បរទេស ៖ អស់រយៈពេលជាច្រើនឆ្នាំមកហើយ ពោលគឺតាំងពីមុនផ្ទុះ​សង្គ្រាម​នៅ​អ៊ុយក្រែនមកម៉្លេះ ប្រទេសរុស្ស៊ីត្រូវបានគេទទួលស្គាល់ថាគឺជាអ្នក​នាំ​ចេញ​អាវុធ​ធំ​ទី​២នៅ​លើ​ពិភពលោកបន្ទាប់ពីសហរដ្ឋអាមេរិក ប៉ុន្តែទណ្ឌកម្មអន្តរជាតិលើឧស្សាហកម្មការពារជាតិរុស្ស៊ីបាន និងកំពុងតែធ្វើឲ្យអតិថិជនរបស់ខ្លួនជាច្រើនចាប់ផ្តើមងាកទៅរកជម្រើសផ្សេងជំនួសវិញ។

តាមការបញ្ជាក់ពីអ្នកសង្កេតព្រឹត្តិការណ៍នយោបាយបានឱ្យដឹងថា បើទោះបីជាចិនដែលជាតួអង្គដ៏សំខាន់មួយនៅក្នុងការដឹកនាំពិភពលោកមួយដែរនោះមិនទាន់ស្ថិតនៅកម្រិតប្រកួតប្រជែងក្នុងទីផ្សារលក់អាវុធក្តី ប៉ុន្តែបើគេសិក្សាអំពីសមត្ថភាព និងបច្ចេកវិទ្យារបស់ចិននាបច្ចុប្បន្នគឺមិនអាចមើលរំលងបានឡើយបន្ទាប់ពីមហាអំណាចសព្វាវុធកំពូលៗទាំងអស់ រាប់ទាំងសហរដ្ឋអាមេរិកផងដែរ។ យ៉ាងណាក្តី បច្ចុប្បន្ននេះ ចិនបានឆក់យកឳកាសមាសនៅក្នុងទីផ្សារលក់អាវុធខណៈដែលអាមេរិក និងរុស្សីកំពុងប្រទាញប្រទង់គ្នាលើបញ្ហានៅអ៊ុយក្រែនដោយក្នុងនោះសកម្មភាពលក់យន្តហោះចម្បាំងរបស់រដ្ឋាភិបាលប៉េកាំងកំពុងមានភាពរីកចម្រើនខ្លាំងគួរឲ្យកត់សម្គាល់គិតចាប់តាំងតែពីពេលដែលមានជម្លោះនៅអ៊ុយក្រែន។

ជាក់ស្តែង កាលពីដើមខែតុលានេះ យន្តហោះចម្បាំងចិនប្រភេទ FJ-17 ជាច្រើនគ្រឿងត្រូវបានប្រគល់ទៅឲ្យប្រទេសអាស៊ែបៃហ្សង់​​ (Azerbaijan)តាមការបញ្ជាទិញ។ យន្តហោះដែលជាផលិតផលថ្មី និងផលិតនៅក្នុងប្រទេសប៉ាគីស្ថានដោយក្រុមហ៊ុនចិននេះ បានធ្វើដំណើរទៅដល់ប្រទេស Azerbaijan តាមផែនការ និងក្នុងនាមជាប្រទេសអតីតសូវៀតទី៤ហើយដែលបានបញ្ជាទិញយន្តហោះចម្បាំងរបស់ចិន។

ប៉ាគីស្ថាន បានប្រកាសកាលពីសប្តាហ៍មុននេះថា យន្តហោះចម្បាំង JF-17 ទាំងនោះគឺជាផ្នែកនៃការបញ្ជាទិញសរុបមានតម្លៃដល់ទៅ ១,៦ពាន់លានដុល្លារដែលបានចុះហត្ថលេខាកាលពីខែកុម្ភៈ។ កុងត្រាទាំងនោះរួមមានទាំងយន្តហោះចម្បាំងផង កាបណ្តុះបណ្តាលផង និងសព្វាវុធបំពាក់លើយន្តហោះមួយចំនួនទៀត។

ទោះជាយ៉ាងណា ប្រតិបត្តិការទិញ-លក់យន្តហោះចម្បាំងរបស់ចិនលើកនេះត្រូវបានអ្នកជំនាញមើលឃើញថា វាគឺជាការត្រួសត្រាយផ្លូវរបស់ចិនឲ្យអាចក្លាយទៅជាមហាអំណាចក្នុងនាមជាអ្នកលក់អាវុធដ៏ធំំមួយរបស់ពិភពលោក ដែលអាចប្រកួតប្រជែងតំណែងជាមួយនឹងអាមេរិក, រុស្ស៊ី ជាក់ជាមិនខាននៅពេលខាងមុខ។

គួរឲ្យដឹងដែរថា យន្តហោះចម្បាំងជំនាន់ទី 4.5មួយនេះគឺជាយន្តហោះចម្បាំងមានមុខងារចមុ្រះអាចវាយប្រហារទាំងនៅលើអាកាស និងនៅលើទីតាំងផ្ទាល់ដីក៏បាន។ វាគឺជាផលិតផលដែលមានការរួមសហការផលិតរួមគ្នាដោយក្រុមហ៊ុនប៉ាគីស្ថាន Pakistan Aeronautical Complex និងក្រុមហ៊ុនចិន China’s Chendgu Aerospace Corporation ហើយកន្លងមកវាត្រូវបានលក់ទៅឲ្យប្រទេសមួយចំនួនរួចមកហើយដែរ ដូចជា មីយ៉ាន់ម៉ា, នេហ្ស៊ីរីយ៉ា និងអ៊ីរ៉ាក់។

ដោយឡែក សម្រាប់ប្រទេសប៉ាគីស្ថានវិញ បច្ចុប្បន្នត្រូវបានគេមើលឃើញថា ជាអតិថិជនដ៏សំខាន់មួយរបស់ចិន ពោលគឺបាននាំចូលអាវុធភាគច្រើនដល់ទៅ៦០ភាគរយពីរដ្ឋាភិបាលទីក្រុងប៉េកាំង ហើយក្នុងនោះយន្តហោះចម្បាំងម៉ូដេល JF-17 នេះមានរហូតទៅដល់១៦១គ្រឿង និងយន្តហោះចម្បាំង J-10C ប្រមាណជា២០គ្រឿង។ យន្តហោះចម្បាំង JF-17 ជំនាន់ទី 4.5 ត្រូវបានគេសង្កេតឃើញថាមានរូបរាងនិងសមត្ថភាពប្រកួតប្រជែងទៅនឹងយន្តហោះចម្បាំងម៉ូដេល F-16 របស់សហរដ្ឋអាមេរិក។

ក្នុងពេលជាមួយគ្នានេះ ចិនបានព្យាយាមយ៉ាងខ្លាំងក្នុងការកសាងកេរ្ត៍ឈ្មោះយន្តហោះចម្បាំង JF-17 នៅក្នុងទីផ្សារលក់អាវុធ ជាពិសេសគោលដៅអតិថិជនដែលស្ថិតនៅក្នុងតំបន់មជ្ឈិមបូព៍ា ហើយរហូតមកទល់ពេលនេះមានប្រទេសមួយចំនួនបានបញ្ជាទិញ និងមួយចំនួនកំពុងពិចារណាក្នុងការបញ្ជាទិញ ដូចជា អេហ្ស៊ិប និងអារ៉ាប៊ីសាអូឌីត។