បរទេស​៖​ ​វៀតណាម​ប្ដេជ្ញា​គាំទ្រ​ដល់​ការ​លើកកម្ពស់​សន្តិភាព​ ស្ថិរភាព​ ​និង​ការ​ស្ដារ​សេដ្ឋកិច្ច​ឡើងវិញ​របស់​មីយ៉ាន់ម៉ា ​បន្ទាប់ពី​កិច្ចប្រជុំ​ក្រៅ​ផ្លូវការ​រវាង​រដ្ឋមន្ត្រី​ការ​បរទេស​អាស៊ាន​ ​និង​មីយ៉ាន់ម៉ា​ជា​លើក​ដំបូង​ក្នុង​រយៈពេល​ ​៥​ ​ឆ្នាំ។​ ​នេះ​បើ​យោង​តាម​ការ​រាយការណ៍​ពី​ ​Vietnam​ ​Net​។

​កាលពី​ថ្ងៃអាទិត្យ​កន្លងទៅ​នេះ​ កិច្ចប្រជុំ​ក្រៅ​ផ្លូវការ​មួយ​រវាង​បណ្តា​រដ្ឋមន្ត្រី​ការ​បរទេស​អាស៊ាន​ និង​រដ្ឋមន្ត្រី​ការ​បរទេស​មីយ៉ាន់ម៉ា​ត្រូវបាន​ប្រព្រឹត្ត​ឡើង​នៅ​ទីក្រុង​បាងកក​ និង​ ក្រោម​ការ​ដឹកនាំ​ប្រជុំ​ដោយ​លោកស្រី​ ​Maria​ ​Theresa​ ​P​.​ ​Lazaro​ ​រដ្ឋមន្ត្រី​ការ​បរទេស​ហ្វីលីពីន​ ក្នុង​នាម​ជា​ប្រធាន​ប្ដូរ​វេន​អាស៊ាន​សម្រាប់​ឆ្នាំ​២០២៦​។​

​នេះ​គឺជា​ជំនួប​ផ្ទាល់​ជា​លើក​ដំបូង​បំផុត​រវាង​រដ្ឋមន្ត្រី​ការ​បរទេស​អាស៊ាន ​ជាមួយ​រដ្ឋមន្ត្រី​ការ​បរទេស​មីយ៉ាន់ម៉ា​ក្នុង​រយៈពេល​ប្រាំ​ឆ្នាំ​ ​ដោយ​បាន​សង្កត់ធ្ងន់​ពី​ការ​ប្ដេជ្ញាចិត្ត​របស់​អាស៊ាន​ក្នុង​ការ​បន្ត​កិច្ចសន្ទនា​ ​និង​តួនាទី​ស្នូល​របស់​ខ្លួន​នៅក្នុង​ការ​ទូត​តំបន់​។​ 

​កិច្ចប្រជុំ​ពិភាក្សា​នេះ​ធ្វើឡើង​ដោយ​អនុលោម​ទៅតាម​សេចក្ដីណែនាំ​របស់​ថ្នាក់ដឹកនាំ​អាស៊ាន​នៅក្នុង​កិច្ចប្រជុំ​កំពូល​អាស៊ាន​លើក​ទី​ ​៤៨​ ​នៅ​ទីក្រុង​សេប៊ូ ​ប្រទេស​ហ្វីលីពីន ​ដែល​បាន​អំពាវនាវ​ឱ្យ​មាន​ការ​បន្ត​កិច្ចពិភាក្សា​ជាមួយ​មីយ៉ាន់ម៉ា ​ស្រប​តាម​កិច្ចព្រមព្រៀង​ជា​ឯកច្ឆន្ទ ​៥​ ​ចំណុច​របស់​អាស៊ាន​ ​ដែល​ជា​ក្របខ័ណ្ឌ​ការងារ​តម្រង់ទិស​សម្រាប់​កិច្ចខិតខំប្រឹងប្រែង​ជួយ​មីយ៉ាន់ម៉ា​ក្នុង​ការ​ស្ដារ​សន្តិភាព​ ​និង​ស្ថិរភាព​ឡើងវិញ​។

