ភ្នំពេញ ៖ ចាប់តាំង​ពីយោធា​ថៃ​បានបើកការឈ្លានពាន​លើទឹកដីកម្ពុជា កាលពីអំឡុងខែឧសភា ២០២៥ រហូតដល់ពេលនេះ ពលរដ្ឋ​កម្ពុជា​ស្ទើរតែទូទាំ​ងប្រទេស​បាន​នាំគ្នាធ្វើពហិការ​លើ​ទំនិញរបស់ថៃ ហើយការ​ធ្វើពហិការ​លើទំនិញថៃនេះដែរ គឺជា​ឱកាស​ល្អបំផុត​សម្រាប់​អ្នកផលិតនៅក្នុងប្រទេស​ដើម្បីពង្រីកខ្លួនឱ្យកាន់តែធំ។​

ឯកឧត្តម​ ​ប៉ែន សុវិជាតិ អ្នកនាំពាក្យ​ក្រសួងពាណិជ្ជកម្ម​ នៅក្នុងកិច្ចពិភាក្សា​តុមូល​ កាលពីថ្ងៃទី២៩ ឧសភា ២០២៦ នៅរាជបណ្ឌិត្យសភាកម្ពុជា​ បានមានប្រសាសន៍ថា នៅពេលដែលពលរដ្ឋកម្ពុជា កំពុងធ្វើពហិការ​លើ​ទំនិញថៃ គឺជា​ដំណាក់កាលមួយ​ដែលមានឱកាស​ល្អបំផុត​សម្រាប់​ ឧស្សាហកម្មក្នុងស្រុក​រីក​ចម្រើន។ ក្នុងដំណាក់កាលនេះ បើសិន​សហគ្រិន​ក្នុងស្រុកមិនព្រមឆ្លៀតឱកាស​នេះទេ ពួកគេអាចនឹង​បាត់បង់ឱកាស​ដ៏ល្អនេះហើយ។

ឯកឧត្តមបានបន្តថា កន្លងមកនេះ សហគ្រិនមួយចំនួន ​បានចាប់ផ្ដើម​ឆក់យកឱកាស​ដើម្បីពង្រីកខ្លួន ពង្រីកទីផ្សារ​លើផលិតរបស់ខ្លួន​ ជាក់ស្ដែង​ គ្រាន់តែមានបញ្ហា​ជាមួយប្រទេសថៃភ្លាម​ ធ្វើឱ្យពលរដ្ឋ​កម្ពុជា​ឈប់ប្រើ​មីម៉ាម៉ារបស់ថៃ​ភ្លាមដែរ ហើយពេលនោះ ក្រុមហ៊ុនផលិត​​មី​របស់ខ្មែរ ក៏ឱកាស​មកជំនួស​មីម៉ាម៉ា​ និង​បានផលិតនូវ​ផលិតផល​ថ្មីៗដើម្បីបំពេញតម្រូវការ​លើទីផ្សារ។

ឯកឧត្តម​បានបន្ថែមថា ទន្ទឹមនឹង​ពង្រីកខ្លួននៅលើទីផ្សារ ដើម្បីបំពេញតម្រូវការ​សម្រាប់អតិថិជន និង​ប្រជាពលរដ្ឋកម្ពុជា​បានហើយ​ សហគ្រិន​ក្នុងស្រុកក៏ត្រូវ​តែគិតគូរពីគុណភាពនៃផលិតផល​ខ្លួន​ផងដែរ។ ជាមួយគ្នា​ ត្រូវមានអ្វីសម្រាប់ទាក់ទាញ​និងទាក់ចិត្ត​អ្នក​ប្រើប្រាស់​ ដូចជា​សោភណ្ឌភាព​លើ​សំបក​វេចខ្ចប់ជាដើម។

លោកឧកញ៉ា ​តែ តាំងប៉​ ប្រធានសម្ព័ន្ធសមាគមសហគ្រាស​ធុនតូច និងមធ្យមកម្ពុជា បានមានប្រសាសន៍ថា ជាការកត់សម្គាល់ និងតាមរបាយការណ៍របស់ក្រសួងពាណិជ្ជកម្ម បានបង្ហាញ ក្រោយពីពលរដ្ឋខ្មែរ​បានធ្វើពហិការ​លើផលិតផលថៃ ជាក់ស្ដែង​តាមការ​យៈការ​រៀបចំពិព័រណ៍ផលិតផលខ្មែរ ​ជាច្រើនលើ​ក ឃើញថា ប្រជាពលរដ្ឋខ្មែរ​ស្វែងរ​កទិញផលិតផលខ្មែរ​ច្រើន រហូតដល់​ស្តង់ខ្លះ​ត្រូវអស់​ផលិតផលលក់​មុន​ថ្ងៃបញ្ចប់ពិព័រណ៍។

