សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមការផ្សព្វផ្សាយពីបណ្តាញសារព័ត៌មានអន្តរជាតិបានឱ្យដឹងថា អ៊ុយក្រែន បានប្រកាសថាខ្លួនរងការខាតបង់ជាង ៤៣៧ លានដុល្លារដោយសារតែការបាតុកម្មតវ៉ារបស់ក្រុមរថយន្តដឹកទំនិញប៉ូឡូញ បង្កឲ្យមានការស្ទះច្រកព្រំដែនពីអ៊ុយក្រែនចូលទៅក្នុងសហភាពអឺរ៉ុប។
យោងតាមរបាយការណ៍ពី Ukranian Pravda បានបង្ហាញថា រាល់សកម្មភាពធ្វើកូដកម្មរបស់ឈ្មួញប៉ូឡូញនៅតាមព្រំដែនជាមួយអ៊ុយក្រែន គឺធ្វើឱ្យក្រុមហ៊ុនអ៊ុយក្រែនចំណាយជាមធ្យម ២៥ ៤០០ អឺរ៉ូ (២៧ ៦៩៦ ដុល្លារអាមេរិក) ក្នុងម្នាក់ៗ។
លោក Andrei Demchenko អ្នកនាំពាក្យរបស់អង្គភាពឆ្មាំការពារព្រំដែនជាតិ (SBGS) បានឱ្យដឹងថា គិតត្រឹមថ្ងៃចន្ទដើមសប្ដាហ៍កន្លងទៅ មានរថយន្តប្រមាណ ២ ៩០០ គ្រឿងកំពុងរង់ចាំជាជួរនៅព្រំដែនប៉ូឡូញ-អ៊ុយក្រែន។
គួររំលឹកថា កាលពីថ្ងៃទី៦ ខែវិច្ឆិកា អ្នកដឹកទំនិញប៉ូឡូញបានចាប់ផ្តើមបិទច្រកព្រំដែន ដោយលើកឡើងពីការសម្រេចចិត្តរបស់សហភាពអឺរ៉ុបក្នុងការលើកលែងអ្នកដឹកទំនិញអ៊ុយក្រែនពីការទទួលបានលិខិតអនុញ្ញាតឆ្លងកាត់ព្រំដែន។ អ្នកដឹកជញ្ជូនទាំងនោះបានអះអាងថា ការលើកលែងនេះបានធ្វើឱ្យប៉ះពាល់ដល់អាជីវកម្មរបស់ពួកគេដោយជំរុញឱ្យមានការប្រកួតប្រជែងពីអ៊ុយក្រែនដែលមិនមែនជារដ្ឋសមាជិកសហភាពអឺរ៉ុប និងធ្វើឱ្យតម្លៃធ្លាក់ចុះ។
យោងតាមក្រសួងហេដ្ឋារចនាសម្ព័ន្ធប៉ូឡូញបានឲ្យដឹងថា អ្នកដឹកទំនិញរបស់ខ្លួនត្រៀមខ្លួនរួចជាស្រេចក្នុងការបិទព្រំដែននៅពេលដែលទីក្រុងប្រ៊ូសែលអនុញ្ញាតឱ្យក្រុមហ៊ុនដឹកជញ្ជូនអ៊ុយក្រែនប្រើប្រាស់ការអនុញ្ញាតចូលរបស់សហភាពអឺរ៉ុបម្តងទៀត។ លើសពីនេះ អ្នកដឹកទំនិញប៉ូឡូញទាមទារឲ្យមានជួររង់ចាំខុសៗគ្នាសម្រាប់រថយន្តដឹកទំនិញពីសហភាពអឺរ៉ុបនៅក្នុងប្រព័ន្ធ eCherha របស់អ៊ុយក្រែន ក៏ដូចជាជួរដាច់ដោយឡែកសម្រាប់រថយន្តដឹកទំនិញទទេ។
ស្របពេលនេះដែរ លោក Oleg Khomenko ប្រធានសមាគមអាជីវកម្មកសិកម្មអ៊ុយក្រែនបានព្រមានថា ស្ថានភាពនៅតាមព្រំដែនអ៊ុយក្រែនជាមួយប៉ូឡូញគឺធ្ងន់ធ្ងរ ហើយអាចនាំឱ្យមានការខ្វះខាតស្បៀងអាហារនៅក្នុងប្រទេស។ លោកបានកត់សម្គាល់ថា ការបិទផ្លូវឆ្លងកាត់ព្រំដែនជាមួយអ៊ុយក្រែនដោយអ្នកបើកបររថយន្តប៉ូឡូញបានធ្វើឱ្យការនាំចូលស្បៀងអាហាររបស់សហភាពអឺរ៉ុបធ្លាក់ចុះ។ ទន្ទឹមនឹងនេះ ស្ថានភាពនៅព្រំដែនកំពុងមានសភាពធ្ងន់ធ្ងរ ដោយឡានដឹកទំនិញរាប់ពាន់គ្រឿងកំពុងរង់ចាំជាជួរនៅសងខាងព្រំដែន។ បញ្ហានេះបង្កឲ្យលំហូរផលិតផលមកពីអឺរ៉ុបតាមផ្លូវដែលបានបិទបានថយចុះ។
យ៉ាងណាមិញ ទំនិញប្រភេទសាច់មកពីប៉ូឡូញ ផលិតផលទឹកដោះគោ និងស៊ុត ត្រូវបានលក់យ៉ាងទូលំទូលាយនៅក្នុងហាងអ៊ុយក្រែន ហើយមានតម្រូវការខ្ពស់ពីអ្នកប្រើប្រាស់។ ដូច្នោះហើយ ការបន្តបិទព្រំដែននឹងធ្វើឲ្យផលិតផលអហារលក់ក្នុងហាងធ្លាក់ចុះ ខណៈដែលទាំងផលិតផលប៉ូឡូញ និងអ៊ុយក្រែនប្រឈមមុខនឹងការចំណាយបន្ថែម ដោយសារតែការពន្យារពេលក្នុងការដឹកជញ្ជូន ហើយអ្នកប្រើប្រាស់នឹងត្រូវចំណាយកាន់តែច្រើនសម្រាប់អាហារ៕
Account
Security
Favourite Content