បរទេស៖ យោងទៅតាមប្រភពព័ត៌មានពីរ៉យទ័រ បានរាយការណ៍ អ៊ីតាលី គឺជាប្រទេសលោកខាងលិចដំបូងគេដែលចាត់វិធានការប្រឆាំងនឹងការប្រើប្រាស់ ChatGPT ហើយអាល្លឺម៉ង់នឹងធ្វើតាមដោយសារតែការព្រួយបារម្ភអំពីសុវត្ថិភាពនៃឯកជនភាព។

ថ្មីៗនេះ ប្រទេស​អ៊ីតាលី បានដាក់ការហាមឃាត់ក្នុងការប្រើប្រាស់ ChatGPT ជាបណ្ដោះអាសន្នបានជំរុញឱ្យបណ្តាប្រទេសអឺរ៉ុបផ្សេងៗទៀតកំពុងរកវិធានការតឹងរ៉ឹង ដើម្បីគ្រប់គ្រងលើ chatbots ដ៏ពេញនិយមមួយនេះ។ ស្របពេលនេះដែរ សមាជិកសភាអឺរ៉ុបខ្លះមិនយល់ស្របលើវិធានការកំណត់ការប្រើប្រាស់ AI ខណៈដែលសមាជិកមួយចំនួនទៀតកំពុងស្វែងរកឧបករណ៍ដូចជាបទប្បញ្ញត្តិការពារទិន្នន័យទូទៅ (GDPR) ដែលផ្តល់ឱ្យអ្នកប្រើប្រាស់នូវការគ្រប់គ្រងលើព័ត៌មានផ្ទាល់ខ្លួនរបស់ពួកគេបាន និងអាចអនុវត្តចំពោះប្រភេទបច្ចេកវិទ្យា AI ដែលកំពុងរីកចម្រើនយ៉ាងឆាប់រហ័ស។

កាលពីខែមីនាកន្លងទៅនេះផងដែរ រដ្ឋាភិបាលអ៊ីតាលីចាប់ផ្តើមធ្វើការស៊ើបអង្កេតលើ OpenAI អំពីការរំលោភលើសុវត្ថិភាពអ៊ីនធឺណិតរយៈពេល ៩ ម៉ោង ដែលនាំឱ្យមនុស្សត្រូវបានបង្ហាញពីការដកស្រង់នៃការសន្ទនា ChatGPT រវាងអ្នកប្រើប្រាស់ផ្សេងទៀត និងព័ត៌មានហិរញ្ញវត្ថុរបស់ពួកគេ។ កាលពីសប្តាហ៍មុន រដ្ឋាភិបាលអ៊ីតាលីមានបំណងចង់សន្ទនាជាមួយក្រុមហ៊ុនដើម្បីដោះស្រាយបញ្ហាដែលបានលើកឡើងជុំវិញការអនុលោមតាមច្បាប់របស់ ChatGPT ទៅនឹងច្បាប់ការពារទិន្នន័យរបស់សហភាពអឺរ៉ុប និង ដើម្បីហាមឃាត់បច្ចេកវិទ្យាមួយនេះ។ ដូច្នោះហើយ​ អ៊ីតាលីបានបញ្ជាឱ្យ ChatGPT បិទជាបណ្តោះអាសន្ន ដោយសារវាស៊ើបអង្កេតថាមានការលេចធ្លាយទិន្នន័យអ្នកប្រើប្រាស់ដោយកម្មវិធីកាលពីខែមុននោះ។ ទន្ទឹមនឹងនោះដែរ OpenAI មិនបានឆ្លើយតបទៅវិញនោះទេ ប៉ុន្តែ OpenAI បានបើកដំណើរការ ChatGPT ក្រៅបណ្តាញនៅក្នុងប្រទេសអ៊ីតាលីកាលពីថ្ងៃសុក្រ។ មិនត្រឹមតែប៉ុណ្ណោះ OpenAI ក៏មិនឆ្លើយតបទៅនឹងសំណួរសមាជិកអឺរ៉ុបផ្សេងទៀតដែលកំពុងសម្លឹងមើលការរំលោភបំពានណាមួយដែលអាចកើតមាននៅក្នុងប្រទេសរបស់ពួកគេ ហើយ OpenAI មិនមានការិយាល័យនៅក្នុងសហភាពអឺរ៉ុបនោះទេ។

ស្របពេលនេះដែរ អ្នកនាំពាក្យម្នាក់របស់អាល្លឺម៉ង់បានលើកឡើងថា អាល្លឺម៉ង់អាចនឹងចេញគោលការណ៍នីតិវិធីស្រដៀងគ្នានេះ ដែលអាចធ្វើទៅបានដែរនៅក្នុងប្រទេសអាល្លឺម៉ង់។ បច្ចុប្បន្ននេះដែរ មិនមានវិធានការណាមួយហាមឃាត់ការ chatbot នៅក្នុងប្រទេសអាល្លឺម៉ង់ទេ ហើយការសម្រេចចិត្តបែបនេះនឹងស្ថិតនៅក្រោមយុត្តាធិការរបស់ប្រទេសនេះ។ អ្នកនាំពាក្យបានបន្ថែមថា អាល្លឺម៉ង់បច្ចុប្បន្នកំពុងស្វែងរកព័ត៌មានបន្ថែមពីរដ្ឋាភិបាលអ៊ីតាលី ដើម្បីបញ្ជូនបន្តដល់ក្រុមការពារឯកជនភាពនៅក្នុងប្រទេសអាល្លឺម៉ង់។

យោងទៅតាមប្រភពពដដែរលបានបង្ហាញថា ក្រុមឃ្លាំមើលឯកជនភាពរបស់បារាំង និងអៀរឡង់ក៏បានទាក់ទងជាមួយមកខាងអ៊ីតាលីផងដែរ ដើម្បីពិភាក្សាអំពីការស៊ើបអង្កេតនេះ ខណៈដែរក្រុមការពារឯកជនភាពនៅស៊ុយអែតបានលើកឡើងថា ពួកគេមិនមានគម្រោងហាមឃាត់ ChatGPT ហើយក៏មិនទាន់មានទំនាក់ទំនងអ្វីជាមួយនឹងខាងអ៊ីតាលីដែរ។ លើសពីនេះដែរ ខាងអេស្ប៉ាញបាននិយាយថា ខ្លួនមិនបានទទួលពាក្យបណ្តឹងណាមួយអំពី ChatGPT ប៉ុន្តែមិនក៏បានបដិសេធក្នុងការស៊ើបអង្កេតនាពេលអនាគតនោះដែរ។

គួរឲ្យបញ្ជាក់ផងដែរថា OpenAI គឺជាមន្ទីរពិសោធន៍ស្រាវជ្រាវបញ្ញាសិប្បនិមិត្តរបស់អាមេរិក ហើយ ChatGPT គឺជាប្រើប្រាស់គំរូភាសា GPT-3.5 របស់ OpenAI ដើម្បីឆ្លើយសំណួររបស់អ្នកប្រើប្រាស់ ដោះស្រាយបញ្ហាគណិតវិទ្យា សរសេររឿង កំណាព្យ និង សូម្បីតែកូដកុំព្យូទ័រ៕