សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ព្រឹទ្ធសភាកម្ពុជា បានអនុម័តសេចក្តីព្រាងច្បាប់ចំនួន ៣ ពាក់ព័ន្ធនឹងកិច្ចព្រមព្រៀង និងកិច្ចសម្រុះសម្រួលទទួលស្គាល់ទៅវិញទៅមករបស់អាស៊ាន ដើម្បីសម្រួលពាណិជ្ជកម្ម លើកកម្ពស់សមត្ថភាពប្រកួតប្រជែង និងជំរុញការអភិវឌ្ឍវិស័យឧស្សាហកម្មរបស់កម្ពុជាក្នុងទីផ្សារតំបន់។
សេចក្តីព្រាងច្បាប់ទាំងនេះ ត្រូវបានអនុម័តដោយសំឡេង ៥៨ លើ ៥៨ នៅក្នុងសម័យប្រជុំវិសាមញ្ញព្រឹទ្ធសភា នីតិកាលទី៥ កាលពីព្រឹកថ្ងៃទី២៩ ខែកក្កដា ឆ្នាំ២០២៦ ក្រោមការដឹកនាំរបស់ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា។ សេចក្តីព្រាងច្បាប់ទាំងបីនេះ ត្រូវបានរដ្ឋសភាអនុម័តរួចហើយកាលពីថ្ងៃទី១៤ ខែកក្កដា ឆ្នាំ២០២៦។
សេចក្តីព្រាងច្បាប់ទី១ គឺស្តីពីការអនុម័តយល់ព្រមលើកិច្ចព្រមព្រៀងក្របខ័ណ្ឌអាស៊ានស្តីពីកិច្ចសម្រុះសម្រួលទទួលស្គាល់ទៅវិញទៅមក ដែលបង្កើតក្របខ័ណ្ឌសម្រាប់រៀបចំកិច្ចសម្រុះសម្រួលទទួលស្គាល់ទៅវិញទៅមកតាមវិស័យ សម្រាប់ផលិតផល និងសេវាកម្មអាទិភាព។
ទី២ គឺស្តីពីការអនុម័តយល់ព្រមលើកិច្ចសម្រុះសម្រួលទទួលស្គាល់ទៅវិញទៅមកតាមផ្នែកអាស៊ានសម្រាប់សម្ភារៈអគារ និងសំណង់ ដែលមានគោលបំណងគាំទ្រការធ្វើពាណិជ្ជកម្មលើសម្ភារៈអគារ និងសំណង់ក្នុងទីផ្សារអាស៊ាន។
ទី៣ គឺស្តីពីការអនុម័តយល់ព្រមលើកិច្ចសម្រុះសម្រួលទទួលស្គាល់ទៅវិញទៅមកអាស៊ានស្តីពីប្រភេទអនុម័តបញ្ជាក់សម្រាប់ផលិតផលយានយន្ត ដើម្បីគាំទ្រការធ្វើពាណិជ្ជកម្មផលិតផលយានយន្តក្នុងទីផ្សារអាស៊ាន។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលជាតំណាងរាជរដ្ឋាភិបាលមកការពារសេចក្តីព្រាងច្បាប់ទាំងនេះ បានលើកឡើងថា កិច្ចព្រមព្រៀង និងកិច្ចសម្រុះសម្រួលទាំង៣ នឹងពង្រឹងប្រព័ន្ធវាយតម្លៃភាពអនុលោមរបស់កម្ពុជា ព្រមទាំងលើកកម្ពស់សមត្ថភាពបច្ចេកទេស និងភាពជឿជាក់របស់អង្គភាពចេញវិញ្ញាបនបត្រ អង្គភាពធ្វើតេស្ត និងអង្គភាពធ្វើអធិការកិច្ច។
ឯកឧត្តមរដ្ឋមន្ត្រីបានបញ្ជាក់ថា៖ “កិច្ចព្រមព្រៀងទាំងនេះនឹងជួយកាត់បន្ថយការតម្រូវឱ្យធ្វើឡើងវិញនូវការចេញវិញ្ញាបនបត្រ ការធ្វើតេស្តវិភាគ និងការធ្វើអធិការកិច្ចលើផលិតផល ដោយសម្រួលលំហូរទំនិញក្នុងទីផ្សារអាស៊ាន និងលើកកម្ពស់ភាពប្រកួតប្រជែងរបស់ទំនិញកម្ពុជាក្នុងតំបន់។”