លោកឧកញ៉ា បាន​បន្តថា ការគាំទ្រ​លើផលិតផលខ្មែរ​ពីសំណាក់​ពលរដ្ឋខ្មែរ មិនត្រឹមតែជួយ​ដល់អ្នកផលិត​នូវទំនិញ​ប្រើប្រាស់នោះទេ ប៉ុន្តែវាក៏បានជួយដល់អ្នកផ្គត់ផ្គង់​វត្ថុធាតុដើម ​ដូចជា​កសិករ ដាំដុះ ចិញ្ចឹមសត្វ ហើយនឹងធ្វើឱ្យសេដ្ឋកិច្ចកម្ពុជា​កាន់តែរីកចម្រើនទៅមុខ​ជាលំដាប់។

លោក ​កឹម សាន អគ្គនាយក​ក្រុមហ៊ុន​ភីហ្សា​គ្រួសារ​រីករាយ ដែលជាសិប្បកម្មផលិតម្សៅភីហ្សា​មួយនៅក្នុងរាជធានីភ្នំពេញ បានមានប្រសាសន៍ថា​ ការបិទព្រំដែន និងការធ្វើពហិការពីសំណាក់​ប្រជាពលរដ្ឋ​កម្ពុជា​ គឺជា​ឱកាស​នៃការ​ពង្រីកខ្លួន​ពង្រីកទីផ្សារ​នៃផលិតផល​ដែលផលិតក្នុងប្រទេស​ ជាក់ស្ដែង ​​ម្សៅភីហ្សា ​និង​គ្រឿងទេស​របស់សិប្បកម្ម​លោក​ មានសន្ទុះ គាំទ្រ​និងតម្រូវការ​ខ្ពស់ ពោលគឺកើនឡើង​រហូតដល់​ប្រមាណ ៧០ ភាគរយ​ ធៀបនឹង​មុន​ពេលមានបញ្ហាជាមួយថៃ។

លោកបានបន្តថា កាលពីមុន អាជីវករ​មួយចំនួនបានប្រើប្រាស់​ផលិតផលថៃច្រើន ​ដូចជា ម្សៅភីហ្សាទឹកជ្រលក់​ និងគ្រឿង​ផ្សំជាច្រើនទៀត ប៉ុន្តែនៅពេលមានបញ្ហា​ជម្លោះព្រំដែន និងការឈ្លានពានទឹកដីកម្ពុជា​ពី​សំណាក់​យោធាថៃ ធ្វើឱ្យ​អាជីវករ​ស្ទើរតែទាំង​អស់​បានបញ្ឈប់ការ​លក់​របស់ថៃ​​។ លោកថា​៖

“ការ​បញ្ឈប់ការ​លក់​ផលិតផលថៃ​ពីសំណាក់អាជីវករ​ខ្មែរ​ ​មកពីកត្តា​មួយចំនួន ដូចជា​ផលិតផល​នោះ ពិបាកនាំចូល បើចូលបានក៏ត្រូវអស់ថ្លៃខ្ពស់ ដូច្នេះអាជីវករ​ក៏ត្រូវលក់ក្នុងតម្លៃខ្ពស់ ដែលពិបាក​ក្នុងការប្រកួតប្រជែងជាមួយផលិតផល​ក្នុងស្រុក។ ម្យ៉ាងទៀត ដោយសារតែកម្លាំងពហិការពីសំណាក់ប្រជាពលរដ្ឋ​ខ្មែរ ផលិតផលថៃភាគច្រើនមិនមានអ្នកទិញទៀតទេ ហើយបើសិនជា​នាំចូលមកក៏លក់មិនដាច់ដែរ ទើប​អាជីវករ​ក៏ផ្លាស់ប្តូរមកប្រើប្រាស់ក្នុងស្រុកកាន់តែច្រើន។”​

លោក កឹម សាន​ បានបញ្ជាក់ថា ​ទន្ទឹមនឹង​ទីផ្សារ​កើនឡើង​ខ្ពស់​បែបនេះ សិប្បកម្ម​របស់លោកក៏បានផលិត​នូវ​ផលិតថ្មីៗបន្ថែម​ទៀត ដើម្បីបំពេញ​នៅលើទីផ្សារ ដោយ​រំពឹងថា​អាចជំនួស​ផលិតផលរបស់ថៃទាំងស្រុង​នៅពេលអនាគ​ត ហើយបើសិនជាថៃបើកព្រំដែន​វិញ ហើយមានការនាំចូលវិញ ក៏ខ្មែរមានផលិតផល​ជារបស់ខ្មែរ​សម្រាប់ផ្គត់ផ្គង់លើទីផ្សារ​ស្រាប់ទៅហើយ​៕