​នៅក្នុង​កិច្ចប្រជុំ​កាលពី​ថ្ងៃអាទិត្យ​នោះ​ផងដែរ​ លោក​ ​Tin​ ​Maung​ ​Swe​ ​រដ្ឋមន្ត្រី​ការ​បរទេស​មីយ៉ាន់ម៉ា ​ជម្រាប​ជូន​សមភាគី​អាស៊ាន​អំពី​ការ​វិវត្ត​ចុងក្រោយ​បង្អស់​របស់​ប្រទេស​រួមមាន​ ​ផែនការ​សកម្មភាព​ ​១០០​ ​ថ្ងៃ​របស់​មីយ៉ាន់ម៉ា ​លំនាំ​វិធានការ​នានា​ក្នុង​ការ​ជំរុញ​សន្តិភាព​ ការ​ផ្សះផ្សា​ជាតិ​ ​និង​ស្ថិរភាព​ ​ព្រមទាំង​បាន​គូសបញ្ជាក់​ពី​ការ​បន្ត​ទំនាក់ទំនង​ជាមួយ​ភាគី​ពាក់ព័ន្ធ​នានា​ផងដែរ​។​

​បន្ទាប់ពី​ឆ្លងកាត់​ការ​ពិភាក្សា​ប្រកបដោយ​ភាព​ស្មោះត្រង់​ ​និង​ស្ថាបនា ​រដ្ឋមន្ត្រី​ការ​បរទេស​អាស៊ាន​ទាំងអស់​បាន​ផ្លាស់ប្តូរ​ទស្សនៈ​គ្នា​ទៅវិញទៅមក​លើ​ស្ថានការណ៍​បច្ចុប្បន្ន​ ​និង​បាន​ស្វែងរក​មធ្យោបាយ​ជាក់ស្ដែង​នានា ​ដើម្បី​ពង្រឹង​ការ​គាំទ្រ​របស់​តំបន់​ចំពោះ​មីយ៉ាន់ម៉ា ​តាមរយៈ​ការ​អនុវត្ត​កិច្ចព្រមព្រៀង​ជា​ឯកច្ឆន្ទ ​៥​ ​ចំណុច​ឱ្យ​កាន់តែ​មាន​ប្រសិទ្ធភាព​។

​ទន្ទឹមនឹង​នេះ​ លោក​ ​Le​ ​Hoai​ ​Trung​ ​រដ្ឋមន្ត្រី​ការ​បរទេស​វៀតណាម​ អះអាង​ជាថ្មី​ថា​ ​វៀតណាម​តែងតែ​ចាត់ទុក​មីយ៉ាន់ម៉ា​ជា​សមាជិក​ពេញ​សិទ្ធិ​របស់​អាស៊ាន ​ខណៈ​ដែល​គោរព​លើ​កិច្ចព្រមព្រៀង​ជា​ឯកច្ឆន្ទ ​៥​ ​ចំណុច​ ​ជា​ក្របខ័ណ្ឌ​គន្លឹះ​សម្រាប់​ការ​ផ្សារ​ភ្ជាប់​ទំនាក់ទំនង​របស់​អាស៊ាន​ជាមួយ​មីយ៉ាន់ម៉ា​ឡើងវិញ​។​

​លោក​ទទួលស្គាល់​នូវ​វិធានការ​នានា​ដែល​អាជ្ញាធរ​មីយ៉ាន់ម៉ា​បាន​អនុវត្ត​ដើម្បី​ជំរុញ​ស្ថិរភាព​នយោបាយ​ ស្តារ​សេដ្ឋកិច្ច​ឡើងវិញ​ ​កែលម្អ​ប្រព័ន្ធ​អភិបាលកិច្ច​ ​និង​ពង្រឹង​កិច្ចខិតខំប្រឹងប្រែង​ប្រឆាំង​នឹង​ឧក្រិដ្ឋកម្ម​ឆ្លង​ដែន ​រួមមាន​ ​ការ​ជួញដូរ​គ្រឿងញៀន​ បទល្មើស​បច្ចេកវិទ្យា​ ​និង​បញ្ហា​ប្រឈម​ផ្នែក​សន្តិសុខ​នៅ​តាម​តំបន់​ព្រំដែន​។​

