​ភ្នំពេញ​៖​ ធនាគារ​ជាតិ​នៃ​កម្ពុជា​ ​(​NBC​) ​ព្យាករ​ថា ​សេដ្ឋកិច្ច​កម្ពុជា​នឹង​កើន​ក្នុង​អត្រា ​៣,៩​ ​ភាគរយ​នៅ​ឆ្នាំ​២០២៦​ ​មុនពេល​រំពឹង​ថា​នឹង​ងើប​ឡើងវិញ​ក្នុង​អត្រា ​៥​ ​ភាគរយ​នៅ​ឆ្នាំ​២០២៧​ ​បើ​ទោះបី​សេដ្ឋកិច្ច​កំពុង​ប្រឈម​នឹង​ផលប៉ះពាល់​ពី​សង្គ្រាម​នៅ​មជ្ឈិមបូព៌ា ​និង​បញ្ហា​ប្រឈម​ខាងក្នុង​ក៏ដោយ​។

​លោកជំទាវ​បណ្ឌិត​ ​ជា ​សិរី ​ទេសាភិបាល​ធនាគារ​ជាតិ​នៃ​កម្ពុជា​ ​បាន​ថ្លែង​កាលពី​ថ្ងៃទី​២៧​ ​ខែកក្កដា ​ឆ្នាំ​២០២៦​ ក្នុង​ឱកាស​បើក​សន្និបាត​បូកសរុប​លទ្ធផល​ការងារ​ប្រចាំ​ឆមាស​ទី​១​ ​និង​ទិសដៅ​ការងារ​ឆមាស​ទី​២​ ​ឆ្នាំ​២០២៦​ របស់​ធនាគារ​ជាតិ​នៃ​កម្ពុជា​ ​ថា​ ​កំណើន​សេដ្ឋកិច្ច​កម្ពុជា​នៅ​ឆ្នាំ​២០២៦​ ត្រូវបាន​ព្យាករ​ថា​នឹង​ថមថយ​ល្បឿន​មក​ត្រឹម​ ​៣,៩​ ​ភាគរយ​។

​លោកជំទាវ​បណ្ឌិត​ ​ជា ​សិរី ​បាន​បញ្ជាក់​ថា​ ​ការ​ព្យាករ​នេះ​ផ្អែក​លើ​ការ​ប៉ាន់ស្មាន​ថា ​សេដ្ឋកិច្ច​កម្ពុជា​នឹង​កើន​ក្នុង​អត្រា ​៣,៥​ ​ភាគរយ​នៅ​ឆមាស​ទី​១​ ​ឆ្នាំ​២០២៦​ និង​រំពឹង​ថា​នឹង​ងើបឡើង​បន្តិច​នៅ​ឆមាស​ទី​២​ ​ដល់​ ​៤,៣​ ​ភាគរយ​។

​ការ​ងើប​ឡើងវិញ​នៅ​ឆមាស​ទី​២​ ​ត្រូវបាន​គាំទ្រ​ដោយ​កំណើន​នៃ​ការ​នាំចេញ​ក្នុង​វិស័យ​កាត់ដេរ​ កម្មន្ត​សាល​មិន​មែន​កាត់ដេរ ​និង​កសិកម្ម​ ​ព្រមទាំង​លំហូរ​វិនិយោគ​ផ្ទាល់​ពី​បរទេស​។

​សម្រាប់​ឆ្នាំ​២០២៧​ ធនាគារ​ជាតិ​នៃ​កម្ពុជា​រំពឹង​ថា​ ​កំណើន​សេដ្ឋកិច្ច​នឹង​កើនឡើង​ដល់​ ​៥​ ​ភាគរយ ​ដោយ​មាន​ការ​គាំទ្រ​ពី​កំណើន​ល្អ​នៃ​ការ​នាំចេញ​ ​វិនិយោគ​ផ្ទាល់​ពី​បរទេស​ ​និង​ការ​កើនឡើង​នៃ​ផលិតកម្ម​ក្នុង​ស្រុក​។

​ទន្ទឹមនឹង​ការ​ព្យាករ​កំណើន​ ​៣,៩​ ​ភាគរយ​របស់​ធនាគារ​ជាតិ​នៃ​កម្ពុជា​ ​លោកជំទាវ​បណ្ឌិត​ ​ជា ​សិរី ​បាន​លើកឡើង​ថា​ ​មូលនិធិ​រូបិយវត្ថុ​អន្តរជាតិ​ ​(​IMF​) ​បន្ទាប់ពី​បញ្ចប់​កិច្ចពិគ្រោះយោបល់​មាត្រា​ ​៤​ ​បាន​បន្ថយ​ការ​ព្យាករ​កំណើន​សេដ្ឋកិច្ច​កម្ពុជា​មក​ត្រឹម​ ​៣​ ​ភាគរយ ​ខណៈ​ធនាគារ​អភិវឌ្ឍន៍​អាស៊ី ​(​ADB​) ​និង​អង្គភាព​ស្រាវជ្រាវ​ម៉ាក្រូ​សេដ្ឋកិច្ច​អាស៊ាន​+​៣​ ​(​AMRO​) ​នៅ​បន្ត​រក្សា​ការ​ព្យាករ​ក្នុង​អត្រា​ប្រមាណ​ ​៤,២​ ​ភាគរយ​។