តាមសេចក្តីប្រកាសព័ត៌មានរបស់ព្រឹទ្ធសភា កិច្ចព្រមព្រៀងក្របខ័ណ្ឌអាស៊ានស្តីពីកិច្ចសម្រុះសម្រួលទទួលស្គាល់ទៅវិញទៅមក នឹងជួយកម្ពុជាលុបបំបាត់របាំងបច្ចេកទេសចំពោះពាណិជ្ជកម្ម និងកាត់បន្ថយការចំណាយស្ទួនលើការធ្វើតេស្តផលិតផលឡើងវិញ នៅពេលនាំចេញទៅកាន់ទីផ្សារអាស៊ាន។ កិច្ចព្រមព្រៀងនេះក៏នឹងជួយឱ្យលំហូរពាណិជ្ជកម្មទំនិញកាន់តែរលូន រហ័ស និងមានប្រសិទ្ធភាពថ្លៃដើម ព្រមទាំងបង្កើនសមត្ថភាពប្រកួតប្រជែងរបស់ផលិតផលកម្ពុជាក្នុងទីផ្សារតំបន់។
សម្រាប់វិស័យសម្ភារៈអគារ និងសំណង់ កិច្ចសម្រុះសម្រួលទទួលស្គាល់ទៅវិញទៅមកនឹងជួយធានាគុណភាព សុវត្ថិភាព និងបទដ្ឋានបច្ចេកទេសនៃសម្ភារៈសំណង់ដែលនាំចូល និងនាំចេញ ព្រមទាំងកាត់បន្ថយពេលវេលា និងថវិកាក្នុងការបញ្ជាក់គុណភាព។
វិធានការនេះក៏ត្រូវបានរំពឹងថា នឹងជួយទាក់ទាញការវិនិយោគលើសហគ្រាសផលិតសម្ភារៈសំណង់ក្នុងស្រុក ដើម្បីត្រៀមចូលរួមក្នុងខ្សែច្រវាក់ផ្គត់ផ្គង់តំបន់ និងជំរុញការអភិវឌ្ឍវិស័យហេដ្ឋារចនាសម្ព័ន្ធ និងសំណង់នៅកម្ពុជាឱ្យកាន់តែមានស្តង់ដារ។
ចំពោះផលិតផលយានយន្ត កិច្ចសម្រុះសម្រួលទទួលស្គាល់ទៅវិញទៅមកនឹងជួយកាត់បន្ថយការចំណាយ និងពេលវេលាក្នុងការធ្វើតេស្តយានយន្ត និងគ្រឿងបន្លាស់ ព្រមទាំងលើកកម្ពស់បទដ្ឋានសុវត្ថិភាព និងបរិស្ថានចំពោះយានយន្ត។
សេចក្តីព្រាងច្បាប់នេះ ក៏នឹងជំរុញគំនិតផ្តួចផ្តើមរបស់រាជរដ្ឋាភិបាលក្នុងការអភិវឌ្ឍវិស័យឧស្សាហកម្មដំឡើងយានយន្ត និងផលិតគ្រឿងបន្លាស់នៅកម្ពុជា ឱ្យក្លាយជាផ្នែកសំខាន់មួយនៃខ្សែច្រវាក់តម្លៃ និងផលិតកម្មយានយន្តក្នុងតំបន់អាស៊ាន។
ក្រៅពីសេចក្តីព្រាងច្បាប់ទាំងបីនេះ ព្រឹទ្ធសភាក៏បានអនុម័តសេចក្តីព្រាងច្បាប់ស្តីពីការអនុម័តយល់ព្រមឱ្យកម្ពុជាចូលជារដ្ឋភាគីនៃអនុសញ្ញាស្តីពីប្រាតិភោគជាអន្តរជាតិចំពោះឧបករណ៍ចល័ត និងពិធីសារពាក់ព័ន្ធនឹងឧបករណ៍អាកាសយានផងដែរ។
ការចូលជារដ្ឋភាគីនៃអនុសញ្ញាទីក្រុងខេបថោន និងពិធីសារអាកាសយាន ត្រូវបានចាត់ទុកថាមានសារៈសំខាន់សម្រាប់សេដ្ឋកិច្ច ពាណិជ្ជកម្ម និងវិនិយោគ ដោយអាចជួយជំរុញកំណើនសេដ្ឋកិច្ច ការអភិវឌ្ឍវិស័យទេសចរណ៍ និងពាណិជ្ជកម្ម ព្រមទាំងទាញយកផលប្រយោជន៍ពីការពង្រីកហេដ្ឋារចនាសម្ព័ន្ធអាកាសយានដ្ឋានអន្តរជាតិថ្មីៗរបស់កម្ពុជា។
អនុសញ្ញា និងពិធីសារនេះ ក៏ត្រូវបានរំពឹងថានឹងជួយជំរុញវិស័យឧស្សាហកម្មអាកាសចរណ៍ និងការដឹកជញ្ជូនតាមផ្លូវអាកាសទាំងក្នុងស្រុក និងអន្តរជាតិ ព្រមទាំងការដឹកជញ្ជូនពាណិជ្ជកម្មទំនិញផងដែរ៕
Account
Security
Favourite Content