​ស្រប​ពេល​ដែល​អនុវត្ត​កិច្ចព្រមព្រៀង​ជា​ឯកច្ឆន្ទ ​៥​ ​ចំណុច​ ​អាស៊ាន​គួរតែ​បន្ត​ស្វែងរក​គំនិត​ផ្ដួច​ផ្ដើម​ជាក់ស្តែង​បន្ថែម​ទៀត​រួមមាន​ ការ​រក្សា​កិច្ចសន្ទនា​ផ្ទាល់​ជាប្រចាំ​ជាមួយ​មីយ៉ាន់ម៉ា ​ដើម្បី​ស្វែងយល់​ឱ្យ​កាន់តែ​ច្បាស់​អំពី​ការ​វិវត្ត​ជាក់ស្ដែង​ ​និង​ជំរុញឱ្យ​មាន​វឌ្ឍនភាព​ច្បាស់លាស់​។​

 ​លោក​ ​Le​ ​Hoai​ ​Trung​ ​បញ្ជាក់​ថា​ ​វៀតណាម​ត្រៀមខ្លួន​ជាស្រេច​ក្នុង​ការ​សហការ​យ៉ាង​ជិតស្និទ្ធ​ជាមួយ​ប្រធាន​អាស៊ាន​ ​និង​បណ្តា​ប្រទេស​សមាជិក​ដទៃ​ទៀត​ក្នុង​ការ​គាំទ្រ​ដល់​ការ​ស្តារ​សេដ្ឋកិច្ច​របស់​មីយ៉ាន់ម៉ា ​ការ​ដោះស្រាយ​បញ្ហា​សង្គម​ ការ​ប្រយុទ្ធ​ប្រឆាំង​នឹង​ឧក្រិដ្ឋកម្ម​ឆ្លង​ដែន​ ​និង​ការ​ពង្រីក​កិច្ចសហប្រតិបត្តិការ​ទាំង​ក្នុង​កម្រិត​ទ្វេ​ភាគី​ ​និង​កម្រិត​អនុ​តំបន់​។​

​កិច្ចខិតខំប្រឹងប្រែង​ទាំងនេះ​នឹង​រួមចំណែក​ដល់​សន្តិភាព​ ស្ថិរភាព​ ​និង​ការ​អភិវឌ្ឍ​ប្រកបដោយ​ចីរភាព​នៅក្នុង​ប្រទេស​មីយ៉ាន់ម៉ា ​និង​តំបន់​ទាំងមូល ​ព្រមទាំង​ជំរុញ​ការ​កសាង​សហគមន៍​អាស៊ាន​ផងដែរ​។​

​នៅ​ខាងក្រៅ​កិច្ចប្រជុំ​នោះ​ រដ្ឋមន្ត្រី​ការ​បរទេស​វៀតណាម​ លោក​ ​Le​ ​Hoai​ ​Trung​ ​ក៏​បាន​ជួប​ពិភាក្សា​ទ្វេ​ភាគី​ដាច់ដោយឡែក​ពី​គ្នា​ជាមួយ​រដ្ឋមន្ត្រី​ការ​បរទេស​មីយ៉ាន់ម៉ា ​លោក​ ​Tin​ ​Maung​ ​Swe​ ​និង​រដ្ឋមន្ត្រី​ការ​បរទេស​ហ្វីលីពីន ​លោកស្រី​ ​Maria​ ​Theresa​ ​P​.​ ​Lazaro​ ​ដើម្បី​ពិភាក្សា​លើ​បញ្ហា​ដែល​មាន​ផលប្រយោជន៍​រួម​រវាង​គ្នា​ទៅវិញទៅមក​ផងដែរ​៕