ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងពិធីបិទកិច្ច​ប្រជុំបូកសរុបការងារសុខភាពសត្វ និងផលិតកម្មសត្វឆ្នាំ២០២៣ និងលើកទិសដៅឆ្នាំ២០២៤ បានលើកឡើងថា ផលិតកម្ម និងសុខភាព​ត្រូវមានការផ្សារភ្ជាប់គ្នាដែលទាមទារឱ្យមានការគិតគូរ​លើ​ការធានាគុណភាពសាច់ និងសុវត្ថិភាព​សម្រាប់អ្នកបរិភោគ។

ជាមួយគ្នានេះដែរ ឯកឧត្តមរដ្ឋមន្ត្រីបានសម្តែងនូវការកោតសរសើរ និងវាយតម្លៃខ្ពស់ ចំពោះកិច្ច​ខិតខំប្រឹងប្រែងអនុវត្តការងារ និងសម្រេចជោគជ័យតាំងពីថ្នាក់ដឹកនាំរហូតថ្នាក់ក្រោម និងបានគូស​បញ្ជាក់អំពីគោលនយោបាយដែលចាំបាច់ត្រូវធានាសន្តិសុខស្បៀង រក្សានិរន្តរភាពសេដ្ឋកិច្ច​ បរិស្ថាន ដោយផលិតកម្ម និងសុខភាពត្រូវមានការផ្សារភ្ជាប់គ្នា ដែលទាមទារឱ្យមានការគិតគូរ​លើការធានា​គុណភាពសាច់ និងសុវត្ថិភាពសម្រាប់អ្នកបរិភោគ។

ឯកឧត្តម ឌិត ទីណា បានបញ្ជាក់ថា៖

«គោលនយោបាយអាទិភាពទី៥ និងទី៦ គឺជាត្រីវិស័យ​ក្នុងជំរុញ​គោលនយោបាយកសិកម្មឈានទៅរកភាពជោគជ័យ ធានាស្ថិរភាពតម្លៃ តាមរយៈការជំរុញ​សហគមន៍​កសិកម្មទំនើប ដែលបម្រើឱ្យវិស័យកសិកម្មទាំងមូល ព្រមជា​មួយយន្តការដាក់ពង្រាយ​មន្ត្រីផ្សព្វផ្សាយកសិកម្មឃុំឱ្យចំទិសដៅ និងដល់មូលដ្ឋានដើម្បីជួយដល់កសិករទាំងបច្ចេកទេស ទីផ្សារ និងបញ្ហាប្រឈមផ្សេងៗឱ្យបានទាន់ពេលវេលា និងមានប្រសិទ្ធភាព»។

ឯកឧត្តមរដ្ឋមន្ត្រី បានណែនាំឱ្យយកចិត្តទុកដាក់ សហការ ធ្វើការជាមួយគ្នាឱ្យបានល្អ ត្រូវមានការ​សិក្សា​ និងវាយតម្លៃច្បាស់លាស់ទាំងទិដ្ឋភាពបច្ចេកទេស ច្បាប់ និងនយោបាយ។ លើសពីនេះទៀត ត្រូវមានផែនការជាក់លាក់ ស្របតាមយន្តការគោលនយោបាយ និងការពិនិត្យតាមដានទៀងទាត់ ការកាត់បន្ថយថ្លៃដើមផលិត សំដៅផ្តល់ផលចំណេញដល់កសិករ និងមិនមានបង្កើតបញ្ហាថ្មី ឬផល​ប៉ះពាល់ផ្សេងៗដល់សុខភាពអ្នកបរិភោគ និងសន្តិសុខស្បៀងទាំងក្នុងស្រុក និងការនាំចេញ។

កាលពីពេលថ្មីៗនេះ ក្នុងឱកាសសិក្ខាសាលាស្តីពី សុវត្ថិភាពសាច់បង្កកសម្រាប់សុខភាពពលរដ្ឋ (៣០-១១-២៣) ឯកឧត្តមបណ្ឌិត ម៉ុង ឬទ្ធី ប្រធានគណៈកម្មការទី៣ នៃព្រឹទ្ធសភាព និងជា​សហប្រធានក្រុមការងារ “ក” ផ្នែកកសិ​កម្ម កសិ-ឧស្សា​ហកម្ម បានថ្លែងកត់សម្គាល់ថា អ្នកចិញ្ចឹមសត្វនៅកម្ពុជា តែងតែខិតខំប្រឹងប្រែងសម្រិតសម្រាំងតាំងពីការជ្រើសរើសពូជ ការប្រើប្រាស់ចំណី ចាក់វ៉ាក់សាំង និងអនាម័យជីវសុវត្ថិភាពជាដើម ដើម្បីរក្សាសុវត្ថិ​ភាព​សត្វ​ចិញ្ចឹមរបស់ខ្លួនផង ហើយក៏ដើម្បីរក្សាសុវត្ថិភាពចំណីអាហារ មិនឱ្យប៉ះពាល់ដល់​សុខភា​ព​អ្នកបរិភោគឡើយ។