​លោកជំទាវ​បណ្ឌិត​ ​ជា ​សិរី ​បាន​ថ្លែង​ថា​ ​ទោះបី​មាន​ការ​ថមថយ​នៃ​កំណើន​ក៏ដោយ​ ​ការ​ដែល​កម្ពុជា​អាច​សម្រេចបាន​កំណើន​ក្នុង​កម្រិត​ពី​ ​៣​ ​ទៅ​ ​៤​ ភាគរយ​ ត្រូវបាន​ចាត់ទុក​ថា​ ​សេដ្ឋកិច្ច​កម្ពុជា​មាន​ភាព​ធន់​ប្រឈម​នឹង​វិបត្តិ​។

​ភាព​ធន់​នេះ​ត្រូវបាន​លោកជំទាវ​បណ្ឌិត​ពន្យល់​ថា​ ​អាច​សម្រេចបាន​ដោយសារ​រាជ​រដ្ឋាភិបាល​ក្រោម​ការ​ដឹកនាំ​ដោយ​ ​សម្តេច​មហា​បវរ​ធិបតី​ ហ៊ុន​ ​ម៉ាណែត ​នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ​បាន​បន្ត​រក្សា​សុខ​សុវត្ថិភាព​ ស្ថិរភាព​នយោបាយ​ ​និង​ម៉ាក្រូ​សេដ្ឋកិច្ច​ ​ព្រមទាំង​ផ្លែ​ផ្កា​នៃ​ការ​កែទម្រង់​ជាបន្តបន្ទាប់​ ​ជាពិសេស​ការ​ធ្វើ​ពិពិធកម្ម​សេដ្ឋកិច្ច​ ​ស្រប​តាម​យុទ្ធសាស្ត្រ​បញ្ចកោណ ​ដំណាក់កាល​ទី​១​។

​ទោះជា​យ៉ាងណា​ ​វិស័យ​ទេសចរណ៍​បាន​ធ្លាក់ចុះ​ ​ខណៈ​វិស័យ​សំណង់​ ​និង​អចលន​ទ្រព្យ​នៅតែ​មាន​ភាព​ទន់ខ្សោយ​។

​នៅក្នុង​ឆមាស​ទី​១​ ​ឆ្នាំ​២០២៦​ ​អតិផរណា​មាន​កម្រិត​ ​៤,៩​ ​ភាគរយ ​ដោយសារ​ថ្លៃ​ប្រេង​នៅលើ​ពិភពលោក​ហក់​ឡើង​ខ្ពស់​ បន្ទាប់ពី​ការ​ផ្ទុះ​សង្គ្រាម​នៅ​មជ្ឈិមបូព៌ា​។ ​ទន្ទឹមនឹង​នេះ​ ​ប្រាក់​រៀល​នៅតែ​រក្សា​បាន​ស្ថិរភាព​ល្អ ​ដោយ​អត្រា​ប្តូរ​ប្រាក់​ជា​មធ្យម​មាន​កម្រិត​ ​៤.០១៧​ រៀល​ក្នុង​មួយ​ដុល្លារ​អាមេរិក​ ​ដែល​បាន​រួមចំណែក​ក្នុង​ការ​រក្សា​ស្ថិរភាព​ថ្លៃ​ទំនិញ​ ​និង​សេវាកម្ម​ទូទៅ​នៅលើ​ទីផ្សារ​។

​បន្ថែម​ពី​នេះ​ បរិមាណ​ទុន​បម្រុង​អន្តរជាតិ​រក្សា​បាន​កម្រិត​ខ្ពស់​គ្រប់គ្រាន់​ ​ស្មើនឹង​ ​៨​ ​ខែ​នៃ​ការ​នាំចូល​ទំនិញ​ ​និង​សេវា​សម្រាប់​គ្រា​បន្ទាប់ ​ខណៈ​កម្រិត​ស្តង់ដារ​សម្រាប់​ប្រទេស​កំពុង​អភិវឌ្ឍ​មាន​ចំនួន​ ​៣​ ​ខែ​។

​លោកជំទាវ​បណ្ឌិត​ ​ជា ​សិរី ​ក៏​បាន​លើកឡើង​ពី​ការ​សម្រេច​របស់​តំណាង​ពាណិជ្ជកម្ម​សហរដ្ឋ​អាមេរិក​ ​(​USTR​) ​កាលពី​ថ្ងៃទី​២៣​ ​ខែកក្កដា ​ឆ្នាំ​២០២៦​ ក្នុង​ការ​ដាក់​ពន្ធ​គយ​លើ​កម្ពុជា​ក្នុង​អត្រា​ ​១០​ ​ភាគរយ​ ​ដែល​ស្មើនឹង​ប្រទេស​ប្រកួតប្រជែង​ក្នុង​តំបន់​មួយចំនួន​ ​ដូចជា​ ​បង់ក្លាដេស ​ឥណ្ឌូណេស៊ី ​ម៉ាឡេស៊ី ​និង​ប៉ាគីស្ថាន ​ហើយ​ទាប​ជាង​ប្រទេស​មួយចំនួន​ទៀត​ដូចជា​ ​ហ្វីលីពីន ​ថៃ​ និង​វៀតណាម​ ​ដែល​នឹង​ត្រូវ​ជាប់​ពន្ធ​គយ​ក្នុង​អត្រា ​១២,៥​ ​ភាគរយ​៕