សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បច្ចុប្បន្ននេះ កម្ពុជាបានអភិវឌ្ឍន៍ផ្លូវល្បឿនលឿនមួយខ្សែបានដោយជោគជ័យក្រោមការវិនិយោគដោយក្រុមហ៊ុនចិន និងមានការសាទរពីសំណាក់ប្រជាពលរដ្ឋកម្ពុជាជាច្រើន ហើយក៏កំពុងត្រៀមអភិវឌ្ឍន៍ផ្លូវល្បឿនលឿនមួយខ្សែទៀតពីភ្នំពេញទៅក្រុងបាវិតព្រំដែនកម្ពុជា-វៀតណាម។ ជាមួយនឹងគម្រោងនៃការអភិវឌ្ឍផ្លូវល្បឿនលឿនទី២នេះដែរ គេសង្កេតឃើញមានអ្នកអភិវឌ្ឍន៍ក្នុងវិស័យអចលនទ្រព្យមួយចំនួន ជាពិសេសគម្រោងដីឡូត៍បានឃោសនាពីគម្រោងរបស់ខ្លួនស្ថិតនៅជិតផ្លូវល្បឿនលឿនដើម្បីលក់ជូនប្រជាជន ខណៈដែលអ្នកជំនាញបានបញ្ជាក់ថា សក្ដានុពលគម្រោងផ្លូវល្បឿនលឿនមានតែដើមផ្លូវនិងចុងផ្លូវប៉ុណ្ណោះ ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ប្រាប់ AMS ឱ្យដឹងថា ផ្លូវល្បឿនលឿនជាផ្នែកមួយយ៉ាងសំខាន់ដែលអាចជួយសម្រួលដល់ការធ្វើដំណើរបានលឿនជាងផ្លូវធម្មតា ប៉ុន្តែសម្រាប់សក្ដានុពលក្នុងទីផ្សារអចលនទ្រព្យ គឺមានតែនៅចុងផ្លូវ និងដើមផ្លូវនៃផ្លូវល្បឿនលឿនប៉ុណ្ណោះ។
លោកបានបញ្ជាក់ថា ៖
“ផ្លូវល្បឿនលឿនពីភ្នំពេញ-ក្រុងព្រះសីហនុ ជាផ្លូវល្បឿនលឿនដំបូងគេនៅកម្ពុជា ហើយយើងឃើញថា សក្ដានុពលនៃវិស័យអចលនទ្រព្យឬក៏ការអភិវឌ្ឍគម្រោងផ្សេងៗគឺមានតែនៅដើមផ្លូវ និងចុងផ្លូវ ឬនៅតាមស្ថានីយចំណតតែប៉ុណ្ណោះ ដូចជានៅដើមផ្លូវក្នុងតំបន់រាជធានីភ្នំពេញចាប់ផ្ដើមមានការអភិវឌ្ឍជាបណ្តើរៗ ហើយផ្លូវនេះវាជួយជំរុញសេដ្ឋកិច្ចតែពីរតំបន់ទេដែលខ្លាំងៗ គឺភ្នំពេញ និងក្រុងព្រះសីហនុ។ ចំណែកឯគម្រោងផ្លូវល្បឿនលឿនរាជធានីភ្នំពេញ-ក្រុងបាវិតក៏ដូចគ្នាគឺនឹងជំរុញសក្ដានុពលវិនិយោគនៅតំបន់ក្រុងបាវិត ហើយវាមិនអាចជំរុញតំបន់នៅតាមបណ្ដោយផ្លូវមួយនេះបានទេ ពីព្រោះយើងឃើញស្រាប់ហើយនៅតាមបណ្ដោយផ្លូវល្បឿនលឿន យើងមិនអាចសូម្បីតែឈប់សម្រាកនៅតាមផ្លូវ គឺគេមានកន្លែងត្រូវឈប់ កន្លែងត្រូវចេញ និងចូល”
ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ធ្លាប់បានលើកឡើងរួចមកហើយថា ផ្លូវល្បឿនលឿនជាផ្លូវដែលតភ្ជាប់ប៉ូលសេដ្ឋកិច្ចពីមួយទៅមួយ ដូចជាផ្លូវល្បឿនលឿនភ្នំពេញ-ក្រុងព្រះសីហនុ ដែលតភ្ជាប់សេដ្ឋកិច្ចភ្នំពេញ និងក្រុងព្រះសីហនុ ហើយគម្រោងផ្លូវល្បឿនលឿនភ្នំពេញ-ក្រុងបាវិតនឹងតភ្ជាប់ប៉ូលសេដ្ឋកិច្ចភ្នំពេញ និងបាវិត ដែលអាចនាំវិនិយោគិនទៅបណ្ដាក់ទុនវិនិយោគ នៅតំបន់ក្រុងបាវិតបានកាន់តែច្រើនបន្ថែមទៀត ។ ជាការកត់សម្គាល់ ក្រោយផ្លូវល្បឿនលឿនភ្នំពេញ-ក្រុងព្រះសីហនុដាក់ដំណើរការ គេសង្កេតឃើញថា នៅពេលមានបុណ្យជាតិ ឬថ្ងៃឈប់សម្រាក ភ្ញៀវទេសចរជាច្រើនបានសម្រុកទៅលើខេត្តព្រះសីហនុដែលជួយឱ្យសេវាកម្មផ្គត់ផ្គង់ទេសចរណ៍នៅក្នុងខេត្តតំបន់សមុទ្រមួយនេះមានសកម្មភាពកម្រើកឡើងវិញមួយកម្រិតដូចជាផ្ទះសំណាក់ សណ្ឋាគារ ភោជនីយដ្ឋានជាដើម។ ក្រៅពីនេះ ចំពោះគម្រោងដែលគាប់គាំងនៅក្នុងខេត្តមួយនេះក៏ត្រូវបានជំរុញឱ្យមានសកម្មភាពសាងសង់ និងបន្តដំណើរការឡើងវិញផងដែរ ៕
Account
Security
Favourite Content