ដោយឡែក ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ បានប្រាប់AMSថា បន្ទាប់​ពីមានកិច្ចប្រជុំជាបន្ត​បន្ទាប់ សាច់បង្កក ដែលបាននឹងកំពុងក្លាយជា​បញ្ហាប្រឈម​នៅក្នុង​ទីផ្សារកម្ពុជានោះ ត្រូវបានក្រសួងកសិ​កម្ម និងក្រសួងពាណិជ្ជកម្ម ពុំមានអនុញ្ញាតឱ្យ​នាំចូលថ្មី​ទៀតទេ ប៉ុន្តែយ៉ាងណាសាច់បង្កកដែលនៅសល់ក្នុងស្តុក ត្រូវតែបញ្ចេញទៅវិញ។

លោក ស្រ៊ុន ពៅ បានឱ្យដឹងទៀតថា បច្ចុប្បន្នគេសង្កេតឃើញតម្លៃជ្រូករស់នៅលើទីផ្សារ បានកើនឡើងបន្តិចមកវិញ សម្រាប់ប្រជាកសិករអ្នកចិញ្ចឹមជ្រូកក្នុងស្រុក ដោយកន្លងមក​ក្នុង១គីឡូក្រាម តម្លៃ៦០០០រៀល ពេលនេះបានឡើងមក​តម្លៃ៨០០០រៀល ក្នុង១គីឡូក្រាម។

លោក ស្រ៊ុន ពៅ បានបញ្ជាក់ទៀតថា​៖ «ចំពោះតម្លៃជ្រូកចូលកុងស៊ីហើយ (ជ្រូក១ចំហៀង) បានឡើងពី​តម្លៃ​៩០០០រៀល ដល់១ម៉ឺនរៀល សម្រាប់ជ្រូកចិញ្ចឹម។»

ទន្ទឹមនឹងនេះ​ ប្រធានសមាគមអ្នកចិញ្ចឹមសត្វកម្ពុជា ក៏បានឱ្យដឹងថា លោកសង្កេតឃើញថា ការ​ដែលសាច់ជ្រូក​ឡើងថ្លៃដល់១ម៉ឺនរៀល នៅលើទីផ្សារនេះ បើទោះជាមានការប្រែប្រួលខ្លះ តែក៏ ពុំទាន់ដល់ថ្លៃដើមដែល​អ្នកចិញ្ចឹមជ្រូក​ក្នុងស្រុ​ក​ទទួលបាននៅឡើយទេ ព្រោះក្រោយពីមានកិច្ច​ប្រជុំដោះស្រាយ ទាល់តែ​តម្លៃ១១ ៨០០រៀល ទើបរួចថ្លៃដើមផលិតបានចំណេញ។

ជាចុងក្រោយ លោក ស៊្រុន ពៅ បានគូសបញ្ជាក់ផងដែរថា ដោយមានការគិតគូរលើការ​ធានាគុណភាព សាច់ និងសុវត្ថិភាព​សម្រាប់អ្នកបរិភោគ របស់ឯកឧត្តមរដ្ឋមន្ត្រី នៅក្នុងសន្និបាត​របស់ក្រសួង សមាគមរបស់លោក​សូមគាំទ្រ និងរំពឹងថា ទោះបី តម្លៃជ្រូករស់នៅលើទីផ្សារ កំពុងស្ថិតតម្លៃ១ម៉ឺនរៀល ដោយតម្រូវការ​របស់ទីផ្សារនៅមានកម្រិត តែថ្ងៃមុខតទៅសង្ឃឹមថាអាច​ងើបឡើងខ្ពស់ជាងនេះទៅទៀត​សម្រាប់​វិស័យចិញ្ចឹមជ្រូករបស់កសិករយើង៕