សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ ក្នុងរយៈពេលមួយឆ្នាំពេញ ពោលគឺក្នុងឆ្នាំ២០២៤នេះ ក្រុមការងារជំរុញការវិនិយោគក្នុងខេត្តព្រះសីហនុ ទទួលបានសំណើសុំលើកទឹកចិត្តវិនិយោគចំនួន ២៤២គម្រោង ក្នុងនោះគម្រោងដែលទទួលបានលិខិតអនុញ្ញាតជាគោលការណ៍មានចំនួន ២១៥គម្រោង មានទុនវិនិយោគសរុបប្រមាណជាង៦ពាន់លានដុល្លារអាមេរិក ។ នេះបើតាមសេចក្ដីប្រកាសព័ត៌មានរបស់រដ្ឋបាលខេត្តព្រះសីហនុកាលដើមសប្ដាហ៍ទី២នៃខែធ្នូ ឆ្នាំ២០២៤នេះ ។
តាមសេចក្ដីប្រកាសព័ត៌មានដដែលនេះឱ្យដឹងថា ក្រុមការងារជំរុញការវិនិយោគក្នុងខេត្តព្រះសីហនុ បាន និងកំពុងពិនិត្យវាយតម្លៃលើគម្រោងចំនួន២៤ទៀត ដែលបានដាក់ស្នើសុំលើកទឹកចិត្តពីរាជរដ្ឋាភិបាល ។ ជាមួយគ្នានេះដែរ អនុគណៈកម្មាធិការវិនិយោគខេត្តព្រះសីហនុក៏បានចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់បានចំនួន១០គម្រោង មានទុនវិនិយោគសរុបប្រមាណ១៤លានដុល្លារអាមេរិក ក្នុងនោះដែរមាន៣គម្រោងមានទុនវិនិយោគសរុប៧លានដុល្លារអាមេរិក ។
បើតាមឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានមានប្រសាសន៍ថា រដ្ឋបាលខេត្តព្រះសីហនុ បាន និងកំពុងយកចិត្តទុកដាក់អភិវឌ្ឍន៍ និងស្តារហេដ្ឋារចនាសម្ព័ន្ធផ្លូវថ្នល់ កែលម្អឆ្នេរសមុទ្រ ទឹកស្អាត អគ្គិសនី ការគ្រប់គ្រងសំណល់រឹង រាវ បន្ទប់ទឹកសាធារណៈ សួនច្បារ និងកំពង់ផែទេសចរណ៍ស្តង់ដា សេវាកម្មទេសចរណ៍ ពិសេសពង្រឹងការគ្រប់គ្រងសន្តិសុខ សុវត្ថិភាពសណ្តាប់ធ្នាប់សាធារណៈ រួមទាំងជំរុញយុទ្ធនាការទីក្រុងស្អាត ឆ្នេរស្អាតទាំងនៅក្នុងក្រុង ទីប្រជុំជន និងនៅតាមតំបន់ឆ្នេរឱ្យកាន់តែមានសោភ័ណភាព បរិស្ថានល្អប្រសើរជាពិសេសជំរុញការបង្កើនគុណភាពផលិតផល និងសេវាទេសចរណ៍រក្សាបាននូវសុខសន្តិភាព សុវត្ថិភាពទេសចរណ៍ ការធ្វើបដិសណ្ឋារកិច្ចស្វាគមន៍ភ្ញៀវយ៉ាងកក់ក្ដៅក្នុងស្មារតីស្រលាញ់រាប់អានសហប្រតិបត្តិការល្អ និងចូលរួមក្នុងចលនាប្រឡងប្រណាំងទីក្រុងស្អាត រមណីយដ្ឋានស្អាតសេវាល្អ ប្រែក្លាយជាគោលដៅទេសចរណ៍ឈានមុខពោរពេញដោយកាលានុវត្តភាព និងភាពកក់ក្តៅ ក្នុងគោលបំណងពន្លឿនការអភិវឌ្ឍខេត្តព្រះសីហនុ ក្លាយជាតំបន់សេដ្ឋកិច្ចពិសេសគំរូពហុបំណង ដែលជាប៉ូលសេដ្ឋកិច្ចដ៏សំខាន់សម្រាប់វិស័យពាណិជ្ជកម្ម ឧស្សាហកម្ម ភស្តុភារកម្ម ទេសចរណ៍ និងមជ្ឈមណ្ឌលសេវាហិរញ្ញវត្ថុអន្តរជាតិ ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ សម្រាប់ឆ្នាំ២០២៤នេះ បានឱ្យដឹងថា ចាប់ពីឆ្នាំ២០១៧ ដល់ឆ្នាំ២០១៩ សំណង់អគារនៅក្នុងខេត្តព្រះសីហនុ មានសន្ទុះកើនឡើងខ្លាំង ជាក់ស្ដែងក្នុងរយៈពេល៣ឆ្នាំនេះ គ្រោងវិនិយោគសរុបមានរហូតដល់ ១.១៣៧គម្រោងដែលក្នុងនោះគម្រោងក្នុងដែនសមត្ថកិច្ចក្រសួងមានចំនួន៣១១គម្រោង សមត្ថកិច្ចខេត្តចំនួន ២០៩គម្រោង និងក្នុងដែនសមត្ថកិច្ចក្រុងស្រុកមានចំនួន ៦១៧គម្រោង ។
យ៉ាងណាក្ដី បន្ទាប់ពីឆ្នាំ២០១៩ ចូលដល់ឆ្នាំ២០២០ ការវិនិយោគក្នុងវិស័យសំណង់ចាប់ផ្ដើមថយចុះ ដោយការស្នើសុំលិខិតអនុញ្ញាតសាងសង់ចាប់ពីឆ្នាំ២០២០ ដល់ដំណាច់ខែតុលា ២០២៤ មានចំនួនត្រឹមតែ ៨៩៨គម្រោង ប៉ុណ្ណោះ ។
ក្នុងឆ្នាំ ២០២៤នេះដែរ យើងបានឃើញថាមានគម្រោងវិនិយោគលើសណ្ឋាគារមួយក្នុងខេត្តព្រះសីហនុ មានទុនវិនិយោគ រហូតដល់ទៅ ៥៧៤ លានដុល្លារ មានបន្ទប់ចំនួន ២ ៨៧០ បន្ទប់ មានទីតាំងស្ថិតនៅពយតាម៉ូង សង្កាត់លេខ៤ ក្រុងព្រះសីហនុ ខេត្តព្រះសីហនុ ដែលអាចបង្កើតការងារទាំងផ្ទាល់ និងប្រយោលបានរាប់ពាន់នាក់ ៕
Account
Security
Favourite Content