សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលកម្ពុជា ដែលមានក្រសួងរៀបចំដែនដី នគរូបនីយកម្ម និងសំណង់ ជាសេនាធិការ បាន និងកំពុងរៀបចំការប្រើប្រាស់ដីនៅតាមបណ្ដាខេត្ត និងតំបន់ទីប្រជុំជននានានៅទូទាំងប្រទេស ដោយក្នុងនោះ ខេត្តសៀមរាបក៏ជាខេត្តដែលមានអាទិភាពក្នុងការរៀបចំការប្រើប្រាស់ដី ដើម្បីលើកកម្ពស់ការរស់នៅរបស់ប្រជាពលរដ្ឋ ទាញផលប្រយោជន៍ពីការប្រើប្រាស់នោះផ្ដល់ជាប្រាក់ចំណូលដល់ប្រជាពលរដ្ឋ ។
លោក ហែន ពុទ្ធី អភិបាលរងខេត្តសៀមរាបបានមានប្រសាសន៍កាលពីពេលថ្មីៗនេះឱ្យដឹងថា បច្ចុប្បន្ននេះ ភូមិបុរាណចំនួន ១១៤ នៅក្នុងខេត្តសៀមរាប កំពុងត្រូវបានរៀបចំផែនការប្រើប្រាស់ដីធ្លី ដើម្បីឱ្យប្រជាពលរដ្ឋដែលកំពុងរស់នៅក្នុងភូមិបុរាណទាំង១១៤ អាចទាញយកផលប្រយោជន៍ពី ប្រាសាទ ពីបឹង ពីត្រពាំង ពីវប្បធម៌ ជាពិសេស មានផាសុកភាពខ្ពស់។
ជាមួយគ្នានេះ លោកក៏បានថ្លែងអំណរគុណយ៉ាងជ្រាលជ្រៅចំពោះ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលបានយកចិត្តទុកដាក់ខ្ពស់ក្នុងការជំរុញការរៀបចំផែនការនៃការប្រើប្រាស់ដីធ្លីនៅក្នុងភូមិទាំង១១៤ ក្នុងខេត្តសៀមរាប ដោយជំរុញឱ្យមន្ទីររៀបចំដែនដី នគរូបនីយកម្ម សំណង់ និងសូរិយោដី ធ្វើការងារនេះ ដើម្បីពន្លឿនឱ្យបានចប់នាពេលឆាប់ៗ ។
លោកបន្ថែមថា ៖
«នៅពេលភូមិទាំង១១៤នេះ បានរៀបចំរួចរាល់ ពលរដ្ឋដែលរស់នៅទីនោះនឹងទទួលបានផលប្រយោជន៍ពីការរៀបចំការប្រើប្រាស់ដីនេះ ដូចជាអាចបង្កើតមុខរបរបន្ថែម អាចរកចំណូលពី ប្រាសាទបុរាណ ពីកសិកម្ម ។ អ្វីដែលសំខាន់ នៅពេលអនាគត ភូមិទាំង១១៤នេះ នឹងមានអត្តសញ្ញាណរបស់ខ្លួន ហើយអាចទាក់ទាញទេសចរទៅទស្សនាកម្សាន្តកាន់តែច្រើនថែមទៀត»។
លោកបានបញ្ជាក់ផងដែរថា ការវិនិយោគលើគម្រោងលំនៅឋានរបស់ក្រុមហ៊ុនឯកជន ក្នុង និងក្រៅប្រទេស ក៏ជាការចូលរួមចំណែកដល់ផែនការនៃការរៀបចំការប្រើប្រាស់ដីរបស់ក្រសួងរៀបចំដែនដី នគរូបនីយកម្ម និងសំណង់ ផងដែរ ជាពិសេសគឺគម្រោងអភិវឌ្ឍន៍លំនៅឋានដែលមានតម្លៃសមរម្យនៅក្នុងខេត្តសៀមរាប ។
គួររម្លឹកថា ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ធ្លាប់បានលើកឡើងថា ផែនការនៃការរៀបចំការប្រើប្រាស់ដី គឹជាសមរភូមិមួយរបស់ក្រសួងរៀបចំដែនដី ក្នុងចំណោមសមរភូមិជាច្រើនទៀត ក្រោយបញ្ចប់ការចុះបញ្ជីដីធ្លីមានលក្ខណៈជាប្រព័ន្ធនៅទូទាំងប្រទេសកម្ពុជា ។ ការរៀបចំការប្រើប្រាស់ដីធ្លីនេះ នឹងធ្វើឱ្យពលរដ្ឋក្នុងតំបន់ ទទួលបានអត្ថប្រយោជន៍បន្ថែមទៀតពីអត្ថប្រយោជន៍ដែលពួកគាត់ទទួលបានស្រាប់ ហើយនឹងធ្វើឱ្យពលរដ្ឋរស់នៅកាន់តែមានសុខដុមរមនាប្រសើរឡើងបន្ថែមទៀតផងដែរ ៕
Account
Security
Favourite Content