សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សហគមន៍កសិកម្ម «តាសីសាមគ្គី» ស្ថិតនៅស្រុកថ្មគោល ខេត្តបាត់ដំបង កាលថ្ងៃដើមសប្ដាហ៍នេះ បានចុះកិច្ចព្រមព្រៀងហិរញ្ញប្បទានឥតសំណងពីគម្រោងពិពិធកម្មកសិកម្មកម្ពុជា(CASDP) ក្នុងតម្លៃជាទឹកប្រាក់ទំហំប្រមាណ ១,៨៩លានដុល្លារ ដែលជាកម្មវិធីគាំទ្រថវិកាហិរញ្ញប្បទានដោយធនាគារពិភពលោក។
ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នេះគឺជាការវិនិយោគសាធារណៈក្នុងទ្រង់ទ្រាយធំមួយពីសំណាក់រាជរដ្ឋាភិបាល ចាក់បញ្ចូលទៅក្នុងការអភិវឌ្ឍសេដ្ឋកិច្ចនៃសហគមន៍មូលដ្ឋាននៅលើទីតាំងដែលមានសក្តានុពលសម្រាប់វិស័យកសិកម្ម។
ឯកឧត្តម បានបញ្ជាក់យ៉ាងដូច្នេះថា ៖
«បងប្អូនកសិករជាច្រើនគ្រួសារទៀតនៅក្នុងតំបន់នេះ នឹងទទួលបានផលប្រយោជន៍ដោយផ្ទាល់ផង និងដោយប្រយោលផងពីការវិនិយោគដ៏មានអត្ថន័យមួយនេះសម្រាប់ជាទុនបំពេញបន្ថែមលើការវិនិយោគផ្ទះសំណាញ់ចំនួន ២២៥ខ្នង ផ្លូវលំជនបទប្រវែងប្រមាណជាង ៧,៥គីឡូម៉ែត្រ ប្រព័ន្ធស្រោចស្រពទឹក និងឧបករណ៍សម្ភារៈជាច្រើនទៀត»។
ឯកឧត្តម អ្នកនាំពាក្យ បានឱ្យដឹងថា នេះជាលើកទី២ ហើយដែលហគមន៍ តាសីសាមគ្គី ទទួលបានការគាំទ្រថវិកាហិរញ្ញប្បទាននៃគម្រោងពិពិធកម្មកសិកម្មកម្ពុជា(CASDP) ដោយកាលពីលើកទី១ បានចុះកិច្ចព្រមព្រៀងហិរញ្ញប្បទានក្នុងទំហំទឹកប្រាក់ ១លានដុល្លារសហរដ្ឋអាមេរិក ហើយបានសាងសង់ជាផ្ទះសំណាញ់ចំនួន១៤០ខ្នង និងជួយជាផ្លូវកៅស៊ូ និងផ្លូវគ្រួសក្រហមប្រវែងប្រមាណ៥ គីឡូ។ ជារួម បើបូកទាំងលើកមុន និងលើកក្រោយនេះ គម្រោងពិពិធកម្មកសិកម្មកម្ពុជា បានវិនិយោគជូនដល់សហគមន៍នូវទឹកប្រាក់ប្រហែលជាជិត ៣លានដុល្លារ ដែលជាទំហំមួយធំ បង្ហាញពីការឈរជើងរឹងមាំយូរអង្វែងនៅទីនេះ ក្នុងការជួយជ្រោមជ្រែង សហគមន៍ តាសីសាមគ្គី ឱ្យរីកលូតលាស់។
ឯកឧត្តម ឃឹម ហ្វីណង់ បានគូសបញ្ជាក់ថា សហគមន៍តាសីសាមគ្គី ស្ថិតនៅក្នុងដំណាក់កាលមួយ ដើម្បីប្រែខ្លួនទៅជាសហគមន៍កសិកម្មទំនើប ដែលជាយន្តការមួយផ្ដល់ភាពច្បាស់លាស់ ភាពរឹងមាំខាងផ្នែកគ្រប់គ្រងទីផ្សារ ហើយងាយស្រួលដល់ក្រសួង ក៏ដូចរាជរដ្ឋាភិបាលផ្ដល់ការគាំទ្រដល់សមាជិកសមហគមន៍ជាបន្តទៀត។
លោក ណុប នុន សមាជិកក្រុមប្រឹក្សាភិបាល និងប្រធានសហគមន៍តាសីសាមគ្គី បានសំដែងនូវក្តីរីករាយ និងបានបញ្ជាក់ថា សហគមន៍កសិកម្មទទួលបានការគាំទ្រជាផ្ទះសំណាញ់ ២២៥ ខ្នង និងជាផ្លូវជិតប្រវែង១០ គីឡូម៉ែត្រ ព្រមទាំងស្ថានីយទឹកសម្រាប់ប្រើប្រាស់ផងដែរ ។
លោក ណុប នុន បានបញ្ជាក់ថា៖
«អ្វីៗដែលយើងមានគឺយើងទទួលបានសព្វគ្រប់លើផ្នែកកសិកម្មបន្លែ ។ ដូច្នេះ សហគមន៍កសិកម្មតាសីសាមគ្គី នឹងឈានមួយជំហានទៀតទៅក្នុងសហគមន៍កសិកម្មទំនើបនាពេលដ៏ខ្លីខាងមុខ»។
សូមជម្រាបថា សហគមន៍កសិកម្មតាសីសាមគ្គី គឺជាសហគមន៍កសិកម្មដំបូងគេបង្អស់ដែលបានបំប្លែងគំរូអាជីវកម្មរបស់ពួកគាត់ ដើម្បីធ្វើការផ្គត់ផ្គង់ផ្ទះសំណាញ់ជូនដល់កសិករ និងសមាជិក ជាមួយនឹងបទពិសោធន៍ក្នុងការសាងសង់ជាង១ ០០០ ខ្នង។ សព្វថ្ងៃ សហគមន៍កំពុងធ្វើការជាមួយកសិករជាង ២៧២ គ្រួសារ និងបានប្រើប្រាស់ផ្ទះសំណាញ់ដើម្បីដាំបន្លែសុវត្ថិភាព សម្រាប់នាំចេញទៅកាន់ខេត្តជិតខាង និងទីក្រុងភ្នំពេញ ប្រមាណជាង ២ ទៅ ២,៥ តោនក្នុងមួយថ្ងៃៗ។
Account
Security
Favourite Content