មេមត់ ៖ ​មន្ត្រី​ជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្រសួងកសិកម្ម គ្រោងនឹងវិនិយោគលើប្រព័ន្ធសូឡាបូមទឹក ជូនដល់សហគមន៍កសិកម្មទំនើប «ម្រេចមេមត់ត្បូងឃ្មុំ» ជំនួសឱ្យការប្រើប្រាស់ម៉ាស៊ីនបូមទឹកដើរដោយម៉ាស៊ីនប្រើថាមពលប្រេងម៉ាស៊ូត ដើម្បីកាត់បន្ថយចំណាយប្រតិបត្តិការប្រចាំថ្ងៃរបស់សហគមន៍។

ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ការវិនិយោគលើប្រព័ន្ធសូឡាបូមទឹកជូនដល់សហគមន៍កសិកម្មទំនើប  «ម្រេចមេមត់ត្បូងឃ្មុំ» ទាំង៦៥គ្រួសារនៃសមាជិកសហគមន៍ ជំនួសឱ្យការប្រើប្រាស់ម៉ាស៊ីនបូមទឹកដើរដោយប្រេងម៉ាស៊ូត គឺដើម្បីកាត់បន្ថយចំណាយប្រតិបត្តិការប្រចាំថ្ងៃរបស់សហគមន៍។ ទន្ទឹមនឹងនេះដែរ ក្រុមការងារជំនាញមកពីនាយកដ្ឋានគ្រឿងយន្តកសិកម្ម បាន និងកំពុងសិក្សាលម្អិតលើតម្រូវការបច្ចេកទេសចាំបាច់ ដើម្បីរៀបចំប្រព័ន្ធស្រោចស្រពដើរដោយប្រព័ន្ធសូឡា ដែលមានប្រសិទ្ធភាពបំផុតសម្រាប់គ្រប់ដណ្តប់លើផ្ទៃដីផលិតកម្មម្រេចជិត១០០ហិកតារបស់សហគមន៍។

យោយតាមការប៉ាន់ស្មានបឋមរបស់អ្នកជំនាញបានឱ្យដងថា សម្រាប់ប្រព័ន្ធស្រោចស្រពប្រភេទនេះ ការវិនិយោគអាចមានទំហំជិត ២០ម៉ឺនដុល្លារ តែអាចប្រើប្រាស់បានរយៈពេល១០ឆ្នាំ ប្រហាក់ប្រហែលគ្នានឹងទំហំចំណាយ ១ឆ្នាំកន្លះ បើធៀបនឹងប្រព័ន្ធចាស់ដើរដោយម៉ាស៊ូត ឬនិយាយមួយបែបទៀតគឺ ១ឆ្នាំកន្លះអាចរួចខ្លួនបានដើមមកវិញ ហើយចំណេញជាង១លានដុល្លារសម្រាប់រយៈពេល១០ឆ្នាំ។

ការរៀបចំគនិតផ្តួចផ្តើមនេះគឺជាអត្ថប្រយោជន៍មួយបែបទៀត ដែលកសិករអាចទទួលបានពីការចូលរួមជាសមាជិកនៃសហគមន៍កសិកម្មទំនើប និងជាចក្ខុវិស័យនៃការអនុវត្តផលិតកម្មកសិកម្មរួមគ្នាក្នុងទ្រង់ទ្រាយធំនៅក្នុងវិស័យកសិកម្ម ដែលជាផ្នែកមួយនៃកម្មវិធីគោលនយោបាយអាទិភាពទី៦ របស់រដ្ឋាភិបាលអាណត្តិទី៧ ចាប់ផ្ដើមដាក់ឱ្យអនុវត្តចាប់តាំងពីឆ្នាំ២០២៣។ បច្ចុប្បន្ន ការបង្កើតសហគមន៍កសិកម្មទំនើប គឺផ្ដល់អាទិភាពសម្រាប់តែដំណាំ៤ប្រភេទប៉ុណ្ណោះ រួមមាន ស្វាយចន្ទី ស្រូវ ម្រេច និងបន្លែ។

