សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ឈរលើគោលការណ៍កែច្នៃប្រកបដោយគុណភាពស្តង់ដារ មានអនាម័យខ្ពស់ និងការវេចខ្ចប់ប្រកដោយភាពទាក់ទាញផងនោះ បានធ្វើឱ្យក្រុមហ៊ុនកែច្នៃគ្រាប់ស្វាយចន្ទីក្នុងស្រុកមួយមានវឌ្ឍនភាពជាបន្តបន្ទាប់រហូតអាចនាំចេញគ្រាប់ស្វាយចន្ទីទៅកាន់ទីផ្សារក្នុងតំបន់អាស៊ីផង និងកំពុងត្រៀមនាំចេញទៅកាន់ទីផ្សារអ៊ឺរ៉ុបក្នុងបរិមាណច្រើនថែមទៀតផង។
អ្នកស្រី មុត ចរិយា ម្ចាស់សិប្បកម្ម ហ៊ែនក្រាហ្វធីត ឃែស៊ូណាត់ ស្ទឹងត្រែង បានឱ្យដឹងថាសិប្បកម្មរបស់អ្នកស្រីបង្កើតឡើងក្នុងអំឡុងឆ្នាំ២០២១ ដោយបានប្រមូលគ្រាប់ស្វាយចន្ទីពីចំការផ្ទាល់ខ្លួន និងប្រមូលទិញពីកសិករនៅក្នុងតំបន់ខ្លះ សម្រាប់ធ្វើការកែច្នៃលក់នៅទីផ្សារក្នុងស្រុក ហើយក៏បានរៀបចំការវេចខ្ចប់លក្ខណៈស្តង់ដារ ដើម្បីនាំចេញទៅកាន់ទីផ្សារក្រៅប្រទេសខ្លះៗ រួមមានទីផ្សារប្រទេសជប៉ុន ហុងកុង ជប៉ុន និងប្រទេសអ៊ីស្រាអែល ប៉ុន្តែក្នុងបរិមាណមានកម្រិតនៅឡើយ ពោលគឺចន្លោះពី ៥០០គីឡូក្រាម ទៅ ១០០០គីឡូក្រាមប៉ុណ្ណោះ។
ក្រោយការសាកល្បងនាំចេញទៅកាន់ទីផ្សារតាមបណ្តាប្រទេសខាងលើរួចមកឃើញថាទទួលបានបទពិសោធន៍ច្រើនគួរសម ក៏ចាប់ផ្តើមស្វែងរកទីផ្សារក្រៅប្រទេសបន្ថែមទៀត ជាពិសេស ទីផ្សារសហរដ្ឋអាមេរិក ទីផ្សារក្នុងប្រទេសអង់គ្លេស និងប្រទេសអ៊ីស្រាអែល ក្នុងបរិមាណប្រមាណម្តងមួយទូកុងទីណឺ ទម្ងន់ប្រមាណ ២៦តោន សម្រាប់ការនាំចេញម្តងៗ។
អ្នកស្រីអះអាងថា ក្រោមការគាំទ្រដោយក្រសួងកសិកម្ម រុក្ខាប្រមាញ់ និងនេសាទ ក៏ដូចជាក្រសួងពាណិជ្ជកម្ម សម្រាប់ការស្វែងរកទីផ្សារនៅក្រៅប្រទេស ហាក់មិនមានការលំបាកនោះទេសម្រាប់គ្រាប់ស្វាយចន្ទីកម្ពុជា។ មិនមានការលំបាក ដោយសារគុណភាពគ្រាប់ស្វាយចន្ទី ឈរលំដាប់ថ្នាក់លេខ២នៅលើពិភពលោក ហើយគ្រាន់តែរៀបចំកែច្នៃទៅតាមបទដ្ឋានស្តង់ដារអនាម័យ ដែលក្រសួងបានកំណត់ និងយកចិត្តទុកដាក់វេចខ្ចប់ឱ្យបាន ស្អាតប្រកបដោយសោភ័ណ្ឌភាព និងភាពទាក់ទាញបន្ថែមទៀតនោះ ប្រាកដជាមានឈ្មួញមកទាក់ទងនាំចេញមិនខាន។ នេះជាការលើកឡើងរបស់អ្នកស្រី មុត ចរិយា…។
អ្នកស្រីបានបញ្ជាក់ថា ៖
«គុណភាពគ្រាប់ស្វាយចន្ទីក្នុងប្រទេសកម្ពុជាយើង ត្រូវបានគេទទួលស្គាល់ថាឈរលំដាប់លេខ២ នៅលើពិភពលោក គ្រាន់តែកន្លងមកភាគច្រើនយើងមិនបានកែច្នៃខ្លួនឯង ភាគច្រើនឈ្មួញប្រម៉ូលទិញចន្ទីពីកម្ពុជាទៅដាក់ឈ្មោះគេ ដែលជាការធ្វើឱ្យបាត់អត្តសញ្ញាណចន្ទីរក្នុងស្រុកយើង »។
គួរបញ្ជាក់ថា សិប្បកម្ម ហ៊ែនក្រាហ្វធីត ឃែស៊ូណាត់ ស្ទឹងត្រែង បច្ចុប្បន្នបានចូលរួមចំណែកក្នុងការកាត់បន្ថយភាពក្រីក្រផងដែរ ដោយបានផ្តល់ការងារដល់បុគ្គលិក កម្មករចំនួន៤០នាក់។ ចំណែកស្រុក ដែលមានគ្រាប់ស្វាយចន្ទីច្រើនជាងគេនៅក្នុងខេត្តស្ទឹងត្រែង មានចំនួន ៣ គឺស្រុកសៀមបូក ស្រុកសេសាន និងស្រុកថាឡាបរិវ៉ាត់។
ម្ចាស់សិប្បកម្មខាងលើ ក៏បានអំពាវនាវដល់សាធារណៈជនទូទៅចូលរួមជួយគំទ្រាំគ្រាប់ស្វាយចន្ទីកម្ពុជាទាំងអស់គ្នា ហើយចំពោះសិប្បកម្មកែច្នៃ ក៏ត្រូវបង្កើនគុណភាព សោភ័ណភាព និងអនាម័យ ដើម្បីលើកកម្ពស់ដល់គ្រាប់ស្វាយចន្ទីកម្ពុជា បង្កើតម៉ាកសញ្ញាគ្រាប់ស្វាយចន្ទីកម្ពុជា ចូលរួមលើកកំ្ពស់កំណើនសេដ្ឋកិច្ចជាតិ ក៏ដូចជាផ្តល់ការងារដល់ពលរដ្ឋខ្មែរបានកាន់តែច្រើន៕ វិន ឈុនហ៊ាត
Account
Security
Favourite Content