ភ្នំពេញ ៖ សមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA) បានសហការជាមួយមជ្ឈមណ្ឌលជាតិផ្តល់ឈាមកម្ពុជា រៀបចំកម្មវិធីបរិច្ចាគឈាមកាលពីថ្ងៃទី៧ ខែមីនា ឆ្នាំ២០២៥ នៅវិទ្យាស្ថានសិក្សាបច្ចេកទេសធនាគាររាជធានីភ្នំពេញ។

ព្រឹត្តិការណ៍នេះ មានគោលបំណងចូលរួមចំណែកបំពេញតម្រូវការផ្គត់ផ្គង់ឈាមនៅតាមមន្ទីរពេទ្យនៃប្រទេសកម្ពុជា លើកកម្ពស់វប្បធម៌នៃការបរិច្ចាគឈាមដោយស្ម័គ្រចិត្តនៅក្នុងវិស័យធនាគារ និងហិរញ្ញវត្ថុ ព្រមទាំងសាធារណជនផងដែរ។

កម្មវិធីបរិច្ចាគឈាមនេះទទួលបានការចូលរួមស្ម័គ្រចិត្តយ៉ាងច្រើនកុះករពីសំណាក់ថ្នាក់ដឹកនាំធនាគារជាតិនៃកម្ពុជា ថ្នាក់ដឹកនាំគ្រឹះស្ថានធនាគារ និងមីក្រូហិរញ្ញវត្ថុ និងមន្ត្រីធនាគារជាតិនៃកម្ពុជា បុគ្គលិកគ្រឹះស្ថានធនាគារ និងមីក្រូហិរញ្ញវត្ថុ ប្រមាណជា ៥០០ នាក់។ សប្បុរសជនទាំងអស់បានបង្ហាញពីការយកចិត្តទុកដាក់របស់ពួកគេក្នុងការជួយសង្គ្រោះជីវិត។ ឈាមដែលបានបរិច្ចាគនឹងត្រូវប្រើប្រាស់ដើម្បីជួយអ្នកជំងឺដែលត្រូវការជំនួយ ដូចជាជនរងគ្រោះដោយគ្រោះថ្នាក់ ស្ត្រីដែលជួបប្រទះបញ្ហាសម្រាលកូន និងអ្នកជំងឺដែលទទួលការវះកាត់ត្រូវការឈាម។

លោក Ong Ming Teck សមាជិកក្រុមប្រឹក្សាភិបាលសមាគមធនាគារនៅកម្ពុជា បានថ្លែងអំណរគុណដល់ថ្នាក់ដឹកនាំ និងបុគ្គលិកគ្រឹះស្ថានធនាគារ និងហិរញ្ញវត្ថុទាំងអស់ដែលបានចូលរួមក្នុងកម្មវិធីបរិច្ចាគឈាមនេះ។

លោកបន្តថា៖

«សមាគមធនាគារនៅកម្ពុជា បានដើរតួនាទីយ៉ាងសំខាន់ក្នុងការជំរុញវិស័យធនាគារប្រកប​ដោយភាពរឹងមាំ និងបរិយាបន្ន។ វិស័យធនាគារ និងហិរញ្ញវត្ថុ គឺកសាងឡើងតាមរយៈការបង្កើនទំនុកចិត្តពីសាធារណជន ផ្អែកលើការប្រតិបត្តិអាជីវកម្មប្រកបដោយការទទួលខុសត្រូវ ការប្តេជ្ញាចិត្តចំពោះសង្គម និងសហគមន៍របស់យើង។ ទំនួលខុសត្រូវរបស់យើង គឺលើសពីការផ្តល់សេវា និងផលិតផលហិរញ្ញវត្ថុ វារួមបញ្ចូលនូវការបណ្តុះនូវស្មារតីសាមគ្គី ក្តីមេត្តា និងសុខមាលភាពរបស់ប្រជាជនកម្ពុជា»។

 លោកបន្ថែមឱ្យដឹងថា គំនិតផ្តួចផ្តើមនៃការបរិច្ចាគឈាមនេះ ក៏ស្របតាមយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជាផងដែរ ដែលផ្តល់អាទិភាពដល់សុខភាព និងភាពធន់របស់ប្រទេសកម្ពុជា។

លោកស្រីវេជ្ជបណ្ឌិតឯកទេស ហេង សុខចំរើន អនុប្រធានមជ្ឈមណ្ឌលជាតិផ្តល់ឈាមកម្ពុជា បានមានប្រសា​សន៍ថា៖ ក្នុងនាមមជ្ឈមណ្ឌលជាតិផ្តល់ឈាមនៃក្រសួងសុខាភិបាល មន្ត្រីរាជការបុគ្គលិកទាំងអស់សូមស្វាគមយ៉ាងកក់ក្តៅបំផុតចំពោះសប្បុរសជនទាំងអស់ ដែលបានធ្វើអំណោយទានសម្រាប់ជីវិត និងបានធ្វើសកម្ម​ភាពគ្រប់បែបយ៉ាងដើម្បីលើកកម្ពស់ការបរិច្ចាគឈាមដោយស្ម័គ្រចិត្ត និងមិនទទួលកម្រៃ រួមចំណែកជួយសង្គ្រោះជីវិតជនរងគ្រោះដោយក្តីសប្បុរស។