ឯកឧត្ដម ឃឹម ហ្វីណង់ អ្នកនាំពាក្យ និងជាអនុរដ្ឋលេខាធិការក្រសួងកសិកម្ម បានឱ្យដឹងថា សហគមន៍កសិ​កម្មទំនើប «ម្រេចមេមត់ត្បូងឃ្មុំ» ត្រូវបានដាក់ឱ្យដំណើរការជាផ្លូវការ កាលពីថ្ងៃទី២៥ ខែតុលា ឆ្នាំ២០២៤ ដោយមានការសន្សំសំចៃដំបូងប្រហែល២០%ពីការចំណាយទិញជីសរីរាង្គរួមគ្នា បើធៀបនឹងថ្លៃដើមដែលសមាជិកនីមួយៗធ្លាប់ទិញរៀងខ្លួន ។ សហគមន៍កសិកម្មទំនើប«ម្រេចមេមត់ត្បូងឃ្មុំ» មានសមាជិកចូលរួមចំនួន ៤៩គ្រួសារ ដោយមានចម្ការចំនួន ៦៧ ស្មើនឹងផ្ទៃដី ៨០ហិកតា អាចដាំដុះម្រេចចំនួន ១២៥,0០០ជន្លង់ មានទីតាំងនៅភូមិជាច ឃុំមេមង ស្រុកមេមត់ ខេត្តត្បូងឃ្មុំ ។

បើតាម អ្នកនាំពាក្យក្រសួងកសិកម្មរូបនេះ បានឱ្យដឹងផងដែរថា សម្រាប់ទុនវិនិយោគទៅលើ សហគមន៍កសិកម្មទំនើប«ម្រេចមេមត់ត្បូងឃ្មុំ» មានទំហំទឹកប្រាក់ប្រហាក់ប្រហែលនឹង ១លានដុល្លារ​ ហើយសម្រាប់ទីផ្សារគឺផលិតកម្មកសិកម្មតាមកិច្ចសន្យា ។ សូមជម្រាបផងដែរថា សហគមន៍កសិកម្មម្រេចមេមត់ត្បូងឃ្មុំ មានសមត្ថភាពផលិតម្រេចបានចន្លោះពី ២៥០តោន ទៅ ៣០០តោនក្នុងមួយឆ្នាំ។ ទន្ទឹមគ្នានេះ ក្រសួងកសិកម្ម បានតភ្ជាប់ទីផ្សារជាមួយក្រុមហ៊ុនអន្តរជាតិចំនួន ៣ រួចហើយ រួមមាន ក្រុមហ៊ុន Fuchs, OLAM និង Sela Pepper ដើម្បីរង់ចាំ ទិញម្រេចពីសហគមន៍ដោយផ្ទាល់។

គួរបញ្ជាក់ដែរថា សហគមន៍កសិកម្ម «ម្រេចមេមត់ត្បូងឃ្មុំ» ធ្លាប់ត្រូវបាន ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមា​ញ់ និងនេសាទ ដឹកនាំគណៈប្រតិភូឯកអគ្គរដ្ឋទូតសហភាពអឺរ៉ុប ចុះពិនិត្យខ្សែច្រវាក់ផលិតកម្មដំណាំម្រេច កាលពីថ្ងៃទី២៨ ខែវិច្ឆិកា ឆ្នាំ២០២៤ នៅស្រុកមេមត់ និងបានកោតសរសើរចំពោះកសិក ប្រឹងប្រែងថែទាំដំណាំ ដោយអនុវត្តគោលការណ៍បច្ចេកទេស មានភាពធន់ទៅនឹងការប្រែប្រួលអាកាសធាតុ ដែលសង្ឃឹមថា ផលម្រេចនឹងទទួលបានមានគុណភាព ស្តង់ដារ ឆ្លើយតបទៅនឹងតម្រូវទីផ្សារ បំពេញបានលក្ខខណ្ឌតម្រូវរបស់ក្រុមហ៊ុនទាំង៣គឺ សិលាភេបភ័រ Sela Pepper ហ្វុក Fuchs និងអូរឡាំ OLAM ដែលតែងប្រមូលទិញម្រេចជារៀងរាល់ឆ្នាំ៕