខ និងសុវត្ថិភាពដល់វិនិយោគិន និងភ្ញៀវទេសចរ។
ឯកឧត្តមបានបន្ថែមថា រដ្ឋបាលខេត្តមានយន្តការបង្ការ និងឆ្លើយតបទាន់ពេលវេលា ដើម្បីធានាថាវិនិយោគិន និងភ្ញៀវទេសចរគ្រប់រូបអាចធ្វើអាជីវកម្ម និងដំណើរកម្សាន្តប្រកបដោយភាពកក់ក្ដៅ សុវត្ថិភាព និងទំនុកចិត្ត៕
Account
Security
Favourite Content