លោកស្រីវេជ្ជបណ្ឌិត បានបញ្ជាក់ថា៖

«យុទ្ធនាការថ្ងៃនេះ គឺជាប្រធានបទដ៏មានអត្ថន័យ សម្រាប់យើងទាំងអស់គ្នា និងមានគោលបំណងសំខាន់២គឺ៖ទី១៖ បង្កើតទម្លាប់ និងវប្បធម៌នៃការបរិច្ចាគឈាមដោយស្ម័គ្រចិត្ត និងជំរុញលើកកម្ពស់ឲ្យយុវជនប្រជាជនទូទៅ ចូលរួមធ្វើសកម្មភាពជាមួយសេវាកម្មជាតិផ្តល់ឈាមនៅទូទាំងប្រទេសដើម្បីធានាឱ្យមានការផ្គត់ផ្គង់ឈាមគ្រប់គ្រាន់សម្រាប់អ្នកជំងឺដែលកំពុងត្រូវការឈាមនៅគ្រប់មន្ទីរពេទ្យទាំងអស់ដោយគ្មានការរើសអើង មិនប្រកាន់ជាតិសាសន៍ ឬសាសនា និងទី២៖ ផ្សា​ភ្ជាប់សកម្មភាពនៃការបរិច្ចាគឈាមដោយស្ម័គ្រចិត្តទៅនឹងសកម្មភាពមនុស្សធម៌ដ៏ល្អប្រពៃក្នុងសង្គម» ។

លោកស្រីអនុប្រធានមជ្ឈមណ្ឌលជាតិផ្តល់ឈាមកម្ពុជាបានជម្រាបថា ៖ ការបរិច្ចាគឈាមមិនប៉ះពាល់ដល់សុខភាពទេ ហើយឈាមមានប្រភពតែមួយគត់ គឺពីមនុស្ស ដោយមិនមានរោងចក្រណា ឱសថណាអាចផលិតឈាមបាននោះទេ។

លោកស្រីវេជ្ជបណ្ឌិត បានឱ្យដឹងថា៖ ស្ថានភាពតម្រូវការឈាមក្នុងឆ្នាំ២០២៤កន្លងមកនេះ មានតម្រូវការឈាមមួយប្លោករៀងរាល់ ៥នាទីម្តង ដើម្បីជួយសង្គ្រោះជីវិតអ្នកជំងឺ។ តម្រូវការឈាមប្រចាំថ្ងៃ ជាមធ្យមសរុប ៣៥០ប្លោកនៅរាជធានីភ្នំពេញ។ តម្រូវការទូទាំងប្រទេសមានប្រមាណជិត ១៧៩,៣៣២ប្លោក ហើយ​មជ្ឈមណ្ឌលជាតិផ្តល់ឈាមបានគ្របដណ្តប់ជាង ៧៥%នៃការផ្គត់ផ្គង់ឈាមទូទាំងប្រទេស។ ប៉ុន្តែការទទួលអំណោយឈាមតាមរយៈសប្បុរសជនដោយស្ម័គ្រចិត្ត និងមិនទទួលកម្រៃឆ្លើយតបបានតែ ២២.១% នៃតម្រូវការក្នុងប្រទេសយើងតែប៉ុណ្ណោះ ក្នុងខណៈដែលប្រទេសជិតខាង ការបរិច្ចាគឈាមដោយស្ម័គ្រចិត្តអាចផ្គត់ផ្គង់រហូតដល់លើសពី៩០%នៃតម្រូវការ។ នេះបើយោងតាមទិន្នន័យរបស់ អង្គការសុខភាពពិភពលោក។

លោក វី ស័ក្កដា ប្រធាននាយកដ្ឋានបុគ្គលិកធនាគារជាតិនៃកម្ពុជា បានថ្លែងអំណរគុណយ៉ាងជ្រាលជ្រៅចំពោះសមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា មជ្ឈមណ្ឌលជាតិផ្តល់ឈាម មន្ត្រីបុគ្គលិកធនាគារជាតិនៃកម្ពុជា និងលោក លោកស្រី ជាសប្បុរសជនទាំងអស់ដែលស្ម័គ្រចិត្តចូលរួមបរិច្ចាគឈាមយ៉ាងកុះករដែលញ៉ាំងឱ្យព្រឹត្តិការណ៍នៅថ្ងៃនេះកាន់តែមានអត្ថន័យបន្ថែមទៀត។

លោកបានលើកឡើងថា៖

« ការស្ម័គ្រចិត្តចូលរួមបរិច្ចាគឈាមជូនប្រជាពល​រដ្ឋ គឺជាសកម្មភាពសប្បុរសធម៌មួយក្នុងការជួយសង្គ្រោះអាយុជីវិតរបស់អ្នកជំងឺដែលត្រូវការឈាម។ ដោយឡែកធនាគារជាតិនៃកម្ពុជាក៏តែងតែអនុវត្តតាមស្មារតីនេះ ដោយលើកទឹកចិត្តឱ្យមន្ត្រីបុគ្គលិកទាំងអស់ចូលរួមសកម្មភាពសង្គមជាច្រើន និងគ្រប់រូបភាព»។

