សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ធ្យូង ជាសំណល់កម្លោចនៃឧស ឬដើមឈើដែលមិនទាន់ឆេះអស់មានពណ៌ខ្មៅ ដែលប្រជាជនយើងភាគច្រើនប្រើវាជំនួសឧសក្នុងការបង្កាត់ភ្លើងយករងើកសម្រាប់អាំងសាច់ព្រោះវាងំល្អ។ ទន្ទឹមគ្នានេះដែរ ការផលិតធ្យូងកាលពីមុនត្រូវការវត្ថុធាតុដើមជាដើមឈើក្នុងការផលិត ប៉ុន្តែដើម្បីចៀសវាងការបំផ្លាញធនធានធម្មជាតិ ធ្យូងបច្ចុប្បន្នត្រូវបានកែច្នៃទៅជាធ្យូងអនាម័យ ផលិតពីកាកសំណល់ មានគុណភាពល្អ ពិសេសអាចជួយជីវភាពសហគមន៍ និងបរិស្ថាន។
លោក សួន សែន ជាម្ចាស់សិប្បកម្មធ្យូងអនាម័យ ភីធី ស្ថិតនៅភូមិគោលាប់ ឃុំគោលាប់ ស្រុកចិត្របុរី ខេត្តក្រចេះ បានមានប្រសាសន៍ប្រាប់ AMS ឱ្យដឹងថា អាជីវកម្មមួយនេះកើតឡើងដោយសារកត្តា ៣ សំខាន់ៗគឺ ទី១ ដោយសារតម្រូវខ្ពស់ក្នុងការប្រើប្រាស់ធ្យូងទាំងបច្ចុប្បន្ន និងអនាគត, កត្តាទី២ គឺជួយដល់បរិស្ថានតាមរយៈការមិនកាប់ព្រៃឈើ ដោយប្រើវត្ថុធាតុដើមពីកាកសំណល់ដូចជាត្រឡោកដូង ហើយទី៣ គឺ ចង់បង្ហាញឱ្យបងប្អូនក៏ដូចជាទីផ្សារក្នុងស្រុកឃើញថាពលរដ្ឋកម្ពុជាក៏មានសមត្ថភាពអាចកែច្នៃបាន។
មិនត្រឹមតែប៉ុណ្ណោះ ក្នុងការផលិតធ្យូង សិប្បកម្មនេះក៏បានផ្ដល់ការងារដល់ប្រជាជនដែលមានលំនៅឋានក្បែរខាងសិប្បកម្ម ដែលអាចទទួលបានការងារបន្ថែមដោយមិនចាំបាច់មានជំនាញអ្វីនោះទេ ពោលគឺមានតែកម្លាំងអាចចូលធ្វើការបាន។ ដោយឡែកសិប្បកម្មនេះអាចផលិតធ្យូងអនាម័យបានប្រមាណ ២៥តោនក្នុងមួយខែ។
ពាក់ព័ន្ធនឹងតម្លៃវិញ ធ្យូងអនាម័យខាងសិប្បកម្ម ភីធី មានតម្លៃចន្លោះ ១២០០-១៤០០រៀលក្នុងមួយគីឡូក្រាម ដោយមានបោះដុំ និងចែកចាយទូទាំងប្រទេសតាមការកម្ម៉ង់ ពិសេសនៅតាមបណ្ដាញសង្គម។ ធ្យូងអនាម័យរបស់សិប្បកម្មមួយនេះផ្ដោតលើគុណភាពជាចម្បង ទោះវាមិនរឹងមាំដូចធ្យូងធម្មជាតិ តែធ្យូងអនាម័យនេះផលិតពីកម្ទេចធ្យូងតូចៗ មានកម្ដៅខ្លាំង មិនផុយលឿនអាចចាប់បម្លាស់ទីបាន ងាយស្រួលបង្កាត់ មិនមានផ្ទុះផ្កាភ្លើង ជាពិសេសគឺមានរាងតូចល្មមៗមិនបាច់កាប់បំបែកនោះទេ។
សម្រាប់ការផលិតទៀតសោត ម្ចាស់សិប្បកម្មខាងលើបានរៀបរាប់ថា ដោយសារដើមទុននៅមានកម្រិតមិនអាចកែច្នៃពីកម្ទេចឈើបាន ប៉ុន្តែលោកបានប្រើកម្ទេចធ្យូងស្រាប់យកមកកិនកម្ទេច លាយជាមួយទឹក និងម្សៅដំឡូងមី រួចពូតច្របាច់ដាក់ក្នុងម៉ាស៊ីនកាត់ចេញជារាងដែលបានកំណត់ និងយកទៅសម្ងួតជាការស្រេច។
គួរបញ្ជាក់ដែរថា លោក សួន សែន បានចាប់ផ្ដើមអាជីវកម្មនេះនៅចុងឆ្នាំ២០២២ ដោយសារមានគំនិតចង់កែច្នៃផង បានសិក្សាជំនាញខ្លះៗពីប្រទេសជិតខាងផង ក៏បានពិភាក្សាជាមួយមិត្តភក្ដិ និងបង្កើតវាចេញមក។ យ៉ាងណាមិញ សិប្បកម្មនេះក៏នៅមានជួបប្រទះនឹងបញ្ហាទីផ្សារមិនទាន់ទូលំទូលាយ ព្រោះប្រជាពលរដ្ឋភាគច្រើននៅប្រើធ្យូងធម្មជាតិនៅឡើយ ណាមួយសិប្បកម្មនេះក៏នៅខ្វះដើមទុនក្នុងការផលិត និងពង្រីកខ្លួន តែបើមានដើមទុនគ្រប់គ្រាន់ លោកចង់ពង្រីកសិប្បកម្មឱ្យធំ ក៏ដូចជាចូលរួមសហការជាមួយដៃគូផ្សេងៗដើម្បីធ្វើយ៉ាងណាឱ្យធ្យូងអនាម័យមានទីផ្សារកាន់តែធំ៕
Account
Security
Favourite Content