លោកបានបញ្ជាក់ថា៖ សកម្មភាពសប្បុរសធម៌ជួយសង្គម គឺជាការងារមួយដែលថ្នាក់ដឹកនាំធនាគារជាតិនៃកម្ពុជាតែងតែយកចិត្តទុកដាក់ដើម្បីដោះស្រាយទុក្ខលំបាករបស់ប្រជាពលរដ្ឋ និងរួមចំណែកអភិវឌ្ឍសង្គម​​យើងឱ្យកាន់តែប្រសើរឡើង។ ជាក់ស្តែងឯកឧត្តម ជា ចាន់តូ ទេសាភិបាលកិត្តិយសធនាគារជាតិនៃកម្ពុជា បានបន្សល់ទុកមរតកជាច្រើនក្នុងសកម្មភាពជួយសង្គមទាំងវិស័យពុទ្ធចក្រ និងអាណាចក្រ នៅគ្រប់រាជធានី ខេត្តទូទាំងប្រទេស ដែលក្នុងនោះក៏មានវិស័យសុខាភិបាលផងដែរ តាមរយៈការជួយកសាង និងជួសជុលមន្ទីរពេទ្យបង្អែកស្រុកស្ទោង មណ្ឌលសុខភាពតាំងក្រសាំង និងអគារកាកបាទក្រហមស្រុកតាំងក្រសាំង។ល។

ជាមួយគ្នានេះ លោកជំទាវបណ្ឌិតទេសាភិបាល ជា សិរី បានបន្តសកម្មភាពសប្បុរសធម៌ជួយសង្គមជាច្រើនពីឯកឧត្តមអតីតទេសាភិបាលកិត្តិយសជារៀងដរាបមក។ ជាពិសេស សម្រាប់វិស័យសុខាភិបាល លោកជំទាវបណ្ឌិតទេសា​ភិបាល តែងតែដឹកនាំយុវជនស្ម័គ្រចិត្តធនាគារជាតិនៃកម្ពុជា សហការជាមួយក្រុមគ្រូពេទ្យស្ម័គ្រចិត្តមកពីមូលនិធិចក្ខុខ្មែរ (Khmer Sight Foundation) អង្គការផ្តល់នូវក្តីសង្ឃឹមកម្ពុជា (HOPE Cambodia) និងមូលនិធិរក្សាកុមារ ដើម្បីពិនិត្យ ព្យាបាលភ្នែក និងត្រចៀក ជូនប្រជាពលរដ្ឋក្នុងខេត្តកំពង់ធំ ទាំងនៅមូលដ្ឋានផ្ទាល់ និងនៅមន្ទីរពេទ្យក្នុងរាជធានីភ្នំពេញ។ ចំពោះការស្ម័គ្រចិត្តចូលរួមបរិច្ចាគឈាម ធនាគារជាតិនៃកម្ពុជា បានសហការជាមួយសមាគមធនាគារនៅកម្ពុជា និងមជ្ឈមណ្ឌលជាតិផ្តល់ឈាម រៀបចំកម្មវិធីបរិច្ចាគឈាមចំនួន ៣លើករួចមកហើយ ដើម្បីរួមចំណែកផ្តល់ឈាមដល់អ្នកជំងឺកំពុងរង់ចាំការសង្គ្រោះអាយុជីវិតពីក្រុមវេជ្ជបណ្ឌិតគ្រប់ជំនាញឯកទេស។

លោកបានបន្តលើកឡើងថា៖ សកម្មភាពចូលរួមស្ម័គ្រចិត្តបរិច្ចាគឈាមនៅកម្ពុជា កាន់តែមានសភាពផុសផុល ប៉ុន្តែអំណោយឈាមតាមរយៈសប្បុរសជនស្ម័គ្រចិត្តមិនទាន់អាចឆ្លើយតបបាន ១០០% ទៅនឹងតម្រូវការឈាមនៅប្រទេសយើងនៅឡើយ ដែលបង្ហាញឱ្យឃើញថា កត្តាកង្វះឈាមគឺជាបញ្ហាប្រឈមមួយដែលត្រូវយកចិត្តទុកដាក់ជាទីបំផុត។ ហេតុដូចនេះ តាងនាមឱ្យលោកជំទាវបណ្ឌិតទេសាភិបាល ជា សេរី លោកសូមលើកទឹកចិត្តដល់មន្ត្រីបុគ្គលិកធនាគារជាតិនៃកម្ពុជាគ្រប់រូបស្ម័គ្រចិត្តចូលរួមបរិច្ចាគឈាមឱ្យបានកុះ​ករ​ថែមទៀត ព្រោះឈាមគឺជាឱសថដ៏ឧត្តង្គឧត្តមសម្រាប់ជួយសង្រ្គោះអ្នកជំងឺ ព្រមទាំងទទួលបានអត្ថប្រយោជន៍ចំពោះសុខភាពផ្ទាល់ខ្លួនយើងផងដែរ៕